清真牛肉館 (龍崗道) (已結業)

ok，坦白講，雖然要搭檯，但落單醒目上菜快手，已經無得彈，無野好彈啦。要彈就彈氣氛好急，餐牌無相啦。飲品得汽水同啤酒兩種揀都可以彈。食物就very good。由最簡單的羊肉春卷講起，一咬落去，有菜有肉，舊羊仲有少許肥，正正係食埋條利的代表作。牛肉餅，招牌菜，小籠湯包的別注板。食時小心熱。好彩蝦頭妹咬先，望見到煙，問聲熱唔熱，答熱，我就醒目喇。牛肉餅唔辣，但全牛肉餅，唔係山足牛肉咁有7成豬。正爆。咖哩雙寶，牛羊各1，只恨自已肚皮細。1碗飯兩份撈汁，好在蝦頭妹噤得住，如果唔係，3碗飯都碗底朝天啊。可惜的係…牛餅春卷如果外賣凍左一定無引。否則實買比爹媽試試。

第一次去都唔知應該叫咩食,所以order左套餐.有牛肉餅,辣椒煮牛肉及雞等. overall 食物好好味,尤其馳名牛肉餅.辣椒煮牛肉亦意想不到咁好味,相對個冷盤-雞就普通左D.好味就好味,不過之後成晚就好口渴!

16/05/2005 20:30記得兩日前來過，當時人山人海又正趕時間，所以放棄了。兩日後重回，可能時間晚了，不用排隊便可內進。店子不算大，坐得頗擠還要搭檯。賣的其實主要是北方菜，其"清真"兩字頗有誤導成份。店內貼滿了各式雜誌報紙的報導，其實我對這種自我宣傳方法是頗反感的，因為我始終相信有麝自然香，而且這些有不少是鱔稿，變相等於賣花讚花香，實在不得要領。講番食物，最出名的莫過於牛肉餅(每個$8.5)，甫坐下時待者便主動詢問是否一試，見牆上大部份的"廣告"都有介紹，當然要一試。另外叫了一碗酸辣麵($22)和一碟蜜餞雞($45)。牛肉餅果然名不虛傳，皮薄多汁亦有牛肉味，上檯時熱辣辣非常燙口。不過酸辣麵就麻麻，麵身過腍，酸辣湯材料足但味道太淡，不酸亦不辣。蜜餞雞只係普通煎雞扒，吃時醮上調稀了的蜜糖漿，味道好似格格不入咁，亦係麻麻。再加一罐汽水，埋單$93，幾貴。不過見到o的咖哩好似唔錯，而且都有好多人叫，下次會再黎試試，不過要唔駛等位先！

我同我細路去，叫咗咖喱羊肉同出名o既煎牛肉餅。咖喱羊好味呀，又唔辣。而牛肉餅係就係多汁，但係太熱啦，食咗一啖就漏汁啦，冇哂啲「精華」。牛肉餅都係好食在啲牛肉餡。如果要食牛肉餡，食牛肉餃食啲啦，因為似喺度食小籠飽。另外有食雞肉餃同葱油餅。雞肉餃好淡，而葱油餅一般啦！我諗我如果第日去九龍城都會再去o既。

牛肉餅同o架喱都幾好但係個環境好唔得!!!第一, d枱好迫, d櫈又坐得唔舒服, 次次食完都pat pat痛...第二,當waiter用條染有一撻撻鮮黃色既o架喱枱布黎抺枱時,真係見到都反胃...第三,當你小心的望真d碗筷時, 會發現d碗筷係有少少"白裏透黃"架!!

牛肉餅,無牛味, 煎到好香,麻油味香噴噴,好多汁,皮嫌厚左d,硬係唔明牛味呢...咖哩,少辣,唔香,無咖哩味...牛腩,唔腍夠你0趙...餃,厚皮...雲吞,好!

清真牛肉館...之前電視阿黃德如佢地講到好正咁~梗係要去拜訪下啦~~點知..唔...~___~""又等得耐~d人服務態度又差...尤其門口派飛仔o個個阿姐~>< 入到去~7點零咋嘛~已經好多野都賣哂~所以只叫了咖哩雞飯同牛肉餅~ 個咖哩...可算是食過最難食既咖哩~|||||| 得辣冇咖哩味~>< 成碗都係紅色辣油...d飯又硬...但個牛肉餅真係幾唔錯既~^_^!!d裡面d汁差唔多有2湯匙~!! 不過...要等半個鐘先有~|||| 個皮煎得幾好~d餡一般啦~唔會食左好感動o個d囉~~之前聽人講話有二樓..哈~~好聽d就叫樓上~難聽d..係閣樓~||| 最經典係上去o個條樓梯~!! 之前人地講到幾窄~點知...原來唔止係窄咁簡單...幾乎係..好似畫鬼腳咁呢~兩棟中間畫d橫線咁兒戲~...嚇死~~// 雖然係幾刺激...但如無意外都唔會再去~~3~~...

