盈記四季養生麵館

营业中

休息中

之前都試過叫藥膳雞湯米線外賣同啲同事一齊食，覺得唔錯。所以今日都再去啲間餐廳嗌外賣order左3樣野，叻沙花枝丸米線、藥膳湯水餃同醬香牛肋條。拎到番去，一見到個牛肋條，真係呆左。我以為係pack錯左人地食淨果盒。一個膠盒裡面得兩三件牛肋條，睇到其他post啲相好大出入。我唔知道外賣份量係咪就係咁既，如果係，咁下次唔會再叫。雖然味道係ok,但係如果外賣係咁既狀況，我覺得唔太接受到。至於另外兩樣食物就正常既，下次買外賣最好check 下啲食物。起碼可以同番店員講番。

12月最尾1日，今天不多人上班，就試試平時覺得比較多人食的店鋪。幸好選擇12點去食，一走入去就有位。之後的人越來越多，甚至要等位。問店員推介，就點了藥膳農場雞蟲草花，藥膳農場雞醉雞及藥膳農場雞麻油雞這3款。3款感覺都大同小異，雞肉不算特別軟滑，但食落雞皮很清爽，怕肥的女士平時都會自己走雞皮，但這次就吃落肚了。我試的是醉雞湯底，湯本身帶了陣陣藥材味，不算太油，亦有好濃的醉雞酒味，鹹之中帶點雞肉及酒的甜味，連同藥材味，飲後覺得人都暖了，湯除了雞肉，還有紅棗，感覺是用真材實料，不似出面其他落調味味精的味道。雞肉份量不算多，但也有件是小雞槌，連同米線及湯，女士來說都幾有飽肚感。佢價錢還包了熱飲，堂食還有9折，六十幾蚊來說性格比都幾好。怪不得門外的顧客就算要等，都要食。除了藥膳湯，亦有其他選擇，例如番茄湯底。值得來食的養生暖胃食品

夜晚做gym之前同朋友想食d野先～經過呢度幾多野食～就試試～叫左個A6餐：藥膳養場雞+日本花菇養生湯 $68冬天食碗熱辣辣既麵，感覺暖暖的雞肉肉質好滑～冬菇好入味！湯幾香濃～雞湯用左三黃雞配多種藥材熬煮4個鐘！叫左益力多爆爆珠，大大杯！$18 ～配埋爆爆珠整體偏甜～仲有呢杯紅豆冰～$12 好正！有好多紅豆，紅豆又夠"淋"! 好好味好滿足！B8: 鮮茄雜丸米線  $64好鍾意食蕃茄湯底！佢用車厘茄同大紅蕃茄+20公斤新鮮蔬菜，熬煮3個鐘！難怪茄香濃郁, 咁香蕃茄味！有墨丸同貢丸～大大粒呢個貢丸好好味！彈牙！見到佢下午茶餐menu好正！都幾平～下次再試！

今日放工去食個晚餐先番屋企！今日放工特別攰，完全無意慾想去煮飯，行行下見到有間粉麵店，入去食飽先番屋企休息餐廳主打藥膳湯底，以養生足料藥膳湯底最為人氣天氣開始凍，食番啲正氣啲既食物好窩心藥膳湯底好香濃，無中藥材果種苦澀味，反而有陣鮮甜香口甘香味道，入口即時暖身我叫左麻油雞，加麻辣，雞肉好香嫩好入味，用左雞髀，所以肉質夠哂香嫩香滑而且食到濃濃麻油味超好味！米線掛湯力高，非常滿足！藥膳湯可以配多種食材，下次試下水餃先

今日去完灣仔購物完，去了一間位於軒尼詩道大街，以藥膳雞湯出名的麵店。店舖有三款不同口味的湯底，當然要吃最出名的藥膳湯底，分別要了個雞肉冬菇米線和雞肉竹笙米粉，兩個最大的不同就是米線滑口點，米粉爽口點；冬菇炆得很腍，配爽口木耳；而竹笙清爽，配白木耳；當然主角是大大塊，滑溜溜雞髀🍗。店舖有一人、二人及四人套餐，有小食和飲品。上湯時菜有生菜🥬，很爽脆清甜，湯底亦喝了。木耳都爽口，配花生🥜，有點辣。

