炳記茶檔

营业中

休息中

今朝車完老婆返工跟住就去咗炳記食早餐，7點三我座低咗但係未有豬扒食要等到七點半先有。天氣十分之凍，冇理由唔等最鍾意食嘅豬扒麵嘅。呢度嘅豬扒麵同熱奶茶真係非常之正。簡直係大坑嘅招牌

琴日去大坑買糖，順手幫襯下炳記，因為上次幫襯都講緊2-3年前，身為一個奶茶控，印象中佢d奶茶同豬扒麵係唔錯去到炳記坐低，佢因爲無哂米粉，所以放棄叫豬扒米，叫左個奶茶同奶醬多算，一飲杯奶茶....我覺得好似飲水咁...可能求其搵間舊式茶記都好過佢，唔識形容，總之就少左d茶味，奶醬多就ok既，因為麵包比出面特別鬆軟

呢間食店，曾經是非常有人情味，非常地道，非常街坊。可惜地 又一次證明「人怕出名豬怕肥」今天，剛巧路過小店，只係想買件多士，同佢講要兩件(只售HK$22)油多外賣，點知在煮食位置，有位疑似老細的四眼先生態度寸寸的話：你凈係買多士，我地唔做嘅！咁我唯有講句唔使啦唔該唔通呢間俾人賺到天上有地下無嘅大排檔仔，專業到一個境界⋯⋯只係做一件多士係唔識整，一定要沖埋杯飲品先得？？ 又可能，兩件$11, 共和國22的多士咁細生意, 唔想做......對於這樣的服務態度及經營手法，恕平民百姓的我講一個字「服」

唔知由幾時開始每逢星期六都要去一去呢個老地方其實大排檔都已經買少見少㗎啦 ，係因為大坑比我嘅感覺太正 而大排檔又別有一翻風味 ，價錢又相宜又有人情味 ，所以特別鍾意去。雖然無可避免一定要排隊 ，不過都無阻我哋去嘅意欲 ，每逢星期六上晝去完之後先開始一日嘅活動。的而且確佢嘅奶茶真係同出邊飲嘅好唔同 茶香奶滑 茶水部姐姐應記一功。另外豬扒同滷水雞翼都係鎮店之寶 不過我自己呢就反而欣賞雞翼多少少 可能因為次次食豬扒面嘅黑椒汁浸左落湯度就冇晒 ，所以如果鍾意食豬扒嘅可以選擇食豬扒烘 ，咁啲黑椒汁就可以保留響個包入面啦而出面茶記食開嘅火腿 、餐肉 、紅腸 、腸仔、炒蛋等等當然唔少得啦！我最鍾意嘅呢就係食佢嘅奶油多喇 真係百吃不厭 唔知點解屋企係整唔到架呢 除咗奶油重可以叫奶Jam 、Jam 醬、等等 ⋯總有一款啱你口味 普通麵包之外仲可以選擇麥包 簡簡單單一碗麵一件多士兩人share就飽晒啦埋單都係幾十蚊另外要讚一讚佢個面又唔會過淋 其實要多得老細同所有員工你地日日做到冇停手 ，所以有陣時大家燥底左都在所難免嘅🤪佢哋其實全部嘅記性都非常好。而家秋高氣爽佢哋就舒服d ，但係大熱天時嘅日子佢地仍然

同友人外賣左豬扒雞翼同紅腸豬扒係幾好味嘅有黑椒味同埋煎到好香肉質都好林食落無乜渣但其他野就無乜特別喇本人覺得佢地嘅凍檸茶/水係好飲過平時果d檸檬好似無咁酸可能個豬扒太濃味同呢d凍飲特別夾

Lunch比同事放飛機，突然要一個人食飯，口痕痕想飲杯靚奶茶，於是決定去大坑食個lunch。十二點半左右來到，人龍未出現，加上係我自己一個人，即刻就有位了。叫了碗豬排麵，同一杯茶走，食物亦很快就上枱了。很喜歡豬排那比較重黑椒的味道，豬排的味道比較濃，而且很淋，唔會好難咬。但相反，麵個湯底則較為淡，兩者加在一起能互相平衡。而今日來的重點 - 奶荼，則一如己往好飲：茶香味加上幼滑的口感，而且我也比較喜歡煉奶的甜，正

星期六，下午一點到黎到炳記，排隊排左5-10分鐘就有位坐。茶檔既環境，食既係local 既感覺，唔好既係落單幾亂同 埋單都慢因為無單既，埋單要再講番你自己食左咩再計番幾錢。食物方面，我男朋友叫左豬扒麵 + 凍奶茶 。而我就想試下咸牛肉蛋麵 + 凍奶茶。（埋單$79）奶茶都算大杯，飲到茶味覺得好飲出色既☺️覺得排隊最值得係杯奶茶👍🏻豬扒麵就真係一般，只可以話入味，不過肉質係瘦d 比較鞋口，麻麻地。唔記得左影相🤦🏻‍♀️（因為skip 左單 等左好奈掛住食）而咸牛蛋麵就真係更一般， 因為個湯無咩味 加埋個餸都無味。可以唔洗試，如果試就可以拼多樣餸✋🏻 見好多人選 雞翼/午餐肉/紅腸