午飯時同事們有興致的到九龍城午餐, 牛肉館內客人不少, 幸好店中的大檯尚有三個座位, 先點了一個咖哩牛肉飯, 咖哩香辣討好, 牛肉亦偏腍可口但飯底可有點粗糙; 再來必要的牛肉餅, 味道比上次更香濃多汁, 牛肉色亦明顯比上次來得深色; 三併麻油雞牛展海蜇, 價錢比想像中貴, 麻油雞軟滑但略欠雞味, 牛展肉味香濃而且一點不韌, 相比起來海蜇表現最差, 刀法凌亂質感偏腍身不太討好. 服務方面不過不失, 幸好侍應們尚算有禮貌的對侍.

我都好認同呀．個度d service 真係差到冇人有..食野個時攪到我一肚氣，我覺得個亞伯真係勁趕客架..比$個時咁就一定企係比$個位等人收$架啦..佢係咁話我阻住佢喎。邊個叫你門口細WOR.閣樓條樓梯又斜..著裙一定比人睇曬既.收$ o個個女人又好似唔至在咁wor..等佢同完佢d熟客傾完計先捨得收$。個d 亞姐仲衰..對d客d態度差到oY!!好似話比你知你唔食仲有大把人食架..唔鍾意就走囉..咁!!野食係好味呀..但真係食得好受氣。

本人一向對好對食物及對衛生有要求,亦覺得這間清真店的食物ok,而最好食不是牛肉餅而是咖喱,所以都光臨過幾次.但無奈每次都有不愉快經歷.(一)等位:佢比張所謂的等位飛你,但次次都不是依次序入,鍾意比邊個入就比邊個入,同佢識立即入.絕對不公平.仲要你等齊人先比你入,又沒有講明(有過半數都唔比入)(二)收錯錢:吃咁多次.有一半次數都收多左十多元仲妢唔知咁"係咩.收多左咩"對唔住都無句(三)比陳年呀叔罵:到那店一定會見過那個陳年呀叔,成日罵d客.haha 你有無比佢話你左住佢,比佢唔比你入,仲問候你全家呢..如果你地話牛肉餅同樓梯係鎮店之寶..佢一定係趕客之寶啦(四)衛生差碗筷有好多水,仲見到有蟑螂在餐牌上及wall上.所以由今日起我一定以後唔會再去

唔知係唔係電視效應,琴晚六點半去到已經好多人等緊,到我食完走時候(大約八點)都仲係好多人等^_^ 所以如果要去,我唸早去又或者唔好揀週未啦~~牛肉餅就固然係鎮店之寶, 但琴日叫砂鍋津白真係好好味,湯好清好甜,食完咖哩同牛肉餅等濃味食品,飲返兩碗湯,真係爽^_^另外我都讚牛筋湯麵,麵都幾有咬感,牛筋整得好味,都值得一試架!!!

牛肉餅：雖然唔係好多肉汁，但牛肉味夠濃，”好”牛者必然覺得好食。砂鍋津白：湯底好似加上牛奶，初頭飲落還好，但後來覺得有些羶。好在湯料十分足。咖喱雞飯：咖哩比想象中辣，唔錯。

先事聲明，呢度所有食材都進行過宗教儀式的，有忌諱的請諗清楚先~講番正題，入去只係為左試下佢個牛肉餅，我appreciate佢真係即煎的，一咬落去，爆哂汁出黎，"辣"親個咀，不過係原汁原味既，ok咁啦..但係我唔會再去第二次...

去過兩三次...都覺得牛肉餅唔錯,係唯一一次唔夠熱,可能放得太耐,片兒湯覺得幾好飲,清清地,奶油津白幾好,反而d冷面就唔係咁好,醉雞一般,燻魚都唔錯,試過咖喱羊,我係本身食唔到羊,所以覺得都幾羶,但我d同伴就覺得好好食,我都覺得幾辣,可能叫牛會好d...仲有,依間野有閣樓架..上閣樓個條樓梯都幾嚇,勁直...我諗依家店除左牛肉餅出名,條樓梯都係依間店既特色啦..

牛肉餅幾好食, 牛肉很嫩，肉汁多而且鮮甜咖哩羊肉飯唔好，咖哩偏辣，羊肉骨多肉少，老而唔入味。牛肉粉皮一流。賣相五星級，牛肉味鮮，麻醬香，青瓜爽甜，仲有d 酸味好開胃。招呼一般，坐位不舒服。