極品煮意 鷄煲.烤魚.火煱 (已結業)

兩個人打邊爐，任食就最抵，全場任飲任食，就汽水都可以任飲兩個鐘除咗打邊爐，仲有少量熟食，有青瓜雞腳薯條魚蛋四季豆因為朋友食素，叫咗一個四季湯底全部都係菜全場有幾十款嘢食、食到飽為止，抵過散叫呢個價錢嘢食款式都算多，食物都吾錯可以再encore限時兩個鐘，每人百零蚊

係運動場同班跑友衝完圈，阻正天氣凍番，就去食火鍋。經侍應推介就點左個野菌酸菜烤魚煲，條魚仲可以轉其他魚，咁我地就轉左做鯇魚。整煲有２大條鯇魚，目測都成尺長，應該有３斤重。跟煲有肥牛，鯪魚滑等等免費追加，正因為叫左鯇魚煲，所以就冇再叫同鯇魚相關的食材。其實同酒樓打邊邊冇分別！只不過位置同空間都闊落Ｄ。汽水種類很多，分散在各個雪櫃～仲有啤，jolly sandy添！最後個煲係煮到好多粒丸，我地都幾左好多好多丸，今次真係大滿足，補充番Ｄ體力！

係公司做到好夜，都已經係11點後。約左班SISTER出來食野，咁岩公司附近有一間火鍋店，11點後都係$118 仲免加一，就同佢地過去試下。雖然係宵夜，但是食店的食物櫃材料食然仲有補給，不會是宵夜時段清埋最後的食材。今次簡左烤魚煲，成個盤一上來就有2條魚加配菜，超足料，湯底味道亦很足～～好好味～～我地攞左D豉油都無機會用！就因為足料，我們姐妹們都冇點樣出去加火鍋料，就因為要用第二個胃食甜品！甜品方面有糖水、jelly、涼粉，埋單時仲有一杯雀巢雪糕。個櫃差不多比我地掃哂咁制～～另外仲有蕃薯糖水，好似係低糖，岩哂我地！總體來說唔錯，因為交通ok方便，基本上一出葵涌廣場行2分鐘就到，座位闊落!坐得都好舒服。

經過既時候見到張傳單，覺得價錢都ok就上左去食la....岩上到去可能時間仲早所以好小客，但慢慢都坐到滿晒叫左個蟲草花椰子雞煲，雞都幾滑下。。食物係要自己出去拎，有d特別小小既野食就要另外加錢，普通火鍋食材都有羊肉勁大片，但好薄 ，夾落有d易散開但牛肉同豚肉都ok,幾嫩呢個牛肉就算浸左好耐食落個口味好嫩，好正仲有提供熟食，雞翼大大隻又唔會好咸，但有d油，，肥死la最後仲有甜品，涼粉，啫喱同西米露估唔到整得都ok,但西米露就稀左小小，可能比其他人拎晒

係葵芳打完波，就係格離有間火鍋雞煲，夠哂方便就腳！成班波友一齊上去醫肚。大家都話成日雞煲，一於叫個麻辣烤魚試下。中辣已經好香口惹味，而家條魚好大條，份量十足。烤魚仲有其實配料，粉絲，娃娃菜，豆卜等；索哂麻辣湯底既香辣味，正！！呢度d肥牛味道唔錯，可惜太薄，一夾就斷。如果可以厚d大塊d咁就完美嘞~雞子，好大粒，烚完都無點縮細，好鮮👍🏻要讚下響鈴同芋頭，響鈴炸得好香脆；芋頭切成條狀易夾又易食，口感夠粉，我中意！蔬菜籃都係任攞的，有生菜，油麥菜，西洋菜等選擇。任飲飲品好多選擇，見到都開心！成日都話，做好多好多運動，係為左食更多更多好西。哈哈！

天氣突然轉冷，男朋友話去打下邊爐暖一暖，我又想食雞煲就黎極品煮意試下可能天氣突然轉冷，來打邊爐的人也很多，大慨等了廿分鐘就有位厭倦左汁煮雞煲，就想潤潤地就點了蟲草花椰子雞煲， 除了雞煲呢度仲有烤魚，麻辣等湯底蟲草花椰子雞煲確實足料，雞很滑而湯十分清潤無限添加配料有美國肥牛，蒙古羊片，五花豬腩片等等，還有自助式的配料可以自己取，丸類，蔬菜等而特別值得一提是有花膠仔，女士們必定不要錯過小食前菜類味道也不錯，麻麻的十分開胃另飲品總類特別多，果汁，汽水，啤酒，應有盡有今次晚餐十分盡興，而且過了一個暖粒粒的晚上

