奇趣餅家

营业中

休息中

過年必做動作 - 去奇趣餅家排隊買角仔而家呢啲香港製造嘅鋪頭越來越少佢哋每逢過年就會現場即買即炸啲賀年產品拎上手仲係暖香口得來但係唔油用嚟送禮比老人家都好鐘意希望下次買到佢哋嘅燒餅啦

以前都唔會特別去搵過年食品 今日經過旺角見到奇趣餅店有好多人排隊，咁就一齊買埋一份， 半斤酥角又真係好香好鬆脆，不過要成一百二十蚊斤好似有啲貴，半斤笑口棗, 感覺上油咗少少 , 不過都係好味嘅 , 過年 一年買一次都唔算太過份。

又到小店系列,今次路經旺角,突然好想念雞仔餅,到你想食,先發現原來已經不是容易買到的餅吃一定要到這種專賣傳統手工餅既鋪先可以買得到數數手指,店家的歷史還比我老,當年未拎米芝蓮之前一樣咁多人食最出名係紅豆燒餅,新年會賣特色小吃,每日都排長龍好味就在於前鋪後工場,已經係香港極少有既餅店每日一盤盤新鮮焗好既就直接賣,老闆說會每日清貨,賣不完就掉全人手做餅,用料特選過,雞仔餅,好像改了尺寸,變得比以前更小巧,更方便食以斤為單位賣,一斤60蚊,半斤已夠吃2晚咬開有肥油,咸香甜咁複雜就係雞仔餅既獨特,全世界只有香港吃到多年沒到訪,老闆已換成後生的第2代但味道一樣無變,味道是回憶是真的奇趣餅家米芝蓮2019街頭小食推介旺角花園街135號地下

由細食到大的餅家，以前住九龍，長輩仲在生既時候，會係奇趣餅家既常客。奇趣餅家賣的都係懷舊小食，雞仔餅，牛耳，棋子餅，光酥餅，燒餅，西樵大餅等等。  而最鐘意既就係豆沙燒餅。煙韌𣇈口感，配上甜甜的紅豆沙，熱食滿有幸福感。怕紅豆太甜，都會有個無餡既淨燒餅俾大家揀，少少甜適合小朋友食。 通常我就會去開旺角做野必然會去買一轉，新鮮出爐就大約下午前點左右。唔好以為，好易買到，好多人都同你一齊等出爐架。仲有嗰度買野係要叫出來架，唔好等店員問你先講，你等得來就賣曬架啦~~~咁當然都係一個叫完到一個啦~~~唔係都唔知聽邊個講好啦~~~ 同埋要諗好買咩先，唔係既話會俾啲客眼望望架~~

好耐冇食奇趣的燒餅熱辣辣真係冇得輸皮薄又涵靚個皮好煙un，豆沙好滑（應該都用上唔少油吧，哈哈）表面仲有芝麻增加口感旺角鬧市買到傳統小食仲要係好味長期都咁多人有時多人到要排隊呢

我先唔講呢間餅店麵包嘅味道，我想講講佢鋪頭坐落嘅地理位置先，因為真係好難得，喺旺角最旺嘅地段，旁邊都係啲幾十萬月租嘅鋪頭地舖，呢間餅店喺呢條街上顯得格格不入，因為佢嘅裝修甚至可以用好殘舊黎形容😨加上佢買嘅麵包糕點價錢一啲都唔貴，我可以大膽推斷佢間鋪一定已經買咗，所以先唔需要擔心租金嘅支出，我另一個推斷就係佢嘅材料應該會好足料，因為相對於租金嘅支出食材嘅費用只係九牛一毛喺香港地燒餅好煙銀，特別燒餅外皮，好有口感好有咬口👍合桃酥，非常鬆脆，亦都唔會太甜👍所以話，如果香港啲租金唔係咁貴嘅話，我相信香港本地嘅美食嘅質素會更加更上一層樓

#紅豆燒餅 $5成日聽人推介依間嘅燒餅就等SFG試下究竟係咪真係咁好食啦🧐小編見佢擺喺枱 仲以為係凍嘅點知拎到上手 仲係熱辣辣㗎😍皮夠煙韌而且厚薄適中紅豆蓉唔會太甜 不過多返啲會更好😛評分:9/10

奇趣餅家，係一間旺角老字號既餅家，今次行過，就係食佢個豆沙鍋餅。一食就停唔到口，因為岩岩新鮮出爐，香口，個豆沙溶好濃味，如果問我香港有咩小食推介，除左魚蛋同碗仔翅，豆沙鍋餅實係必然之選。

