王牌冰室 (南豐紗廠) (已結業)

南豐紗廠做左活化工程都幾個月，今日難得抽到時間就同屋企人去個度行下睇下變成點，見到內有食店，就揀左幾多人下既王牌冰室試試佢，隔離仲連住王牌冰茶，即刻每人叫翻杯試下。坐低緊係叫左野食先，我地食左個tea唔係好肚餓，咁就嗌左兩個餸同一個常餐。本身係嗌乾炒牛河，點知佢無哂河粉，仲有瑞士雞翼都賣哂了，可能因為間店好似關9點，我地7點幾先黎。先黎既係常餐D 王牌特濃沙嗲牛肉通粉 配牛乳炒蛋、牛油多士，趁熱食多士，正常鬆脆可口，牛乳炒蛋名副其實好似牛乳咁滑，最鍾意食咁樣嘅炒蛋。之後到沙嗲牛肉通粉，食落果然係好濃既沙爹醬汁配上質嫩爽口既牛肉，通粉亦都唔錯，唔會太淋，將d汁撈埋落湯度個湯就更濃郁，果然係佢地既王牌。之後再黎兩個餸，先黎中式牛柳，本身以為係細細舊個隻，黎到覺得好大碟，啲牛都好大塊，有肥有瘦，個汁都帶一點甜酸味而且都非常濃郁，每啖牛肉都配上醬汁，如果可以無咁重味就更好。第二道餸啫啫雞煲，醬汁同樣濃郁，但如果可以無咁鹹就更好，或者適合配飯食，啲雞都尚算嫩滑，配料都好豐富。冰茶好似仲早過餐廳關門，我去買既時候已經得翻好少野飲賣。最左係豐乳奶蓋朱古力，奶蓋好滑好正，之後連埋朱古力飲，濃郁香醇可口

想去南豐紗廠好耐上網search 定有咩好食個個都推介哩間！兩點幾鐘門口仲係大排長龍😱快快手叫咗個香蔥雞扒撈丁同招牌滑蛋蝦仁叉燒雙併搭多件流心芝士西多🤤撈丁啲蔥真係勁闊綽，好！多！蔥！抄得好入味啲雞扒完全無雪味哩個真係我食過最出色嘅撈丁之一！個滑蛋蝦仁 啲蛋多到滿瀉！蝦仁大隻彈牙叉燒大大塊 肥瘦適中真係不愧為招牌必點！流心芝士西多啲芝士又係好足料鹹鹹甜甜係超夾😍雖然好肥好有罪惡感但真係好好食！嘢飲想專登提一提竟然有熱檸樂煲薑！真係眼前一亮，水準以上，正！食完出到舖位隔離仲有台式飲品店😱😱真係唔嗌唔得嗌咗奶蓋紫薯加桃膠佢個奶蓋鹹鹹地 一啲都唔水濃厚度up！個紫薯一定係真材實料不過我唔記得嗌少甜真係超甜😂😂😂朋友嗌桂花珍珠奶茶，茶底嗌咗觀音王哩杯嗌咗半糖，share 一齊飲好正😍

女女終於考完試，可以去南豐紗廠行下 行經3樓時已接近LUNCH時間尾聲，估唔到呢間冰室都仲大排長龍 俗語話有人排即係有好野，當然照跟~呢度既設計保留左傳統特色之餘又加入左香港既特色 呢個招牌，好有親切感呢~ 入面既設計保留左原有工廠的特色窗戶，再加上一D中式的雙圓門設計 我覺得有可能係紗廠本身的遺物，不過無特別求證~ 但襯埋個水泥牆，完全無違和感呢~ 大大個霓虹招牌，搞笑之餘又將餐廳既特色菜推介埋俾你~ 好有心思 睇到個餐牌，明白左D點解咁多人排，因為實在好抵食呀~ 今日雖然係星期六，但依然有精選午餐 而且價錢係超級抵~通常呢D藝術地方，食個意粉都下下過百，但呢度竟然唔使50蚊可以食到飯跟埋凍飲 係百物騰貴既香港，仲要係假期呢D日子，呢度真係不可多得既良心食肆~ 第一ROUND，當然要食番餐廳的招牌菜~全部都好金黃色~  襯埋個仿青花瓷的器皿，好吸晴 估唔到平時食開既茶記餐都可以咁靚仔~是是但但叉燒蛋飯，但賣相一D都唔是但~ 係一片金黃的半熟滑蛋上滿佈了叉燒 再加上幾片綠蔥作點綴，將叉燒蛋飯的格調馬上升了不少叉燒以瘦叉為主，但一D都唔嚡 蛋下面的飯都唔少架