天氣開始轉涼，同太太都好想打邊爐。今日喺葵芳行街，知道我附近新開左一間任食雞煲。所以就去咗試。雞煲叫左小辣， 份量都算幾足嘅任食嘅火鍋料料係自助式係出面拎，飲品都算種類繁多。而牛肉係寫order紙叫嘅。溫馨提示:牛肉上菜嘅速度唔算好快，想食嘅朋友提議可以早少少叫定。牛肉超級肥美除咗一般嘅火鍋配料，仲有不少熟食。。有:涼拌木耳，拍青瓜,炸雞翼,炸薯條,炸春卷,炸咖喱角味道幾好價錢抵食，下次都會再嚟。

有陣時兩個人無聊想打下邊爐又想食得多嘢，放題都係一個好選擇 。 見公司附近開咗間 新嘅餐廳，地方都好大。 食物櫃裹有好多款火煱配料任食 餐前小食同甜點都有好多款式 今日揀咗間雞煲半放題 形式， 雞煲 是沒有添食，但是配料有很多款式任你無限食，啤酒汽水 無限飲。 放題以外 ，還有一些海鮮和某些精選食材是可以共你另外附費order的 。 點咗個醉雞煲，酒味和藥材味香濃， 是一整隻雞上的 ，雞很鮮嫩肉滑， 呢個天氣涼涼地，很適合補補身。 食完醉雞 ，加湯後， 就可再加其他食物落去一齊拾下拾下 兩個人食唔到好多嘢 ，唯有乜都小小食下啦，配料款式都很多 肥牛， 鯪魚滑 ，脆鯇片， 是另外一張任點餐紙的， 每次份量雖然比較少， 不過也是無限任點的，唯有點多幾次啦。 雖然我哋唔係攞咗好多食物不過食下飲下野傾下計咁，不知不覺就已經好飽了…

任食雞煲隨處有，本應連燒魚煱都有任食，是可以一讚的，但服務態度真係不敢恭維。話說附近有美食展，特意去行個圈，但眼見小食檔人龍實在太長，唯有放棄離場，見到附近依間雞煲放題，即管一試，點知。。。整體食物不過不失，不過奉勸各位千萬不要在繁忙時間幫襯，不然好似我地咁貼錢買難受！全程由攞野食到執枱都係自助式，連倒骨都係一站式自己攪掂，明知個爐壞，gas漏氣都照比客用，帶位白衫大家姐就成為全晚全場極品，為求擠爆個場，樓下問有無位，答有，行左3層，上到去要等位，入座又完全無諗過啲客點可以響張蚊型枱打邊爐食雞煲，放左個爐同餐具之後就無位放食物，有人走，啲位無人坐，都唔肯比張寬落少少既枱人坐，食2個鐘，個半鐘就催人埋單，夠鐘即趕人走，試問今時今日依啲係咩服務態度？臨走仲要黑面送行，唔想做，可以一早答無枱，同場入座果幾枱唔駛咁淒慘，坐底叫左煱底無耐都不約而同講，可唔可以依家走人，極品無？

明白weekend較多人，無問題，等位無所謂，2人安排一小張枱，淨係個爐已佔半張枱！每次只可放一碟食物！同隔離張枱輪住跌野，同個侍應要求，希望後面張枱埋單後，分兩張枱比我地同隔離枱，侍應叫同帶位講，帶位話無辨法人多，但當時全場只有我地同隔離枱係2人只分配一張枱，其他都係2人兩枱，帶位仲要格硬張我地張枱同隔離合併，話好啲，傻的嗎？！連隔離3人枱都睇唔過眼，比佢地張枱少少位置比我地個爐放過界，帶位跟住又話比茶几我地，食到埋單都未見過囉！全程自助無招呼，連倒骨掉罐都要自己黎，差啲連gas都要自己換，完全無服務可言！差差差！

今日行過見到新開左間任食打邊爐，即刻挑起我條癮，上去試一試。一入到去佢問我要雞煲/烤魚定普通邊爐，因為我老公唔多食雞同魚，所以最後揀左普通邊爐。叫左個皮蛋芫茜湯底，牛肉，羊肉，豬腩片同魚就寫紙叫嘅，其他野食就自己出去拎嘅。牛肉黎到一份只得2片，仲要十分薄，魚肉好梅...其他食物款式算多，有雞肉，豬頸肉，各款丸，豬肚等。仲有熟食，有：咖哩角，雞翼，薯角，拍青瓜。仲有啫喱，涼粉，糖水。但佢d牛肉好耐先黎一次，仲要得2片，所以任食2個鐘其實唔太抵，仲要連加湯底都要自己去加。