藥膳自家製餃子養生湯米線🍜經OpenRice 叫晚市套餐$65 有主食跟一杯野飲未食個時覺得食碗米線就6，70蚊都幾貴但食完覺得依個價錢都還可以…湯底一打開就成陣紅棗味 試一啖真係好甜！除左紅棗 仲有杞子同圓肉 幾岩女仔食飲完真係有覺得養生既感覺米線份量都幾多 唔會太腍 不過碗底既米線就碎左少少餃子方面 有大約4-5粒 一口餃既size外賣比左少少辣椒油 辣度偏辣 要酌量加舀左少少落湯 反而好似搶左湯底本身既清甜味 覺得唔落好食d

平日食得多好西，都想食啲健康啲嘅晚餐，所以今日就去咗灣仔呢間藥膳湯底嘅麵店。我同朋友叫咗藥膳農場雞蟲草花養生湯米線同藥膳雜丸養生湯米粉，大家都係藥膳湯底，可能因為落咗紅棗，飲落去甜甜哋，湯料仲有杞子同木耳，食完麵之後都想飲番兩啖湯。米線夠彈牙，加咗雞令湯底有雞湯嘅感覺，而且有雞脾，肉質幾嫩滑。米粉就健康啲，雜丸有墨丸同貢丸。墨丸有墨魚味，亦好咬口，貢丸都好高質，好重豬肉味。餐廳好多餸都係有藥膳成份，我哋就叫咗藥膳上湯浸時令菜，生菜嫩綠之餘帶少少藥膳湯嘅甜味。我哋各自叫咗杯檸水同柚子蜜滋潤下。

🌕Hello我係Moon🌕最近食得好多放題同埋熱氣野，係時候要食返啲藥膳乜乜中和一下，聽朋友講灣仔依度有一間藥膳米線係好好味嘅，叫我去食返碗喎😂初頭仲以為會好貴，😂不過價錢都好合理！我同朋友一人一碗，🤣我就要藥膳農場雞＋蟲草花米粉，米粉嘅份量絕對足夠，😍佢嘅雞都比較嫩，蟲草花就喺度增添口感！😌而朋友就要藥膳農場雞＋竹笙米線，😃竹笙嘅份量都足夠，😁米線嘅口感就比米粉更加實在，😆而且佢嘅米線都一樣吸收晒藥膳嘅味道啊！😊朋友提議要多個水餃，😜睇返原來係自家製嘅，$36有5隻，餡料都足夠呀，🤪佢嘅湯底我哋都飲咗！係好飲嘅！🤩飲品方便我就要咗杯凍朱古力，🥳純粹係因為好想飲下朱古力，飲下啲甜嘅嘢😂🌕最後MoonMoon都幾滿意呢度嘅藥膳系列，間唔中食下都可以養生，中和一下平時嘅肥膩感，下次會想試吓佢嘅其他配料啊🌕

一到冬天就想食啲溫補食物，大家都聽過養生，但有多少人真係可以做到呢？我自問都盡量早睡早起，其餘就要靠食療。「盈記四季養生麵館」是我最常去吃養生湯麵的地方，因為它有我喜歡的養生湯底，由店子開業初期到今天，我發現它們嘅湯底，都經過幾次改良，而家藥材味冇咁重，味道傾向鮮甜。藥膳農場雞蟲草花養生湯$65份量如常地多，今次揀咗配滋陰補身蟲草花，鷄腿和鷄肉也齊全，農場鷄的優點口感特別彈牙，雞皮又黃又厚，肉的纖維比較細密，一句講晒好滑。仲想講下個湯底，基本上湯底內加入紅棗，龍眼肉和杞子，真係甜！每一次都會喝光，喝完整個人熱辣辣。藥膳上湯自家製水餃五隻$36水餃和廣東水餃大不同，這裏的水餃皮比較厚，以豬肉餡料為主，唔太肯定用咗什麼調味，但係味道幾特別，胃口唔大嘅人其實份量啱啱好。另外有兩款小食令我百吃不厭鮑汁炆花菇$38花菇非常厚身，直頭是花菇扒，而且炆到超入味，鮑汁吾太咸，真係好好味！古法炆蘿蔔$28冬天最適合食白蘿蔔，白蘿蔔入口即化，無渣，味道清甜無比，加埋藥膳湯底，簡直係無敵。熱檸檬蜜 只須+$7

