珍苑麵家 (已結業)

74 食记

味道

环境

服务

卫生

抵食

2411

上水

$50以下

港式粉面/米线

奧志雷

等级4

2.1K

食完明記既炒麵併魚肉燒賣完全唔夠飽，唯有繼續搵食。兜左幾條街都唔知食咩好，行到身水身汗是但走入珍苑食埋下半場啦！已經情緒惡劣，心情唔多好架啦，可否比餐安樂茶飯我食 ﹗黎左個藍衫四眼狐仙口水騎尼佬坐隔離，又嗅又口水多過茶，嘈喧巴閉，非常影響食慾呀 ﹗

坐後面位阿姐應該同我一樣操開泰拳，黐筋地掙我背脊四鑊當無件事，火都黎 ﹗隔離羽絨阿叔接住又隊我背脊，您唔識坐過少少架！飲罐可樂降降火先。

神州婆鬼殺咁嘈，只不過小妹妹食得慢，有錯咩？自己走左去，留低工人照顧小妹妹同埋單，真過份。唔想生就咪死黎香港生，得到身份證、得到福利、得到資源，碌完咭唔洗找數架？

河粉無走蔥、撈麵清湯都無走蔥要打回頭，可樂仲漏埋單添，不過侍應姐姐好有禮貌又招乎周到，無投訴。不過另一個侍應阿嬸太強趕客 feel。

連食兩日孤獨餐，再試試其他出品先。珍苑搬黎馬會道方便好多呢 ﹗冷氣比舊舖勁，環璄比舊舖乾淨企理又光猛，室內坐位比舊舖多，還多了樓上雅座添，只不過再沒有露天街邊位了。

食埋今日，聽日開始要餓住操喇，極速瘦身。河上鄉大食妹幾時黎挑戰我呀？等您好耐喇。唔夠飽想食多個牛腩河，不過都係算，無心情，心情好差，鬧情緒，放自己假休息。

滷水雞全翼，忘記了說免斬啊，原隻食才是皇道。賣相都算靚仔，觀賞值很高，色澤鮮明有光澤，不會滷到烏卒卒又黑炆炆。聞得到的滷水豉油清香，雞皮滑彈微黏，雞肉還嫩嫩的。冰糖味濃厚，味道及外觀都勁似瑞士雞翼，潮式瑞士雞全翼是也。

不知何解會成為其中之一的招牌菜，可能被喜歡吃甜的食客受落啦。我最愛街市滷味檔的肥嘟嘟、脹卜卜既滷水雞翼，一咬爆汁，外彈內嫩 ﹗最怕又最憎雞翼滷到又霉又鞋又散，討厭 ﹗

南乳豬手麵走蔥，坊間食家推介，真係那麼好味？一向對豬手都麻麻的我，唯有親身試試。最怕見到腳皮或無修甲，我會非常大厭力而放唔到入口架呢。幸好幾件都不是腳趾，那就不怕啦，lucky ﹗豬皮爽爽的，完全沒有黏黏感覺。

炆得入味，乳香處處但不霸道，蜻蜓點水剛剛好，清香脫俗。香香甜甜，忍不住要慢慢細味，損損骨頭，不過我都是較喜歡啖啖肉。上水最香最辣最正既辣椒油，夠刺激、夠惹味 ﹗最初還以為是自家製呢，但同事通知其實是潤志辣椒油，上水街市有售。

魚蛋河走蔥，何解又係布味河粉呢？跟林德記一模一樣味道。雖然濕布蓋住河粉可以保持濕潤，避免乾硬。但那股強烈布味會被河粉吸收，就算經過滾湯灼過都依然利害呢。正如用魚袋煲湯一樣，布味蕃茄魚湯，飲一啖全部倒晒去廁所。

又係必殺辣椒油出動既時候喇，狠狠地兩大羮將布味完完全全淹蓋 ﹗結實滑溜粉河跟勁辣湯汁湧入口，刺激得冒汗，美味又暢快 ﹗清甜湯汁撈上豉油辣椒油，變得香辣無比又惹味，開胃醒腦好好味，越飲越興奮，飲到一滴都無得剩露出公雞碗，正呀 ﹗

牛筋腩河走蔥，熱騰騰腩汁濃湯浸著棉滑河粉，撈上大量辣椒渣拿起隻碗連湯大啖掃入口中，香辣惹味。特濃辣辣腩汁湯一滴不漏一飲而盡，夠刺激，微微冒汗，好鬼正！

牛筋腩撈粗走蔥，何解剪斷晒我既長壽麵啊？碎濕濕非常難夾，勁討厭 ﹗我唔係小朋友，可否食客要求才動手剪短去呢？食到疾住疾住，無得一氣呵成大大啖啜到盡頭，不夠暢快啊 ﹗