收工落左葵芳買野+食飯, 不過自從商場番新過之後, 大部份食肆都幾貴, 所以行過一條天橋, 去左球場果邊搵食.  睇左一輪見有間雞煲火煱任食, 價錢都係百幾蚊, 任食2個鐘, 唔會唔夠飽.一坐低侍應就話可以揀雞煲或者魚煱, 除左有秘制雞煲之外, 仲有其他款式揀. 今日唔想食太濃味, 所以要左砂煱雲吞雞煲, 食過咁多次雞煲第一次咁食.侍應話食完雞煲就可以響自助bar隨便拎食物打邊爐, 趁個煲未到就睇睇先, 果然好多邊爐配料, 放滿兩大個雪櫃.砂煱雲吞雞煲黎喇, 雞件幾多, 而且好多都係肉, 肉質嫩滑唔鞋, 仲有好大粒既雲吞, 皮薄餡靚, 蝦夠爽口.而個湯亦幾清甜, 充滿雞既香味, 食落無炒果D雞煲咁熱氣.仲有任食既肥牛同豬腩片, 肥牛軟嫩夠彈牙, 豬腩片淥完唔鞋口, 肉味仲幾香, 薄薄地可以encore多幾次.因為雞煲本身都幾多, 再拎埋D丸呀, 腸仔呀, 年糕等等, 個幾鐘已食到飽, 埋單兩個人先300蚊, 真係好抵食, 下次黎食下魚先.

今日朋友收4點幾，約左佢行葵涌廣場行街買野，行左兩個鐘諗住食埋飯返去，朋友話想食打邊爐！新都會都好似西餐泰菜果d多，咁就係openrice搵到間雞煲打邊爐任食既，係球場附近！都好易搵，葵涌廣場二樓天橋就過到去！間餐廳係新開既，都好大好乾淨，有半自助影式，$138位都好抵食！我地早去唔洗等位～我地叫左個醉雞煲，成碟放入煲內好香既酒味特別要食鯇魚片，因為真係入口即溶，好好味肥牛都好味，有軟，好薄！一d都唔韌～另外獅子狗同白魚蛋都好好味，出面放題果d好硬好粉！但呢到既唔錯！場內好多飲品仲有酒飲，仲有雪糕同啫喱等甜品，可惜我同朋友食得太飽食唔落～

​ 聽朋友講葵芳有一間超抵食的任飲任食火鍋雞煲， 平時講緊出去食一煲雞煲都要二百幾蚊， E度黃金時間都只係＄148一位任食仲要雞可以狂加？ 就算荃灣好出名嘅一x堂同埋大x口都做唔到啦！ 一於嚟食下佢，原來佢係大家樂上面都幾方便， 裏面環境好大冷氣充足，飲品嘅款式比放題餐廳都仲要多， 飲品櫃都五個，仲有好多火鍋配料同埋熟食可以無限咁食，食到飽為止。 雖然同行朋友唔係好食雞，但係因為聞到隔離枱嘅香味最尾都係揀咗招牌雞煲。 入面有好多雞，雞肉質感都OK最主要是食招牌鍋底， 小小辣好香好好味，加埋有芫茜就更加正了。 有幾款食品是需要落單的，不過不需要另外收費， 包括肥牛、五花腩肉和羊肉，每一款只有幾塊，食唔晒的話唔好叫太多。 質素普普通通對得住價錢，反而羊肉味道比較突出，不過肉質都係比較鬆散。 之後就可以落配料，基本上配料沒咩特別， 可以話包羅萬有，豬紅就鹹香十足， 我就喜歡金菇，白菜和番茄，可以吸到很多湯香味！ 飲品梗係選擇韓國飲品啦，比較少見， 特別係粉紅色嘅忌廉溝鮮奶係好多放題餐廳都無！ 最後每人一個小型雀巢雪糕，食足兩個鐘食到飽。

新開業, 位置於葵芳~盛芳街，落天橋便見到。十分方便。座位寬敞坐得舒服，晚上8時入座，每位$148全包，任飲任食兩小時, 我們兩個人叫咗【招牌雞煲】小辣， 味道方面不錯，雞肉嫩滑，辣度可以。熟食方面，炸雞翼估唔到幾好味，春巻夠脆， 鳳爪炆得夠入味。【火鍋配料】款式多。肥牛脂肪分佈均勻，豬腩片可以。推介：雞肉，花膠仔，芋頭。【飲品方面】款式勁多，有汽水，韓式飲品，啤酒。【雀巢雪糕】味道有： 紅豆，芒果，朱古力，雲呢拿。糖水有： 木瓜雪耳，蕃薯糖水薯，不太甜，食到飽飽都食得落 ，哈哈！【總括而言】：任飲任食來講，這間任食2小時，火鍋及飲品款式比較多，價錢合理不算太貴，整體不錯！如不選擇【雞煲】可以選擇【烤魚】或其他鍋。另外可以自費購買特別或貴價嘅火鍋配料。待應態度良好，我下次會再嚟。