清真牛肉館 (龍崗道) (已結業)

今日午餐三個人去左呢度食.. 12:30到步,都已經好多人,坐滿6成. 開頭都唔知叫乜野好,唔理咁多,先來兩個牛肉餅. 好熱,好多汁,好夠味.不過一個岩岩好.之後再叫:1. 咖哩羊腩飯.2. 牛肉餃子3. 家常餅咖哩羊腩飯都幾辣,好香,羊又有dd羶, 好正. 個咖哩汁仲可以點其他食物.牛肉餃子真係估唔到咁好,雖然個餡同牛肉餅一樣,但一樣出色,因為個餃子皮好正,佢唔似一般o既餃子皮咁腍,有d o趙口,比較爽,感覺好清新.家常餅就係好Plain o既小咸薄餅.點咖哩汁都唔錯.一共食左86蚊.一人30蚊唔使.

除非好身手，否則不要上樓上，樓梯很窄，很鈄。牛肉餅爆汁，但麵食一般。

看到網上品評個牛肉餅好好食, 原來試了都是普通野!

呢度d牛肉餅真係好味,皮薄又多料,又多肉汁,多到好似"必"出來,總之真係好好食,亦因為咁,其他好唔好食都唔記得添!?

琴晚同老公去咗試呢間"清真牛肉館".之前雖然有book位,但book唔book其實都好似一樣(都係要等)......我地兩個人要咗一客(兩件)牛肉餅,一個(中)酸辣湯,砂鍋雲吞雞,牛肉水餃.個砂鍋雲吞雞好大個呀!又足料,正!牛肉餅果然名不虛傳,一切開啲汁就係咁流出嚟,正!但個酸辣湯就真係酸咗啲,牛肉水餃就一般水準啦!啲侍應都好nice,雖然迫係迫咗啲,總括嚟講都係一餐滿意嘅晚飯!兩個人食到捧住個肚仲要食唔晒打包,埋單都只係$150,抵呀!

呢度牛肉餅真係好食，難怪人人讚好!!其他有咖哩牛腩，配白飯或葱油餅均十分好食。叧外有牛肉拼盤︰有牛筋，牛展，牛肚等等，都幾特別。麻油雞︰雞肉嫩滑且有麻油香味。砂鍋雲吞雞︰湯清甜，雲吞亦皮薄足料。水煮羊肉︰羊肉不太"酥"，可口，但不夠辣。呢度成日都好多人，會有機會坐上層，通往上層樓梯超難行，都幾唔方便。

今晚同朋友食飯琴晚諗緊食乜時突然想去試過呢度人人讚頌既牛肉餅於是收工後同朋友兩個特別搭車去試去到時六點半左右咋但已經差唔多座無虛席個個一坐低都即刻叫牛肉餅對面位o個兩個仲係只係入去食牛肉餅添我地叫左兩個牛肉餅,擔擔麵,酸辣湯同埋牛肉湯水餃牛肉餅～外層夠脆又唔油一咬入去果然有好多肉汁d牛肉味又濃，好正，令人有encore既衝動擔擔麵～正如cheap野介紹，有腰果碎o係面，好特別又好味，但略嫌花生醬味不夠多酸辣湯～有好多料，而且酸辣味夠平均，不過如果可以多番ｄ豬紅會更正，35蚊中size兩個人飲，每人分到成五六碗呀！飽死！牛肉湯水餃～ｄ牛肉同牛肉餅好似一樣，雖然係咁，但都好正，一樣一咬就爆汁兩個人食都只係94蚊，食到飽飽又滿足咁走！

前排諗起好耐無幫襯過清真牛肉館﹐尋晚專程去食﹐一解對牛肉餅的相思。其實我亦承認﹐牛肉館除左牛肉餅同咖喱之外﹐其它並無特別出色的食物﹐當晚食左個牛三味﹐依然係牛肚最精彩﹐牛筋凍有少少硬。個榨菜牛肉絲湯就一般啦﹐榨菜做湯做得比呢度好的地方多的是。另外叫左個擔擔麵﹐呢度的擔擔麵我唔可以話好正﹐只可以話合我口味﹐花生醬味夠濃﹐蝦乾碎夠多﹐最正的係捨花生碎而用上腰果碎。入口有另一種香﹐未必人人中意﹐但我自己就覺得幾好。主角牛肉餅依然出色﹐整個餅都充滿湯汁﹐試咬開一個角﹐用羹裝住倒出黎的牛肉餅汁﹐睇下可以裝滿只羹幾多﹐居然係4次。因為汁多﹐所以個餅食落好香軟﹐佳品。服務依然係無咩服務﹐老店就係甘﹐熟客就有傾有講﹐生客就會以較冷淡的態度去對待。

