小確幸

营业中

休息中

呢間布甸店的人氣有幾勁？見到條人龍你就知！我朋友當日去到下午4點幾，前面已經有３０幾個人排隊輪籌，真誇張。5時派籌後，就不可離開隊伍，否則作放棄論。大熱天時，在路邊企１，２小時，絕不簡單，不中暑也偷笑。好不容易，等到6時，每日限量的布丁燒（布丁蛋糕）終於開售。我們的籌是3X，想吃原味或抹茶味也不能了，就只可吃朱古力味。終於買到了！店員問我們要自己開還是她開，我們想看了她的示範後，自己也試一下。其實，自己開也不太困難，小心一點不要把蛋糕上的圖案弄花就好了。這裡的布丁燒有原味、朱古力味及抹茶味，因為全人手製作，數量有限，不設預訂，所以想食的人都只好排隊。打開蓋，你便會看到布丁燒上有個「貓頭鷹」圖案。食法是怎樣？首先把布丁用碟蓋上，之後倒轉（即印有貓頭鷹的那面向下），然後拿著布丁左右上下搖搖，令布丁的焦糖滲到蛋糕部分，脫杯倒出。你會清楚看到布丁燒有三層：焦糖、朱古力布甸和芝士蛋糕。焦糖味不過甜，跟朱古力布甸融合一起，不錯。蛋糕其實是芝士蛋糕，入口濕滑，但不會很膩，確是不錯的！不過，如果3層來說的話，朱古力布甸的口感跟芝士蛋糕的口感就似乎不太夾，怪怪的。下次有機會的話，要試原味呢！只是下一次也

自問是個甜品控，偶然下班經過「小確幸」(當時還未被一眾傳媒廣泛報導)，又遇上其出爐時間，在一股好奇心驅使下，便嚐了第一口的布丁燒。他們的布丁燒分別有三種味道：抹茶、芝士及朱古力，都是用了上乘的材料。布丁燒由三層組成，頂部為焦糖，次層為布丁，底層為芝士蛋糕。它結合了布丁的香滑和蛋糕的鬆軟，有一種令人難以忘懷的味道。充滿香濃的芝士味抹茶味，是抹茶控必然之選朱古力味。三種之中最為美味。他們會在蛋糕上面烙印，既有製造焦糖味的效果，也造就一刻視覺享受。按著小店提供的建議食法，更有治癒的感覺。他們會提供小紙盤及食具，方便食用。為了保持質量，他們的布丁燒會於每天中午12時及下午6時準時出爐，每次限定200個，每人限買4個，售完即止。小店店員親切有禮，正不斷改善每日兩次的「人龍」管理，希望平衡食品質量和顧客的要求。希望此小店長做長有，為一眾甜品控帶來「小確幸」。

次次去小確幸都排長龍，今次終於食到芝士布丁燒！貓頭鷹造型好可愛，睇完就要倒轉了，只能相機食先！食的時候要倒轉食，底層焦糖，上面有乳酪芝士蛋糕，入口好滑，滿口淡淡的芝士味，作為飯後甜品一流！

早排IG已經見到有人講布丁燒，其實已經燒到我好耐～不過好怕周未假日人多，而且距離我家太遠，所以遲遲未試。難得返新工前有真空期，星期二一早就出發，經歷差不多2個鐘終於到小確幸～ 每日出爐時間係12點同6點，見好多人話平日早上11點半左右開始排，所以較定時間11點半到達，果然已經有人等緊，可能果日落雨較少人，我去到排第二～ 小確幸12點先開門，不過店主見已經有人排都早左10分鐘左右開，布丁燒有原味、朱古力同抹茶三個味，每人限買4個，我買左2個抹茶、原味同朱古力各一。小店好細心地俾埋建議食法說明、小匙同紙碟，當日未開始供貨保凍袋所以自備左一個，佢地都會提供冰包，就算我住得遠都唔怕～ 布丁燒大約2/3係布丁、1/3 芝士蛋糕，試哂3個味之後覺得最濃味係朱古力>抹茶>原味，有機會再食的話應該食原味先比較好。布丁好嫩滑唔會太甜，芝士蛋糕鬆軟，不過個人覺得可以再重味d；朱古力味應該大部分人都會喜歡，真係超濃郁！抹茶味其實可以再重d回甘味，不過已經比想像中突出，起碼唔係得隻綠色而無味；原味嘅芝士味可以再重手d～ 見過有人話唔值得特登去食，不過我覺得其實唔差，可以再去排～

因被某假期推介元朗尼間小店經常出現人龍，上幾個星期同J第一次去係下午4點左右，去到已經沽清要等18:00第二輪，第二次去大概11點45，去到店出面早已排滿人，問職員後得知原來係提早派籌，然後排隊購買，去過兩次亦買唔到，今日朋友經過有機會就買嚟試下。今日終於試食到布丁燒，其實唔算特別，一個賣$38 性價比唔高，預備出售嘅布丁燒非常有限，即使係平日一出爐好快就銷售一空，星期六、日店外更會排滿長長人龍。總結：媒體過於吹噓