又係出發搵香港好味米線嘅時候喇，今晚目的地係灣仔嘅盈記。有好多款藥膳農場雞養生湯，但今晚俾刺身帶子叻沙湯吸引咗。橙紅色叻沙湯，濃厚的蝦香湯頭，滲出陣陣惹味芳郁的椰醬香甜，唔會太辣。叻沙味融和在米線及各種材料中。除咗多件肥美帶子外，仲有一隻熟蛋，少量蝦乾，同唔少嘅芽菜，材料豐富。而且上菜時亦有唔少芫荽作點綴，亦可增加味道嘅層次。飲品就叫咗一杯幾有特色嘅奶茶紅豆冰，港式奶茶味道，同微辣叻沙米線係絕配。

同男朋友喺灣仔行完會展展覽路過呢間米線店 我哋不嬲都鍾意食熱湯米線 而呢度主打養生藥膳米線 我哋叫咗一碗藥膳蟲草花雞湯米線 湯底非常濃郁甜甜地 帶有藥膳同紅棗味 令我不禁地飲完一啖又一啖 而且米線屬於彈牙嘅一種 一碗麵裏面有五大件雞件加埋蟲草花 配搭起上嚟其實真係幾好食另外我哋叫咗藥膳雞腳同埋藥膳湯水餃 鮑汁雞腳就食得多 但係藥膳雞腳就真係比較少食 呢度嘅雞腳浸到軟淋好入味 但係林得嚟都仲有啲咬口有骨膠原嘅感覺 而水餃正正常常不過不失啦 埋單原來嘢飲有半價Tim

好鐘意食米線，最近發現左間特別嘅米線【盈記四季養生麵館】居然食米線可以養生？！哇😯真係好吸引呀～😍，今日帶埋老公過嚟養下身😂😂 ⭐推薦養生黑蒜農場雞🐔米線，記得多飲湯，好甜！好味👍🏻👍🏻⭐麻油養生農場雞🐔米線，一上嚟已經聽到隔離檯話好香啊😂 ⭐可以選擇米線，米粉或者跟飯，晚飯仲有抵食二人餐，真跟嘢飲或者小食 ⭐小食我試左養生水餃🥟，連湯都飲埋😂 另外仲有喇沙番茄湯底系列😍啱曬重口味嘅你！ 推介：試下佢嘅辣椒醬點雞食😜 好好味😋

下午吃得有點豐富，晚餐想吃得清淡少少，所以選擇了麵食。餐廳很光猛，主打藥膳湯底，亦有蕃茄湯底和叻沙湯底。餐廳亦有一人套餐和二人套餐選擇，我們最終要了藥膳農場雞芫茜湯底配米線，材料十足，份量亦十足，大大塊的雞髀肉，啖啖肉，湯底鮮甜，而且藥膳味不會太搶口，黑木耳夠爽口。鮮茄牛肉配米粉，湯底香濃，啖啖牛肉和蕃茄，非常之滿足。是日上湯浸時蔬是生菜，味道不單調，十分爽口。配支飲料，又一餐。埋單更有9折呢！都幾抵！

今日又去左灣仔啦！話說女朋友特別鐘意去灣仔一間cafe打卡食野！早早之前已經約左我今日去食，星期六一早起身就揸車出左去嚕！cafe都喺食All Day Breakfast果啲，女朋友鐘意去我唯有一星期一次健康下啦食完cafe唔夠飽，即刻走左去隔離街食間粉麵！餐廳主打人氣藥膳湯底，以養生有益為主，今日去到我當然都叫番個藥膳湯底米線食下啦藥膳雜丸米線，藥膳湯底香濃唔會膩，唔會好似中藥湯底有苦味，的確香濃甘香！雜丸夠彈牙！下次可以試下食其他口味，應該都唔差

今日去開灣仔換身分證，所以約朋去咗呢間灣仔盈記養生麵館度食嘢，打開Menu見到有我最鍾意嘅藥膳同埋蕃茄湯底選擇。最後都係揀咗藥膳農場雞日本花菇米粉，上枱聞到淡淡的藥材味道，有啲似台灣食嘅雞湯藥膳米線，但係酒味就冇咁濃，雞肉算幾滑嫩，花菇夠厚，非常入味，有少少蠔油嘅味道。另外朋友點嘅雞湯山藥米粉，都係藥膳嘅湯底，不過多咗山藥配料，山藥比較爽口，加埋個雞湯感覺非常之養生。牛肋條炆得好入味又夠淋身，牛味正常，不算太突出，份量都有四條，算幾足料。另外再加左一個浸時菜，用雞湯浸嘅生菜，幾入味，味道幾清甜又帶點中藥味。整體味道都算幾簡單，唔算油膩，雞湯加藥膳好似幾補身，當天氣凍嘅時候，喺個不錯嘅選擇。