牛筋腩兩者都柱侯味濃郁香醇，嚥韌黏黏牛孖筋，有著我大愛的膠膠感覺，妙手回春骨膠原。大大舊牛腩鬆化富彈性，半肥瘦帶滑沒有渣，其貌不揚但入口不乾不鞋。

上成炆牛功夫加上優質腩筋，並沒有停下來的理由，好味道。粗麵太硬不彈牙，不滑溜喎，太忙所以匆匆拖水算嗎？全場爆滿，食客不停出出入入，恭喜客似雲來。成碟撈麵清晒都係唔夠飽，唔再叫喇。

冬菇雲吞麵走蔥，另類新嘗試，食得牛筋腩、魚蛋牛丸多都悶悶地呢。蠔汁冬菇肥美，滑彈而充滿水份，菇味香濃帶著蠔油鮮味，呎碼剛剛好，最怕異形冬菇，美味無比。

一口雲吞，不太大、不太小，非常適合我的嘴仔喎。雲吞散發強烈麻油味既濁且嗆，蝦肉爽爽而結實，醃得重口味，不過不失，都食得過。

冬菇炸醬撈伊麵走蔥，竟然是辣味炸醬，中正我口味 ﹗跟深仔記一模一樣味道，溫和辣味打頭陣，最後微甜結尾。肉絲嚥韌，未算太乾硬，合格。我當然要再加辣先可以滿足到啦，狂隊兩匙辣椒渣，跟幼麵撈混啜入口，香辣無窮，好刺激啊 ﹗不過炸醬跟伊麵似乎味道唔多夾，又跟蠔油冬菇唔多夾，整體味道怪怪的，還是我落得太多湯呢？

冬菇雲吞麵走蔥，粗麵超級爽彈，不過帶湯力就比幼麵為弱。捲上大量辣椒肉連香甜冬菇湯衝入口中，好味到滾動啊 ﹗

牛筋腩牛丸撈麵走蔥，幼麵爽爽爽，麵條掛上大量辣椒油，香噴噴帶著微溫品嚐。起勁地大大啖塞入口中，那種興奮澎湃刺激感覺不能形容，拍爛手掌 ﹗牛丸巨形有料到，大大粒有嚼勁夠結實，牛肉汁香甜濃厚，爽夾彈。經過旺角通記地獄辣椒油洗禮後，珍苑已不礙於視了。消滅整碟撈麵後來個清湯漱漱口，清湯十分咸，受不了。

貢丸水餃伊麵走蔥，貢丸意料之外非常爽彈喎，有菇菇粒使到菇味出眾，香氣四溢，味道可口，比牛丸黑魚丸更好食。長形苗條的水餃，造型有個性。木耳、肉鬆、蝦肉塞得水餃飽滿脹卜卜，結實不鬆散。

蝦味肉味均秤，亙相輝映，咸香蝦汁混香甜肉汁加上木耳爽爽，回味無窮，可口味美。濃濃大地魚牛骨湯襯托著嚥韌伊麵瀡進齒舌之間，散發蛋香麵粉香，嘆得津津有味。加上大量特辣辣椒渣更是錦上添花，興烚烚夠刺激，冒著汗大啖食，爽啊 ﹗

牛筋腩魚蛋伊走蔥，最愛伊麵 ﹗嚥韌彈彈有蛋香，咬落夠香口。甜美腩汁加勁辣辣椒渣，滾熱辣一氣呵成啜啜啜，大滿足啊 ﹗將牛筋腩辣椒渣伊麵連同腩汁濃湯同時送入口，至高無上的享受 ﹗外購傳統潮州板魚蛋質量有保證，非常有彈性，咬落棉滑，有魚汁有咸香，我打邊爐都經常會買呢。

牛筋腩肚麵走蔥，金錢肚爽彈異常，用筷子夾起時十分跳動啊。八角味太強，濃烈又混濁，重口味加上辣椒油都合格。

牛筋腩墨魚丸撈麵走蔥，極為普通的墨魚丸，外購貨粉略為多了一點，質感微彈但黏牙，味道正常。最好食既墨魚丸在街市林德記，濃厚墨魚味，還有墨魚肉一粒粒添，彈牙可口。伴碟菜芯麻麻地，不嫩不甜，而且粗糙。但另叫一碟蠔汁菜芯就非常高質，鮮爽香甜，不同的嗎？

蠔汁菜芯，某人喜歡食通菜，突然唔想食，那就只得菜芯了。高質菜芯，香甜鮮嫩，爽脆多汁。沾上鮮味蠔油，不咸不嗆不濁，全部食晒無得剩 ﹗不過莖有點砂，無緊要。