佢呢個食得出個布丁真係好滑。另外佢下面個芝士蛋糕亦都好香濃，而且仲有少少濕潤，識落俾我似係食緊疏乎厘芝士蛋糕。而佢嗰焦糖漿食落都好有焦糖味。又布丁又芝士蛋糕又焦糖你以為會好漏？咁諗嘅話就大錯特錯，因為出奇地佢竟然唔係太甜架！佢絕對係一個令人哋好容易回頭再買過嘅布丁。佢個朱古力味真係勁濃，但係就係因為咁而令到底層嘅芝士蛋糕味一啲都唔突出。另外佢雖然叫做布丁燒但係小編覺得佢布甸嗰度比較似係慕絲嘅口感多啲。另外佢呢個其實係除咗朱古力味之外就咩味都食唔出。不過朱古力味真係好濃郁，朱古力控可以考慮吓！另外佢既焦糖味都唔係好出，應該係三個之中最弱。佢呢一個布丁燒睇落個層次就比較分明少少。抹茶味都幾香濃雖然就冇回甘，但小編覺得都合格。不過啲抹茶味蓋過咗啲蛋味，但都算係人之常情。即使抹茶味香，但仍然都可以食得出焦糖味同埋芝士味，三種嘅味道一齊放入口真係好好食呀！不過佢呢個布甸就比較挺身少少。注意：佢哋依家只限買4個。另外佢哋一日會有兩批12nn & 6pm，宜家仲玩埋派籌添，想試嘅就要留意啦！

小編已經悄悄地番左泥香港 仲悄悄地去排左最近元朗大熱布丁燒 十二點四去到 只係淨番朱古力口味 行慢兩步就差d乜都食唔到 所以要食唒所有味就要早過12點到啦布丁燒總共有三層：焦糖 布丁 同埋芝士蛋糕~朱古力布丁十分香濃滑溜 濃滑到有d似食朱古力慕絲既感覺 而且甜度適中 亦能食出奶香；芝士蛋糕都係高品質 夠晒香濃又夠唒綿密！三層一齊食就可以一次過體驗唔同既口感 不過可能朱古力味較濃 焦糖味道就唔係咁突出如果去到冇得食布丁燒既話 都可以試下佢地既布丁 都一樣高質！布丁好幼滑軟綿 雖然同樣叫布丁 但質地同布丁燒既布丁唔同 係比較稠 冇咁q彈~ 而奶味同榴槤味係5:5比 好榴槤既小編覺得榴槤味可以再重d 有d榴槤肉既絲會更正

將近5點既時候經過靜應應無人，原來想食既布丁燒要6點先開始限量發售，6點一二返去就見到咁既情景啦舖面好細，以可愛貓頭鷹作裝飾。約莫只有5個位，所以多數都係外賣，而且條隊都好快，等左約15分鐘都買到。內有一張說明書、膠匙、小紙蓋，原來係要倒出黎先，咁就去附近商場搵個位坐低食啦原味布丁燒面頭印有招牌貓頭鷹圖案，倒出黎既時候本來嚮底既焦糖汁留出黎，布丁滑嘟嘟震滕滕，切開好似分左幾層咁，一啖就滑落喉嚨，蛋味十足，芝士味較淡。自覺可以一試但朋友就話，唔值得排隊同價錢未免貴左d喎！

人氣爆登既小店，去到布丁燒又賣晒lu。不過見到尼款紫薯布丁作為紫薯控既我頂住檔先啦，下次先食布丁燒外賣一個番屋企，個袋都印有小店既logo，可見用心布丁同布丁燒都係老闆娘們手製的。個樽都靚靚無抱著期望去食，一食之下覺得驚喜係真紫薯味坊間愈黎愈多紫薯既製品，好多都係溝色素或者假紫薯味。尼杯布丁顏色唔係特別吸引，但食落就好堅紫薯味，如果布丁再滑d就更正

上次睇facebook見到已經想買，個時都仲未宣傳得周圍都見到。但個次我差唔多成7點半先去到，已經冇哂啦。咁今日決定11點9左右就排定隊。哇，可能係星期六加上近期狂宣傳既關係，去到都成10幾20人排緊隊啦，到差唔多12點個陣，有個店員姐姐出黎計人數，話每人限買4個，好彩早到佐，我之後幾個已經係暫定龍尾。但講真排得隊，大部分都係4個咁買。到我個陣呢，綠茶味已經賣哂，得番原味同朱古力味，咁冇法啦，只好揀佐3個原味1個朱古力味。個袋仔都幾靚既，仲有張紙教你點食用既。講番味道既話，原味真係幾好食既，幾香既芝士味加少少布丁口感。至於朱古力味就一般啦，覺得好似唔多夾咁既。至於綠茶味等遲d過哂熱潮唔駛排隊先會再試下既。始終價錢都唔係算好平。提一提大家，佢有兩次既出爐時間，假日最好就早少少排定。兩次既時間係12點同6點

