漁道樂 (已結業)

未去都一肚氣，四眼男侍應態度差到不得了，我們已訂位，佢打電話黎確認訂位時千叮萬囑我們不要遲到，遲到就當我地取消，咁我地就非常準時去到，5:52分去到、佢地6:00才開門，我地就請問佢我地到左可否入去坐，店員就立即話唔得喎（佢地原本係圍埋一齊响餐枱傾計嘅），之後就立即彈開扮工作，咁我地就唯有响門口熱辣辣焗到死地等。終於去到6:00，咁我地就去準備入座啦，點知個四眼男侍應就話「用餐90分鐘」，我地就立即好愕山，點解唔一早同我地講，我地係慶祝生日，90分鐘根本不夠時間的，咁我地就唯有猶豫要唔要轉地方啦，（响呢個時候，另一位想walk-in入去食嘅女士就同我哋講四眼男侍應態度惡劣，佢都立即走左）跟住四眼男侍應就打開門無禮貌地問我地要唔要入座先，我就回覆佢話「等等先，我朋友都未到齊」由於他態度惡劣到絕頂，我哋就轉身，四眼男侍應再惡劣啲咁話「即係點呀？取消呀？」我地更加嬲，立即走，連最好脾氣嘅其中一位女孩子都話「有無搞錯？咁態度，太過份😡」跟住佢打電話黎問「係咪取消呀你哋？」我朋友就答佢「唔好意思呀，我地取消呀！」佢竟然Cut線，我地全部幾個朋友都發誓以後都不會去這店。

同朋友去食晚飯 見哩間鋪頭好似幾有特色我地叫左蟹蓋、曼魚、刺身、壽司食物質素吾算出色 只屬於正常 但打卡位相對比較多網上訂位正價有75折 最後埋單但有啲又冇折頭吾知餐廳係點計因為其實我地都係散叫叫嘅菜式都冇特別優惠

好耐冇去旅行啦，香港人最鍾意就係去日本。而我都唔係例外。好耐冇食日本嘢，見到網上好多人介紹呢間餐廳，就決定試試佢。喺地鐵站出咗冇耐直行就見到間餐廳啦。地點都幾方便。而且門口佈置得好靚好吸睛。嚇一條樓梯上去打開對木門。見到舖頭裏面裝修到好似日本居酒屋咁。好有feel。🙈我叫咗清酒煮蜆 $108，一夜魚乾 $148同石燒和牛 $348。講真佢嘅價錢唔算好貴喺尖沙咀來講。而且佢物有所值。講吓佢嘅和牛先，真係入口即溶！而且用石頭燒比起一般更加香，牛既油脂爆曬出嚟😻蜆同魚都一樣新鮮！唔怪得知網上咁多人比好評呢間餐廳啦👍🏻

餐廳環境有種好似去左日本既感覺叫左個特選二人餐：雜錦天婦羅🍤：拖羅刺身：土瓶燒好靚同埋個鍋都好味道有驚喜活貝盛合加甲羅燒：跟餐甜品小丸子：整體環境餐飲感覺幾好活貝甲羅燒味道當然比不上係日本食咁鮮味但疫情下去唔到日本，價錢又唔貴會再去食

我首先講出結論。冇冷氣。刺身唔新鮮有腥味。漏單。食品hea做早幾日約咗朋友去食晚飯。經openrice訂位。當晚準時到達及由職員安排入座近門口位置。坐係度熱到標晒汗。問職員有冇其他位可以轉就敷衍hea答了事。Ok冇問題。我當出下汗減肥。之後先叫一round刺身。叫咗個400幾蚊刺身。結果啲刺身係係唔新鮮同有腥味嘅。溫度仲要係室溫。完全唔似係放係冷凍櫃雪住。之後再叫咗明太子玉子。吉列黑豚。蒲燒鰻魚3款熱食。等咗十零分鐘玉子最先上枱。一睇個賣相就知出事。hea煮到只係將啲明太子放上塊煎蛋皮中間再卷成一碌切件上碟。蒲燒鰻魚就只係一條現成鰻魚用微波爐加熱後切件上碟。到枱時仲要只係得個暖字。最後最後30分鐘後再催單先上嘅吉到黑豚。賣相還算可以。不過一入口又出事。炸到件豬扒死實實又硬又乾。最後埋單成千銀。真係食到一肚火睇完之後幫唔幫襯大家自己諗下啦。