難得今天起了個早，興緻勃勃的來排大坑有名的炳記，我與男友約莫九點左右到，前頭大約十來位人在等候，排了大約十分鐘便入座，點了豬扒麵、雞翼米粉及二杯凍奶。豬扒和雞翼的賣相不錯，但是豬扒入口肉質乾柴且硬麵及米粉煮的過軟，所以拍了第一張豬扒麵後便沒興致再拍雞翼，凍奶入口算是滑順不澀，但是冰塊占杯子1/3，喝多二口後便覺無味，雞翼反倒是今日覺得最好吃的，皮嫩肉不柴，味道也不會過重。買單離開時，見仍有許多遊客拖著行李過來候位，但我想，這是我嚐過不會絕再來第二次的地方。

先吾好評論呢間啲野好無食，只係一樣對客人無禮貌已經可以blacklist佢！ 事源我26/9/2018（星期三）下午3點18分去諗住買件奶醬多比媽咪食，見個營業時間係收3點30pm, 咁咪問：老細，我想問重有無奶醬多呀？佢竟然答我：小姐，先吾好講我地今日係假期，第二你就咁買件奶醬多我係吾會整比你既。原來佢地開鋪，收鋪同假期都同佢地係鋪頭寫出黎係吾同既，重有點解一件多士就吾整？我只可以話就算你幾好食我都吾會幫襯你，完！

一直鍾情懷舊既鋪頭，雖然呢排太陽伯伯好落力，所以都覺得炳記係街度坐另有一番風味！不過食落都真係幾熱，一路食一路流汗，食完要即刻走！（值得一提，招呼客人既姐姐好好人，知道我地食到好熱，幫我地掉個涼d，有風扇既位。）今次同朋友叫左豬排旦麵，雞翼咸牛旦米同凍奶茶。食物味道依舊，豬排同雞翼都好入味，有咬口，麵係出前一丁，落埋枱面既麻油同辣椒油，係夾既！呢個價錢，有呢個質素，算係有水準既！不過今日杯凍奶茶失色左小小，希望下次再去，會正常返啦！

好多人突登去食，有幾多人突登再反去食？話哩度好出名，點咗豬扒麵，凍檸茶。湯底清清地版本嘅出前一丁湯粉，加咗店家嘅魚露辣椒粒好啲，但都係還可以。麵質爽口，普通公仔麵。豬扒黑椒味重，醬油味，肉質小小鞋，唔算太難咬，無咩豬肉香。非常普通的豬扒麵，係黑椒味外面小啲見。可能奶茶真係好好飲？

嚟【炳記】一定要叫三寶: 奶茶, 奶醬多, 豬扒麵奶茶: 茶奶比例很好, 有淡淡茶香, 不會被奶味蓋過, 入口細滑, 好飲!奶醬多 : 多士夠脆, 多醬, 入口鬆化, 好味!豬扒麵 : 豬扒醃得入味, 肥瘦適中, 口感唔錯, 唔會太硬, 略嫌湯底冇咩味性價比高, 夠地道有風味, 但始於係舊式茶檔, 而且食人眾多, 不要期望有餐廳水準既服務.

炳記係大坑好出名，一直想食好耐架啦，但次次都鬼咁多人，今日得閒，可以排下隊😬可能晏左去啦，大概2:30 到，見條隊又唔算太多人，大約5-6 人，排左15 mins 終於有得食啦奶油多 - 係必食的，非常多醬，好脆口！👍豬扒 - 醃得入味，嫰口，果然係招牌菜！👍鷄翼 - 相比豬扒有點失色，但都唔差！奶茶 - 出名好飲，果然很香滑！👍值得一讚，雖然食客多，但食物上得快！依家呢d 有風味又有水凖既大排擋真係唔多，雖然要排隊，但係值得的！

大坑嘅炳記茶檔，我諗無人唔識掛，起碼住香港島嘅人應該一定試過。呢啲差唔多就嚟絕跡嘅大排檔買少見少，好有風味同人情味！呢排天氣未算太熱，所以係大排檔食嘢都好舒服。嚟到坐低必叫嘅係奶油多士，因為太肚餓嘅關係食咗完全忘記影相，下次補返數呢度嘅秘製黑椒豬排醃製得非常入味，肉質鮮嫩分量十足。公仔麵煮得剛剛好夠彈牙，配上秘制的辣椒醬＋麻油，簡直係一絕雖然我唔飲奶茶，但係呢度嘅奶茶都係出晒名。所以鍾意奶茶嘅朋友一定唔可以錯過！

大坑炳記茶餐檔，在街邊吃的露天茶餐檔，夠晒懷舊，別有一番風味，坐在街邊人吃，非常多捧場客，有街坊，有自己揸車來，有坐巴士來吃的捧場客，地方尚算乾淨。自己通常食公仔撈麵，走湯走嗰隻，紅腸、餐肉加菜，豬扒都好食㗎，加些豉油，值得一題，最緊要加枱上的那樽辣椒油，極品非常，內裏全部都是辣椒仔，鍾意食辣嘅朋友就最啱，可以比好多個like佢，食極都唔會厭，難捨難離樽辣椒油。多士又脆又熱辣辣，奶茶咖啡又香又滑。