聽聞已久的清真牛肉館, 終於係Friday nite 一嚐, 7:30 左右去到已經要等位, 後來waiter 話樓上有位, 咁咪上去囉. 嘩!原來係一條臨時既鐵梯, 又窄又斜, 我諗傾斜度是70 - 80 . 著住裙的我當時有點猶豫上定唔上, 最後為有頂硬上啦, 上到去先知係一個閣樓. Waitress 的服務態度好唔掂, 佢希望你快d 叫餸 , 一次過落晒單, 費事煩o個隻. 點了牛三拼, 咖哩羊肉, 牛肉餅, 白飯. 咖哩羊肉-- 有羊味和小小羶, d 咖哩好有咖喱味, 但唔覺得辣. 基本上唔係真係咁美味囉. 若言未試過, 不妨試下. 牛三拼(牛根, 牛展, 牛肚) -- 牛根爽口, 但味道一般. 牛展稍為乾了d , 無o麥味. 牛肚比較好食d , 好腍好入味, 不過唔係舊舊都咁有味. 牛肉餅-- 好食, 熱熨熨的, 真係超多汁呀, 而且個餡(牛肉) 唔"鞋" 口, 又唔覺好肥膩(我最怕肥騰騰的食物) . "正"!!! 記住千祈唔好買回家食. 我朋友試過買回家食, 點知一d 都唔好味

星期二,專誠到九龍城搵食,都有成年未黎過,所以今次早點入黎行下先,呢個地方,相信最多都係泰國食品,晚餐前,去左某潮式雜貨店買左兩個糕粿,又去左幾間大大小小既泰式雜貨店,買左幾款泰式小食和甜品之後,便向此小店進發~~去到既時間約七點半左右,都唔駛等位就有喇,要搭檯,不過地方唔係大,所以都預左啦,環境就好光猛,仲好似舊式飯館既格局.入到去都成九成半滿座,遲一步都可能無位囉!!看看餐牌,呢間店都幾特別喎,除了所謂的清真食品,似乎京川滬菜,才是這裡的主力,不管它,兩類也試試吧!!雞絲拉皮~~即粉皮,花生醬夠多,不過唔夠香濃,雞絲帶點”鞋”,粉皮都算滑,呢味一般啦!!麻油豆腐粉絲湯~~有大中小之分,不過叫時,伙計無問,我地有唔記得有分,所以都唔知來到的,是那個尺碼,呢個湯都唔錯,幾足料,除了主角外,還加入了莧菜(好像是),每人可分兩至三碗左右,份量都好足~~羊肉春卷~~嘩!!!呢個都好好食,單看外皮,已蠻有好感,一口咬下,卡嚓一聲,皮很脆口呀,好像吃薯片似的,而內餡,雖然不太吃得出有羊肉,但都很熱辣美味,我和友人也稱不絕口.至於今晚為它而來的牛肉餅,首回,我們先叫了兩個試吃先,頭一個,是另外兩位

第一次黎食飯,等左好耐位,到有位既時候,佢話樓上介唔介意,我話唔介意,點知行到去既時候,先知佢用黎上樓上既樓梯係一條臨時既鐵梯,條鐵梯又窄又滑,跟本無諗過要用條咁既梯上去食野,佢既所謂樓上,其實係一個閣樓,根本只可以擺貨,點會用黎招呼客人架,如果火燭樓上的客人一定走唔到,非常危險,小心小心, 食物方面,我覺得很普通,沒有特別吸引,如果下次大家有機會去食飯既時候,一定一定要座樓下,這店的食物絕對不值以閣下寶貴生命去搏.

我又係見到好多人話呢度既牛肉餅好味,所以專登黎試!不過我唔太鍾意呢度既環境,而且無其他野意食,所以係外賣,估唔到真係幾好味喎!係熱辣辣架!個皮有少少煙靭,但係表面又脆脆地喎!其實淨係個皮已經幾好食(反正我唔太好牛),但係我就估唔到真係咁多汁囉,所以食得好「呢hea」,而且d汁好鬼熱!食完我有少少滯,不過都算好味既!

聽左甘多次各位大讚特讚清真既牛肉餅,上星期六下午專登同老公去試下佢係咪真係甘好味!order 左牛肉餅,酸辣湯同醬牛肉湯麵,牛肉餅唔夠熱,不過就幾好味, 酸辣湯好多料, 但係過酸而辣又唔夠,醬牛肉湯麵個湯底幾好,不過d麵煮得唸得滯...食物唔太特出,唔知係咪我唔好彩,撞正個廚心情唔好呢?反而服務就出奇地好,唔知係咪因為下午茶時間, 唔係太多客呢?

牛肉餅真係無得頂,又多汁,不過小心燙親.咖哩羊肉有羊味,好辣下,點薄餅食,好正.真係要小心考慮上唔上二樓,所謂上山容易落山難,成70度有多的樓梯,落去真係好危下.阿姐落單時都叫我地唔好分幾次,因為佢行上行落都幾係野,最好一次過啦!見到佢擰住一個裝滿野的桶行落條樓梯,都替佢抹一把汗呢!

昨天去九龍城清真牛肉館,見識到什麼叫做貼錢買難受!話說我懷念那里的牛肉餅,千里迢迢由上水出黎,點知臨時有事無時間度食,唯有叫外賣,個收銀一聽到即刻面黑,俾完錢佢,立刻喝令我出門口等,等三個字都唔覺有人入單,問個waiter啦,估佢點答我呀?你等夠十五分鐘未呀?嘩, 今時今日咁服務態度,你話喇