難得放緊一個長weekend，梗係化身文青行一行南豐紗廠啦！去過幾次，都未上過3樓同天台，今次就踩多幾次扶手電梯，一睇究竟，點知有一間冰室喎肚仔見餓就走入去啦，即刻嗌個精選午餐，咖喱味都幾濃呢間特別在有埋手調飲品，但要另外出門口落單同領取嘅大胃覺得呢間好飲過樓下間木喂二，珍珠煙韌帶甜，茶種豐富，品質絕不馬虎，甜澀恰當滑蛋比較似芙蓉炒蛋嗰種，但大胃鍾意生啲，叉燒幾靚，肥瘦剛好焗飯炒底值得一讚，一啲都唔油，蛋同飯唔會炒到旱晒鮮果茶絕對好飲過一慌，就算唔揀少甜，半身甜度都啱啱好嚟冰室又點可以唔食返個西多士呢？冰室內有好多本土裝潢，自覺更加文青

一直都想去南豐妙廠，但講咗好耐仍未成事😅因為有long weekend 所以放工後約咗朋友去打卡兼食飯~本身想食瑞士雞翼，點知賣哂所以要瑞士雞脾奄列（＄38），仲有特濃牛乳炒滑蛋叉燒蝦仁雙拼飯（＄64）同沙嗲金菇肥牛粉絲煲（＄78）。飲品就點咗黃金奶蓋東方美人（＄35）同埋桂花蜜釀東方美人（＄27）。瑞士雞脾啖啖肉，微甜既瑞士汁同香滑既奄列好夾👍特濃牛乳炒滑蛋叉燒蝦仁雙拼飯冇令人失望，大大粒既蝦仁好吸引，叉燒帶有少少肥，係我最鍾意既~沙嗲金菇肥牛粉絲煲好惹味，但肥牛又唔會過熟，唔錯！兩杯飲品都可以揀溫度同埋甜度，我地要咗微甜，所以茶味相對較重。

呢日做下文青嚟到南豐紗廠行下，午餐揀咗嚟呢間王牌冰室食。除咗冰室之外，旁邊仲有間王牌冰茶賣飲品～王牌冰室裝修時髦，打正冰室旗號賣港式茶餐廳食物。呢日係weekday，南豐紗廠位置又唔算特別方便，但都座無虛席👍食物價格相宜，不錯～特濃牛乳炒滑蛋叉燒蝦仁雙拼飯（$58）一行入餐廳就見到大大隻字「是是旦旦叉燒蛋飯」，梗係要試下佢！半熟牛乳炒蛋入口順滑，配上厚切蜜汁叉燒同埋彈牙嘅蝦仁🤤淋上甜豉油，香港茶記signature dish perfectly done 👍蒜香生炸雞翼撈麵（$40）雞翼好食，好入味好腍，唔錯👍麵底煮得啱啱好，唔會水汪汪，夠乾身。王牌西多（流心芝士）（$34）西多士食得多，但餡係芝士嘅真係第一次食～面頭無淋蜂蜜，淨係搽咗牛油。切開就見到一絲絲芝士🤤外層蛋味好重，好脆身～雖然非常heavy，但真係食到停唔到口🤣－食完嘢仲去咗隔離王牌冰茶買嘢飲🤣焦脆奶蓋•東方美人（$35）推薦😍！奶蓋上面灑上蔗糖，加以火炙，形成香脆嘅焦糖，口感一流；奶蓋味道濃郁，兩者十分match💯！叫咗微甜，所以甜度十分啱我口味～東方美人茶係第一次試，茶味幾濃，正！冰糖洛神花脆梅茶（$26）洛神花茶可以