奇趣餅家在不少介紹香港的旅遊書和節目都有報導。小店位於旺角的花園街，雖然店舖唔大，但所售的傳統中式糕點餅食形形色色，款式不少。在香港做這些傳統餅食的店已經越來越少，而這間老餅店有三十多年峽立不倒，而且受到米芝蓮的青萊，應該有一定的實力。紅豆燒餅十分新鮮，到手時仍然是暖的。燒餅外皮柔軟煙韌，表面還有炒香的芝麻，內𥚃充滿了滿滿的紅豆饀，味道香甜，真是真材實料，好吃！合桃酥大大個，入口極為香脆，完全不費勁的一咬便碎開了，而且帶一點旦香，甜香可口。鮑魚酥在坊間更是少見。鮑魚酥的密度比合桃酥高一點，同樣地入口鬆化脆香，加上層層的酥皮，香甜中帶有南乳風味，是十分傳統的味道。傳統小店在現今社會慢慢的絕跡，難得這家真材實料，真是要支持一下。

每次行過花園街經過呢間奇趣餅店，都一定要買返個紅豆燒餅食覺得唔買好似對唔住自己咁因為呢度每分每秒都係排緊隊，真係勁誇張，新年嗰排仲要係好難先買到野食咁啱今日經過又唔係好多人因為我媽咪好鍾意食呢度嘅燒餅，所以每次經過都一定會買俾佢食架$20有4個燒餅好抵食。每次都係新鮮出爐熱辣辣，新鮮出爐嘅燒餅煙煙銀銀配埋甜甜地嘅紅豆蓉，簡直係絕配呀，早知買多幾塊啦，4塊真係一啲都唔夠買得開心🥳媽媽又食得開心🥳

奇趣餅家，我真係細細個就聽佢個名，我每次經過花園街，都會買我最鐘意食既紅豆燒餅。紅豆燒餅個皮香口又軟，上面既芝麻絕對是加分，燒餅不會太甜，餅皮厚薄適中，真係食極都唔會厭。

每次行過花園街都總會去奇趣餅家買塊燒餅黎食下既，其實呢度有好多野買架，我成日都走會走黎買下米通呀，光酥餅呀，雞蛋餅等等，咁啱今日行過嚟嘅時候，話蛋撻新鮮出爐啊，成盤蛋撻仲吹緊風扇架新鮮出爐唔係唔買吖嘛於是買咗一打蛋撻仲要係我最鍾意嘅曲奇皮，兩啖就食晒個蛋撻好滿足呀，重點係熱辣辣好好食

傳統餅店係香港越黎越少,早幾日睇電視講開,今日咁啱去太子,就去幫襯一下啦未行到埋去就已經見好多人排緊隊攤子前滿滿都是雞仔餅、光酥餅、紅豆燒餅、核桃酥、牛耳仔、蛋散⋯等餅乾糕點睇完電視話燒餅係人手造,所以都食下先$20 有5個,仲有原味同紅豆味.仲要不停出爐喎,買左都仲熱架襯熱食,好軟熟,又唔會好甜,絕對可以支持下傳統餅店~~

一早約左裝修師傅去旺角睇裝修料，早左出到旺角，就行去奇趣餅家，小時候每次經過花園街，媽媽都會買呢間既燒餅比我食，令人懷念，而我對傳統既食物都好一般，好少食，除左燒餅同蛋撻！其實已經係屋企食左早餐，只係為食特登行去買一件紅豆燒餅，一如既往的好味，$5 一件，好平！咬落去煙煙韌韌既皮但又唔會痴牙，內裡既紅豆蓉份量好多，每一啖都有紅豆味，紅豆蓉有一點「起沙」既感覺，有少少似紅豆沙但唔係水狀，燒餅上仲有少許既芝麻，令到個燒餅更可口！下次再買！

成日經過花園街，呢間野都好勁人氣，咁啱見到d 椰tart 仔，好似召喚緊我咁，搞到我突然好想要。。佢既size 比平時食果d 迷你椰tart 大一半，不過都係的的骰骰咁。一粒原來兩蚊咋喎，估唔到咁抵食，仲以為會坐地起價。摸上手微微暖，應該都係出爐無耐。一食落去，個皮真係估佢唔到咁鬆化，好香椰絲，最重要係唔會好甜。食剩左個放起袋，好不幸鬆化得被解體了，呢間野有驚喜，下次會再試。