經app book位有75折，咁坐低當然係問下餐牌邊啲係有折戴眼鏡貌似經理嘅職員就話：「有排講架喎，你自己睇openrice啦你book檯唔係睇左架咩？」即係而家客人黎食野就要背熟你個menu？好啦講返食物明太子玉子燒啲明太熟曬不特止，份量仲要少到好似施捨俾你咁，我俾100蚊唔係想食煎蛋囉咁為左食明太子再哎左燒明太子，香味一般最後哎左活貝盛合，本身expect可以影佢燒職員以張檯太細為理由燒熟曬先拎上來，而且唔係一次將整個盛合上檯結論：性價比極低，服務極差，又貴又唔飽又一肚氣啲“專業”好評大家自己諗諗啦！

一直都冇寫食評的愛好；但真心想推薦下呢間充滿日本風情嘅餐廳；呢次已經係第三次幫親，餐廳給人有置身於日本🇯🇵嘅感覺，裝橫非常有心思，設有tatami坐和兩間Vip房間，環境真一流，店員服務都非常Nice餐廳每日都會有好多特別推介菜色，比如生蠔🦪，象拔蚌刺身，日本直送各種魚類刺身，真係應有盡有，我同老公都好鍾意食日本菜；每次都會Order一條刺身魚，次次都有驚喜，鮮味十足😍，值得推介，而家仲有折扣優惠添～特別推薦菜色石燒和牛，什錦天婦羅🍤，生蠔刺身，海鮮浜燒拼盤，7點刺身，牛舌，清酒煮蜆，粒貝刺身，極上壽司🍣

訂了位準時到達，但朋友因工作關係會遲10分鐘到達，一進餐廳，男侍應明明見到未齊人，只是反問「齊人未？要齊人先入座。」，其實當時餐廳裏面一台客人也沒有，但仍要趕我出門口，要我在門外坐等候齊人入座（門口沒有冷氣，當時氣溫為35度）。沒什麼，就是感覺不良好，利申：我應該不是西客，亦有解釋朋友會在10分鐘內到達。之前睇其他食評，以為態度差只是個別事件，都諗住post一次的心態，點知未食已經…… 唔怕受氣可以去試吓。

其實果日門市唔多人，有好多空枱，但係唔知係咪因為我地三個女仔叫得比較少野食啦，明明人均都有200但係就好似趕住趕人走咁⋯⋯明明只係坐左冇一個鐘就問人有冇嘢加，又唔係到last order時間，冇嘢加就過黎執枱，隔左陣就叫人賣單。唔怪得咁多空枱，好叻趕客🙏🏼

態度差、食物差，只是食環境？1）大細超12）大細超23）好難食4）態度奇差1）大細超 1 - 打嚟做confirm booking嘅時候冇講到要齊人先至可以入座，去到攞位先至講都唔緊要。坐低咗之後，見到好多枱未齊人都可以先入座，點解釋？2）大細超 2 - 隔離嗰枱講英文同國語，得到嘅係好好服務，男waiter仲問佢滿唔滿意服務，應該係vip或者講英文同國語係唔同啲3）好難食 - 明太子玉子燒凍上；西京燒味道奇怪…應該係膽汁污染咗魚肉味道；海膽蟹肉卷，海膽一啲都唔新鮮，顏色深沉冇海膽味4）態度奇差 - 又係個位男waiter.....臨走前同我哋講佢哋做緊promotion, 我嘅回應係好輕描淡寫咁同佢講：唔好意思，以後唔會再來。男waiter 回應出奇特別：好呀，bye bye。出奇不意嘅回應實在太有趣，相信依為男waiter係老細嚟嘅，唔憂做👍

令你置身日本🏯 一嘗爐端燒食物種類繁多價錢亦幾相宜😌ɞȏȏҡ ṿıѧ ȏƿєṅяıċє ṭȏ ɢєṭ 25% ȏғғ!.海膽蟹肉反卷, 雜錦天婦羅һȏ ṡıҡ! 係石燒和牛份量偏少😧老細👨🏻‍🍳推介之下 點咗呢個海鮮盛合 488超豐富 ‼️有生猛鮑魚,帶子,生蠔 🦪蟹腳肉🦀 蝦🦐.哩個老細好健談邊幫我哋燒邊同我哋大揭秘講某啲行家為賺💸嘅衰嘢🤯