今日約了幾個年輕的family，到荃灣最新網紅打卡熱點"南豐紗廠"。 南豐紗廠附近一帶，本來是香港其中一個工廠區，但多年之後香港工業的重要性慢慢淡出，很多廠廈便開始想辦法活化，南豐紗廠便是其中一個例子。未到來這裏之前，還以為人流會很清淡，但令人驚訝的是，遊客絡繹不絕（包括大量本地人和遊客）。由於人流不錯的關係，而廠區內特色餐廳也不少，所以絕對有選擇困難，最後我們選了這家“王牌冰室”，因為勝在菜式夠穩陣，而且大人小朋友都可以合適。我們其中點了，叉燒蝦仁炒滑蛋飯，咖哩牛肉焗意粉，香蔥雞扒撈公仔麵叉燒蝦仁炒滑蛋飯，應該算是店內的皇牌菜式，見到幾枱客人都有點這個，的確，蛋炒得濕潤而滑，充滿蛋香，加入我貪心的選配叉燒+蝦仁，一次過滿足兩個願望。朋友點了咖哩牛肉焗意粉，由於是“焗”的關係，上枱時稍為撥弄，已經湧出咖哩香，牛肉份量頗多而且沒有鬆肉粉的痕跡。香蔥雞扒撈公仔麵這個有驚喜，非常適合“蔥油控”，由於這份是朋友的，我只能輕嚐試味，但掛念之情久久不散，所以再偷了一匙羹的蔥油來伴飯（我的叉蝦蛋飯）此店的最大特色是，門口另設飲品外賣區，可以買到台式飲品，我們也點了：王牌鮮果茶 / 特濃朱古力加洛神花

我承認我係有點遲黎南豐打卡😂，冇計Mary 姐要考試，要等埋呢個港女去。🤷🏻‍♀️☀️今日天氣都幾好，不過好熱，又濕。好在呢到大部分地方都係室內有冷氣。🤗佢呢到有一座佔大部分都係食店，我地就黎左呢到食，因為比較起其他餐廳，好似呢一間比較平民，仲要勁多人排隊，俾左好大信心我。😋等左五分鐘左右有位，見到佢都有好多款食物，咁岩我又兩點後黎到，所以有埋茶餐叫。💪🏼⭐️鮮茄焗豬扒飯🐷中上質素，因為太肚餓了，所以叫左個飯。⭐️王牌經典常餐M✨瑞士汁撈公仔麵，如何抗拒！呢個餐跟埋個炒滑蛋同多士，多士好大舊牛油啊！😋☀️唔知係咪夏天，所以食完仲好想飲野。佢係隔離又有一間賣台式飲品嘅，原來都係佢！仲要係可以跟餐的！⭐️水果茶🍒水果味好重，尤其係西柚味，好出。⭐️黃金奶蓋鐵觀音🥛作為一個奶蓋粉絲，點會放過佢呢個黃金奶蓋！第一次見，係咸蛋啊！好特別，真係有咸蛋黃粒食到！😍

