珍苑麵家 (已結業)

呢間麵店上水好像好出名，而家擇舖重開，成日見排晒隊！今日終於試到！下午兩點唔使排隊！店面好新淨，入內麵店格局，近門口淥麵地方，桌椅係木製，圓圓笨笨，有舊麵店味道，食物以麵食為主，店員落單快手，我叫了牛腩撈粗，又想食雲吞，佢提議我雙拼！店內飲水要自己去水櫃度斟，呢樣幾好，唔飲又唔浪費！又企理啲！牛腩雲吞撈粗（$45）一碟好大碟，賣相靚仔，牛腩比較瘦，炆得入味唔嚡，牛筋好大條，炆得入味通透，好彈牙煙韌，雲吞淥得過火，啲雲吞皮甩咗，皮薄幾滑，蝦仁爽口，加啲豬肉肉汁！好味！腩汁香濃，粗麵有咬口，撈埋一齊好味！碗湯濃味，胡椒味重，飲完好渴！腐乳通菜（$18）青通菜，淥得過火，莖部都好啲，菜葉淋晒，腐乳醬雖然少，不過夠味好濃！少許辣！牛肚河（$32）朋友食，食咗佢一件牛金錢肚，厚身又炆得入味，好淋又煙韌！牛腩河（$32）朋友食食物幾好，店員有笑容，難得要讚嘅係廁所，只有一格（男女共用）闊落又新！保持到乾淨！係無補充廁紙！