今日同朋友book 左二人枱食晚飯，員工(戴眼鏡男職員)態度極度惡劣。原因如下:1) 入去好奇見到榻榻米枱，仲要係四張吉枱，就問男職員:「咦，可唔可以坐果啲枱嫁？」男職員用藐視的態度說：「你有$2000 minimum charge 咪坐囉。」其實純粹好奇一問，亦都冇話一定要坐，但係男職員的回覆，讓人感到非常不受尊重。2) 點飲品的時候，問男職員：「你哋會唔會有asahi嫁？」男職員亦用藐視的態度說：「我哋只賣日本啤酒。」我隨即補問:「乜Asahi唔係日本啤酒咩？」男職員答：「Asahi得個名炸喎。」經上網查證， Asahi 的確係日本啤酒，酒廠，總部都在日本。但係當時我作為客人純粹係查詢產品種類。亦都好有禮貌，不明男職員為何須要用呢種態度回應。我認為餐廳係須要有基本的服務態度。況且，我作為客人以禮貌的方法查詢餐牌或坐枱選擇，並沒有作過分要求。但男職員的態度卻頻頻令人感到不受尊重。雖然，客觀來說食物品質是ok的，但職員態度實在太差。整個服務態度都有不受尊重，甚到被藐視的感覺。希望餐廳能正視問題。謝謝。

前幾日係我同男朋友嘅一周年佢追梗我嘅時候第一次帶我食日本嘢都係呢度㗎所以呢度雖然環境係靚裝修又好有日本風格但係對我哋來講更加有特別意義我哋叫咗石燒和牛$348基本上次次我哋呢度呢度都必點佢嘅和牛本來就好高質雪花怖滿得好均勻將每一塊靚嘅牛肉放喺個石上面燒聽到 滋⋯滋⋯😻跟住見到啲油脂擁晒出嚟😆燒到半熟嘅時候 點少少海鹽就放落口裏面 真係入口即溶呢個價錢食到咁嘅質素真係好抵👍🏻👍🏻另外我哋都試咗佢嘅壽司🍣都好出色尤其是係個和牛壽司！🙈

見呢間咁多好評，嘢食又幾吸引，就同朋友嚟食（今次食飯冇任何折扣優惠）張枱有啲細，放咗個爐喺到已經冇咩位我地嗌咗5樣嘢，第一樣係海膽蟹肉反卷，正正常常冇咩特別～第二樣係牛油果軟殼蟹沙律，都係正常發揮第三樣係味噌蟹甲羅，咸咸地，有啲蟹味，ok嘅～第四樣係活貝盛合，其實擺埋呢個喺枱面嗰陣我已經冇乜位食嘢侍應會幫我地燒埋，咁都幾好，唔驚我地會燒唔熟或者太熟，不過侍應燒燒下唔小心將鮑魚整跌返落個盤味道都ok, 不過燒緊嗰陣見到佢一直落調味，所以都係咸味多過鮮味第五樣係川海老，同餐牌張相差好遠！我地以為起碼係中型size, 點知係勁細隻，不過味道都唔錯，啱哂飲啤酒整體嚟講食物都正常嘅，不過係有啲貴，而且服務一般好似好想趕我地走，唔適合傾計聚會食食下嗰陣衝埋嚟口upup講咗堆嘢，我地淨係聽到咩咩last order, 咁我地即刻叫佢再俾menu，佢將menu放喺個爐到感覺唔太衛生...所以總括嚟講就係試一次就夠，冇乜特別～

今日同朋友食呢間餐廳，呢間餐廳一直都好出名和牛，所以今日再同朋友過嚟試一試！❤️❤️一入到黎真係好日本風格，有好多日本嘅小裝飾，真係令到我好掛住日本呀！今日我地點左呢個石燒和牛($348)，佢最吸引之處就係佢比一塊石板你自己燒...首先和牛就一定冇得輸啦，入口即溶，超重牛肉味，牛肉嘅脂肪分布真係好正，睇D紋就知道呢塊牛肉超好食！當然我哋都有叫一個鰻魚炒飯，個炒飯超足料，每一啖都有鰻魚，味道啱啱好，最重要個炒飯粒粒分明，真係無得頂！我哋都有叫過炸天婦羅，啲粉超薄，仲要絕到裏面蔬菜嘅鮮，個冬菇真係冇得輸！最後我哋叫咗個壽司8件盛，啲魚生超級新鮮，同埋嗰個飯量岩岩好，一啖食落去真係好正。整體來講呢間餐廳真係一級捧！