近排睇facebook成日有人推介荃灣南豐紗廠打卡，所以今日趁星期六有假唔洗返工即刻約埋朋友去打卡。行完就係個邊食埋晚餐，今次我地去左間叫王牌冰室，裝潢好有本土特色 地方寬敞，坐得非常舒服。之後睇下餐牌，價格好親民貼地，最正係佢地開左飲品店係隔離，我地可以一邊飲一邊食冰室。我地睇完餐牌決定食佢地大推的沙爹牛同叉燒蝦蛋飯，仲叫多左個椒鹽豬扒。之後又過左去隔離買桂花凍配觀音王同水果茶。首先講常餐炒蛋同包，非常滑，麵包焊底但唔乾，時間拿捏得宜，非常好食。再到沙爹牛，湯底濃而不膩，咸中帶甜，麵可以吸取哂湯汁，十分滋味。之後正叉燒蝦炒蛋飯，蛋半熟，留有蛋汁，蝦肉厚身有大，叉燒味道好，蛋汁配醬油撈飯好食。隨後到椒鹽豬扒，豬扒味道夠濃，配飯食開胃惹味，不太乾身，留有肉汁。最後到兩杯飲品，先講水果茶，佢同外面台式飲品店大有不同，不甜但清新，解膩非常適合，而桂花凍觀音更是特別，桂花味超級清新，每飲一啖都有清香的桂花味。最特別的係兩杯都冇調整甜度，但甜度適中，清甜。冰室位置易找，坐得舒服，價廉物美，常餐更是特別出色，值得再光顧。

住港島嘅我想去the Mills打卡好耐，難得真係去左點都要食返餐飯啦！西餐嘅港島大把，好食嘅冰室就較少，所以就決定黎呢間冰室試下～一入到黎，真係好香港情😂我地估呢度嘅招牌係叉燒炒蛋飯，但因為屋企都整到，所以我地無叫，叫左其他野。呢度有個水吧位係似台式飲品吧咁，所以飲品選擇都多d，又熱又焗，紋青就order左冰糖檸檬雪梨茶，滋潤下又可以refresh 下！🤗跟茶加$15蚊瑞士汁炒牛河：炒微好香但唔會過油，瑞士汁夠哂味！河粉索哂d味，唔會「碎濕濕」，都唔會咸得滯 👍🏻 我呢d永遠都減緊肥嘅人就清清地，跟餐嘅白飯都無要。粉絲雜菜煲：有足夠海味味，菜款都多，唔係得兩三種，味精少，食菜都食飽我🤪呢度有個任食瑞士雞翼，但可惜已賣哂，好傷心！價錢都ok㗎！

喺荃灣新熱點南豐紗廠有間王牌冰室，個日有幾款做緊promo。與友人各試咗唔同味，我飲咗龍井奶蓋，茶味幾出，不過本人好驚奶蓋太豐富，好肥😅，依本份量ok. (其實我唔應該飮奶蓋wor, 不過見佢係龍井又好想試😝）佢旁邊有地方食嘢（話明冰室，唔係齋飮奶茶㗎🍜🥤）不過我哋俾佢幅特色牆吸住咗，掛住影佢，冇影到室內環境😂

在南豐紗廠看完展覽後，已經過了中午吃飯時間，原本以為已經過了繁忙時間，沒有那麼多人，所以決定去王牌冰室，吃他們有名的滑蛋叉燒蝦仁飯。但還有很多人，所以都等待了一陣子。吃不到尖沙咀有名的旺記冰室就來試試這個王牌冰室吧！這個特濃牛乳炒滑蛋叉燒蝦仁雙拼飯，滑蛋有淡淡的牛奶香味真是好香和很滑！叉燒都是選用半肥瘦部位。蝦都是選用 新鮮蝦，口感是爽的。另外，配上他們特製的豉油，真是好好味！沙嗲牛肉潛艇都不錯。另外，那天有優惠下午茶時間加少許錢可以任食雞翼。

