奇趣餅家

营业中

休息中

每次去花園街必定要買懷舊食品的名店！今次早上十時左右到訪，終於影到一張門外沒有人的相片！因為平時所有日子，店舖都擠滿人群，個個都搶購他們的食品！店舖食品種類繁多！就是我們兒時婆婆常常買回家的的光酥餅，香蕉糕、馬仔、等等！ 非常有童年回憶！而我每次必定會買燒餅，燒餅分原味和紅豆味道。新鮮出爐，熱辣辣即刻食！口感煙煙韌韌非常好味！仲有其他老一輩喜歡吃的唐餅，如棋子餅、牛耳仔、咸蛋散、皮蛋酥、鹹切酥、合桃餅、老婆餅、雞仔餅等等……我樣樣都想試...！🤣👍

前幾日突然掛住細個食過嘅懷舊中式糕餅，於是特登去咗奇趣餅家買返幾款經典點心，回味舊時味道。呢間老字號餅店主打傳統手工餅，款式多又有古早味。我揀咗雞仔餅、公酥餅同豆沙燒餅。雞仔餅外皮香脆，餡料鹹香微甜，入口有淡淡酒香；公酥餅層次分明，酥皮鬆化，唔會過油；豆沙燒餅甜度適中，豆沙軟滑唔膩，外層烘得微脆，香口又實在。奇趣餅家無論係包裝定味道都保留住傳統風格，令人食得出用心。依家好少餅店仲堅持做呢類古早味小食，難得見到，自然要支持。每一口都帶住記憶，係香港味道嘅縮影。

呢間1984年開業嘅老字號每次行過都見到門口永遠排緊隊，想慢慢揀都難😅【紅豆燒餅🥮】外皮煙韌軟糯，咬落去爆晒紅豆餡，甜度啱啱好，熱辣辣出爐嗰陣食，真係幸福到喊😭【雞仔餅🐥】南乳味超濃，夾雜住粒粒豬肉碎，鹹香惹味🤤‼️ 但阿姐話「一買就要半斤」，冇得散買 ‼️【光酥餅🍪】 👵阿婆嘅至愛！無豬油、少甜版，鬆化得嚟唔黏牙，配杯茶一流🍵📋 仲有 蛋散、 香蕉糕同鮑魚酥 等等傳統糕點，都係即製即賣‼️ 只收現金💵

位於旺角花園街的奇趣餅家，多年來專賣各款懷舊糕餅，而且價錢實惠，深受不少食客歡迎。每次黎親都會見到好多人排隊，有時候剛好有生鮮出爐的糕點，馬上會被搶購一空tim。奇趣餅家以紅豆燒餅最具人氣，餅面上灑有些少芝麻，外層糯米皮煙韌，豆沙餡份量適中且口感綿密，每件售價$5！另外餅家亦有香蕉糕、皮蛋酥、雞仔餅、西樵大餅、公仔餅等，種類豐富，本地或內地自由行朋友，經過旺角也不妨買來一嘗。可惜mini蛋撻已經停產，店家都唔打算再出，無得再食la~

態度極差！一副唔休做咁既態度！過年幫趁邊間都好唔好幫襯佢！佢話唔攞錢喺手唔好叫要咩喎！錢都攞埋出黎佢話睇唔到！要幫襯自己諗！隔離有個姨姨問幾錢，佢話數學既野係咁架喎要就比錢唔要就走！搞好啲態度先拍片叫人幫襯啦！唔係得你一間做！咁既態度人地都唔幫襯你啦！以前都ok啲既，幾年冇幫襯依家一副唔休做咁樣！同埋佢啲燒餅依家好難食，成陣油益味！唔係sale香港懷舊就得！你串串貢既態度香港人唔受架！留番你自己食埋佢啦！

每逢過年，家的老人家紛乎要食些店的油器。昨天到店購買時，只是問咗門外男店員一句，角仔幾錢，他用慣性的不悦語氣回答……你唔識自己睇架，此人的態度多年來沒變，礙於要完成老人家之要求，都有惠顧。到今日，要替另一位老人家購買，今次諗住向其他的店員購買，已經記好所要買的油器數量和計好價錢，向一位中年女店員購買，她用心算即時話440蚊，但我計好價錢是340蚊，即問她點計440蚊，她亦即時有反應話係340蚊先真。奉喧各位顧客，若不怕受氣或受騙，就不妨幫趁它吧。我已立下決心，永不錄用些店，出年老人家再提話要吃其出品，只有向他們講此店已結業。

經過花園街，諗住買燒餅食，奇趣餅家嘅燒餅出名非常軟糯，每次經過都會買五個慢慢食🤣🤣點知新年期間燒餅暫停供應，因為要賣賀年食品，既然一場嚟到，仲見到人頭湧湧，我當然唔執輸，買返少少試吓啦😆因為我唔鍾意食豆沙嘅關係，冇買到豆沙角，買咗半斤炸酥角，半斤笑口棗😜返到屋企，要即刻試一試先，笑口棗好有驚喜，係超級超級之鬆化，想過兩日再去買多一斤😝角仔外皮都酥脆，味道正常，不過餡料比較少，喜歡多餡的就未必岩喇！