作為一間賣布丁燒做主打的鋪頭，經常缺貨。 唔知係咪呢排宣傳得厲害，所以咁多人買。布丁燒每天只會分兩個時段出：1) 12:002) 18:00老闆話通常半小時內就賣晒。今次買唔到布丁燒，就試左兩款布丁，一款係：綠茶（$25) , 另一款係培茶 ($28).培茶好食d, 綠茶一般。但總括而言冇咩特別，同以往買開10-15蚊一杯的沒什麼分別，係個杯靚少少。唔知個杯有冇得回收呢？ 因為都幾唔環保。 如果有得好似牛奶公司咁按樽就可以環保d.可能今次期望高，總括而言覺得一般。

尋日下午1點已經落咗舖頭想買嚟試，點知賣晒，原來個布丁燒係分兩輪出爐的。第一輪~中午12:00第二輪~下午18:00今日早咗去食Lunch，終於買到喇，不過就淨返朱古力味同抺茶味，都買嚟試下啦!原本諗住佢細細個，一人一個仲驚緊唔夠食，點知我食到半個就食唔落LU，因為都幾”溜”吓!同埋唔知係咪網上評價得太好味呢，我同啲同事都太大期望，我哋一致都覺得嘛嘛哋!布丁燒分三層頂層係焦糖，但我食唔出，中層係布丁，佢同我食過嘅布丁唔一樣，我覺得似慕絲多啲，底層係芝士蛋糕，不過不失啦~PS~如果以朱古力味同抺茶味嚟比較，我覺得抺茶味好啲!

甜品這種東西，總會有一股魔法讓人快樂起來。儘管獨自一人，只要能品嚐到香甜美味的甜品，也可以擁有非凡的小確幸。面對多款的布丁與布丁燒，此刻的我心亂如麻，多番爭扎挑選那款味道才好。當然最好是所有味道都給我一次過吃，不過理智提醒我最多可以吃兩款吧。👉👈經過一番思量後，還是吃抹茶布丁燒與紫薯布丁。🙄 抹茶布丁燒單是名字與它漸變的色彩已經十分吸引我這個甜品控注意😄布丁燒並不是麵包布丁那種，而是一層芝士蛋糕及一層布丁所組成。牆上有掛著插畫與文字教學如何品嚐布丁燒，這教學簡單易明。薄薄的芝士蛋糕呈現淺黃色，柔軟滑嫩，上頭鋪著的一層抹茶布丁香氣濃厚，與芝士蛋糕完美的緊密在一起，既漂亮又可口。抹茶布甸口感軟滑，吃到淡淡的抹茶滋味，不甜膩之餘，味覺，視覺雙重體驗。不要看少紫薯布丁，雖然看似單調，但一入口卻驚為天人。布丁裡頭吃到不少紫薯的纖維，明顯的紫薯味且綿細得很。布丁柔順的口感，加上天然的紫薯香氣，不是說笑，真的好好吃。能夠吃到那麼不一樣的布丁，自覺上了天堂般的幸福。為了延種這幸福感，我又外賣了一個榴蓮布丁與紫薯布丁回家，跟媽媽分享這甜品的喜悅。

長假期沒有外出旅遊，留在元朗閒遊，在馬田路發現了一間新開甜品店，裝修很別緻，賣日式布甸pudding. 堂食約有4個位置，剛好我們進去時有人離開，我們就佔了吧枱位置，大部份進來的客人都是外賣，店員都會細心告訴顧客回家如果取出，怎樣吃，很貼心。我們叫了兩款布甸，原味芝士及綠茶芝士布甸，店員會細心將布甸倒出送上。布甸上部份非常滑溜，下面芝士蛋糕很香濃,有質感，不會太鬆。個人來說比較喜歡綠茶味，夏天吃感覺非常清新。其他樽裝布甸因為剛吃完午飯沒試，會再光顧的。總括而言，一間有心的小店。

小確幸-微小但確切的幸福，無錯，呢個小小既燒布丁的確帶來我今晚小小既幸福。我試既係原味同朱古力，首先跟著佢既指示紙做，每份燒布丁附上一隻紙碟俾你，倒轉搖一搖，布丁就會滑出來，焦糖即時佈滿即個布丁，成個過程都幾過癮，好似個布丁係我自己整甘開心。（當然係我想多了）味道方面我喜歡佢唔太甜，超滑，第一口入口即溶，滑到直入喉嚨，之後第二口第三口，好快ko一個，滑到無朋友，好好味呢！本身我係一個超級貓頭鷹愛好者，見到佢個貓頭鷹招牌入去睇下，諗住係支持下貓頭鷹粉絲，食完今次我諗我變埋佢既布丁燒粉絲了。