南豐紗廠經活化後，成為了文青打卡熱點，今晚特登同朋友過嚟食飯，親身感受到呢度的懷舊同藝術氣息。揀咗王牌冰室食飯，佢連門面都裝修成懷舊客棧咁樣，有百子櫃、木窗花、木枱櫈等裝飾。除咗冰室是吃茶餐廳食物之外，還有王牌冰茶，可以外賣，也可堂食，有很多特色手調飲品。飲品以茶為主打，可以加選的配料很特別， 除了一般的珍珠外，還可以選配冰糖桂花啫喱、桃膠，夠曬滋補。朋友細食，點了全日供應的常餐D $44, 沙爹牛肉麵，配牛乳炒滑蛋，牛油多士。牛乳炒滑蛋，真的非常好吃！炒得很滑，又有牛奶香味，滑嘟嘟的口感很自癒！牛油多士，可以加錢轉蒜蓉多士。不過我覺得牛油多士已經很好吃，烤過後微微脆，但麵包仍然很鬆軟，牛油味超香。沙爹牛肉麵，非常推介，這裏的牛肉，比起其他茶餐廳有牛肉香味，其他茶餐廳多數用鬆肉粉醃到肉質鬆泡泡的，沒有口感，這個仍然食得出是牛肉質地。沙嗲湯很香濃，有花生味，公仔麵吸收了沙嗲湯底味道，越食越香，好惹味，不消一會已經消化掉。叉燒蝦仁滑蛋飯$64, 一上桌見到碟飯好澎湃，好大碟，滑蛋鋪滿碟面，下底全是堆起的白飯，有豉油汁灑在滑蛋上。滑蛋撈飯是絕配，這裏的蝦仁算大隻，但蝦仁份量不多。叉燒切片，全

荃灣紗廠我地一家真係第一次踏足，我放假冇咩地方去，就決定帶兩個細路去荃灣紗廠行下，影吓靚相！行咗一陣，家姐就話肚餓，我地就行咗一圈，行到去王牌冰室，個女就話要食，而老婆就話對王牌冰茶有興趣，咁就食啦！有住兩個細路，就叫啲小朋友至愛啦！粟米班腩飯，加$15轉餐，有埋白飯 + 例湯。家姐細佬都表示好好味，好快就清哂！另外，我叫咗我嘅至愛，中式牛柳，好香，啲汁同洋蔥真係好夾，牛柳又好「林」，而且佢地嘅中式牛柳仲有少量菠蘿係入面，阿囡至愛。至於王牌冰茶，我地就叫咗冰燉蘋果觀音王，入面有好多蘋果果肉，口感同味道一流。再叫多咗杯冰糖檸檬雪梨茶，咁熱嘅天氣，似呢杯真係好潤加消暑呀。

其實我地成日都會出荃灣，因為荃灣有好幾個大商場，會有小朋友廁所，又會有好多其他育嬰設施，啱哂我地呢啲有小朋友嘅家長。之前成日聽朋友介紹，南豐紗廠有好多打卡靚位，咁嗰日去開荃灣，我地就過咗去南豐紗廠到行下，順便食埋個早少少晚飯。行下行下，就揀咗呢間「王牌冰室」啦！我地絕對係比佢個招牌同環境吸引咗入去㗎！而且「王牌冰室」隔離，連住間「 王牌冰茶」，都係佢地㗎！舖頭入面仲有句「是是旦旦叉燒蛋飯」，所以我一嚟就揀咗個「蝦仁叉燒炒滑蛋飯」，味道果然好，而且滑蛋真係好滑，飯底係豉油配香飯底，唔怕個飯冇味。再嚟一個清清地嘅「蟲草花北菇蒸滑雞」，啲雞真係滑嘅，成個餸好香，仲熱辣辣上枱。健康之人必叫菜，因為冇哂生菜，我地就叫咗「蒜蓉炒白菜仔」，好似一個好普通嘅菜，的確係，但熱辣辣上枱，真係我都食唔停口。最後，食飽飽又點可以唔飲嘢，我係勁愛奶蓋之人，所以就揀咗「王牌冰茶」嘅【焦脆奶蓋 • 東方美人】，真係超好飲，奶蓋加咗啲脆脆嘅焦點，配埋東方美人茶，真係絕配。總結：冰室嚟講，有好多唔同類型嘅餸菜揀，有啲仲係「王牌冰室」獨有嘅，記住，食完飯一定要叫返杯茶飲，咁就完美啦！