光酥餅入口有蛋香味，唔會只粉味，口感軟熟。兒時係一個手掌size咁大，依家 一口 size 剛剛好，可慢慢逐個食。如果成份標籤知道糖佔有幾多會更好。紅豆燒餅見到仲係暖嘅，所以即時買了，嚟唔切影相就食左咯🤣😂口感軟糯，紅豆餡料唔會太甜，整體味道唔錯。女職員態度正常傳聞中態度差嘅…不在

本人喜歡懷舊食品 ，特別是香蕉糕。知道奇趣家餅家是老字號，所以對出品都有所期望。我就特意試了香蕉糕，價錢平民化。但嘗一口，我就非常之感到失望！ 咬一啖滿口砂糖，砂糖沒有溶化….感覺在吃砂糖…我覺得過分甜 。口感沙沙聲 ，吃沙一樣 ！

一名中老年女職員對客人態度極差，呼呼喝喝，基本尊重都冇，好像別人欠了她般在施捨別人，令人感到很侮辱，再好食也不會想再幫襯。看了評論，知道很多人也說另有不知老闆還是職員都是態度惡劣，已經不是一般的沒禮貌，甚至懷疑他們是否都有躁狂症🤔根本自己都控制不了自己的惡劣態度和行為😪基本都替他們感動失禮，如果做生意做得那麼躁狂憤怒，為什麼還要經營下去，那麼不想對着客人，為何要折磨別人折磨自己，倒不如把店關掉

好耐冇嚟買, 不過因為要買祭品，所以走一趟！四眼仔售賣過程態度極差…. 同佢講聲: 「唔要膠袋啦！」竟然回答 ：「唔緊要, 你俾錢就得啦！」早知睇咗評語先去買！ 年輕人, 奇趣招牌由你喪!

新年前諗住幫屋企人買酥角，早一日收工過去賣哂，見佢開8點又寫新年前照常營業，咪諗住朝早番工前去買埋，去到差唔多9點，個後生男士（據聞係而家老細）大大聲話10:00先賣，我都好聲好氣話我其實淨係想要角仔😢（佢已經有貨係度），就已經串串貢咁講話你咪10:00先番黎囉，我都仲笑住答左佢一句因為我要趕住番工啊🥹，然後佢竟然講一大輪野串人，又話你要番工，明啊，我明啊，咁我地都要番工既，下刪一堆字……(我冇聽佢講完我就轉身走左😮‍💨)真心，我係見開8:00我先特登行過去，我都唔係一開門就企係度，搞唔切啲貨我理解，但其實唔駛咁串係咪啊？🥺如果係解釋下點解未賣得，我都唔會晨早流流就打呢篇食評，但果句:咁你咪10:00先番黎囉，真心想問咩態度😮‍💨講番個角仔，我之前買過一次係幾好食(如果唔係我都唔會番工前突登過去買)，但係旺角不乏傳統餅店/好食既角仔，咁既態度真係好令人卻步，我都唔知係咪我小題大做，但一朝早就受啲咁既氣就真係唔係幾好受🫠🫠

奇趣餅家都真係食左好多年，基本上每次去旺角都會買！平時成日買佢地嘅合桃酥、鮑魚酥、皮蛋酥、紅豆燒餅同椰撻仔，不過最近一次去嘅時候，佢地話已經冇再做椰撻仔啦合桃酥 - 最鍾意嘅一款！好香，味道同口感都好，係我暫時食過最滿意嘅合桃酥，每次都忍唔住食曬成舊鮑魚酥 - 酥酥脆脆，鹹鹹甜甜嘅，比合桃酥痴口，但都唔錯！皮蛋酥 - 味道同口感都OK，入面嘅皮蛋唔會太細舊紅豆燒餅 - 亦都係幾鍾意嘅一款！紅豆餡唔會太甜，口感軟糯，暖笠笠，幾新鮮（強烈建議大家即日食完佢）另外蛋散同角仔都唔錯，都可以試下！臨近中秋節佢地仲會做月餅同棋子餅，用月餅皮做嘅棋子餅冇餡，較痴口，但奇趣餅家嘅棋子餅有幾個唔同嘅款色，例如佛公仔、豬仔、魚等等，其中嘅「佛公仔」幾得意，所以如果我個段時間咁啱去奇趣餅家都會買！

今日無意中經過呢間店，買咗佢嘅香蕉糕試試，可惜佢嘅香蕉糕只能講可一不可再。首先，聞不到香蕉味。其次，食入口死甜死甜，亦食唔到有香蕉味，強勁嘅沙沙口感有如放入一大匙羹白砂糖入口食，食完條脷都覺得乸乸地。佢都算係我食過數一數二唔好食嘅香蕉糕沒有之一。作為一間曾經係米芝蓮推薦嘅小食店，只能說很遺憾它不是我杯茶。

時不時都路過花園街，門口總是堆滿人群，都會買豆沙餅😀，暖暖的，軟林林，又不太甜，幾好食😋以前耐不耐都會買些蛋散，又香又脆🙂，但買最少份量都算大包啊，不停地食晒就有點熱氣啊😅，都會買馬仔回家食，少少林林脆脆的，少少甜，味道剛好😃前排路過，馬仔都不見有擺放出來，昨天見都放了十多包馬仔出來，45元兩包，心想都可放幾天的，就買兩包啦。剛拿一件來食，硬的😨，不脆😑，又沒甜味😳，為何質素跟以前的不同了？🥱，下次只買番豆沙餅算了～