兩三碗車仔麵 (已搬遷) 新店位置

下午大約三點半到，有3檯客，連埋我共4檯，我叫左幼麵加腩汁，魷魚頭，豬頸肉，豬大腸，雲吞和羅白，再加1罐冇糖可樂，共77元，少少貴，其中魷魚頭和雲吞都普通可以，豬大腸賣相好，夠淋但冇味，羅白切得比一般大件，夠淋但有渣唔甜有少少苦，豬頸肉好正，爽口易咬帶有肉汁，調味幾好，值得推介，幼面麻麻，感覺又係煮麵水唔夠熱，湯一般，最大問題係葱花有少少縮味，整到成碗麵一陣縮味，因為我自己係廚師，所以知道這種味不是代表壞左，而是處理問題，所以都冇投訴照食

我真係好鍾意食湯麵😬上左慈雲山，都係搵車仔麵。間既湯就正常，唔係重點。反而著手係d 餸度，每樣野都醃過炸過嚟。好似紅腸，好多麵檔都係就咁烚，或者滷水就算，佢係有煎過嚟，好香！ 而且厚切，目測應該有1cm 冬菇醃得夠味豬頸肉係佢招牌，醃得都夠香，香茅味有。不過呢個要加錢，都ok 啦， 豬頸肉比較貴嘅不過個雲吞就麻麻哋，個蝦唔新鮮，啲肉都唔香，成舊食落去都冇乜味道，食咗一粒就冇食啦佢都有麻辣菜譜提供嘅，不過我冇食。因為佢係放喺枱面俾人隨意去食，我覺得呢個時候咁做唔衛生，所以就冇食啦。

身為呢度嘅居民，梗係經常幫襯兩三碗，嗌佢哋啲送真係唔使手軟，唔止出面一個餸得兩三件，佢哋係好佛心咁比客人，加埋辣汁腩汁做湯底簡直係一流，眼見而家好多唔係慈雲山嘅人都，特登揸車過嚟食🤭

兩三碗車仔麵 · 慈雲山.行完山去到慈雲山打算search下有咩好食因為好肚餓 所以選擇左比較飽肚嘅車仔麵兩三碗車仔麵係慈雲山區都算係出名好食 而且唔貴😉.今次叫左：油麵三餸（魚片頭+蘿蔔+韮菜餃）湯底係腩汁 少辣凍豆漿Total都只係$47 .成碗車仔麵都好足料 每樣餸都唔少韮菜餃特別好食❣️而蘿蔔都好夠甜唔敢講佢係最好食嘅車仔麵店但係黃大仙區黎講真係唔差而且服務態度又好.有時星期六日lunch嘅時間經過都有比較多人排隊所以假期去食就要預多D時間啦

睇YouTube見到介紹，決定來試一試佢。麵底款式都幾多，除了正常會有的麵款，仲有其他較少有的瀨粉、銀針粉及台灣麵。配餸選擇也不少，亦有一些出面較少有的款式。三餸車仔麵普通三餸麵是$38，但叫左三款都要加錢的餸，分別是招牌豬頸肉(+$6)、墨魚春卷(+$2)及魷魚鬚(+$2)，麵底選了瀨粉，加埋野飲一共$57。豬頸肉表面燒得香脆，魷魚鬚正常水平。墨魚春卷幾特別，見YouTube介紹時是放在碗內的，現時已改為分碟上唔會比湯浸淋，即時改進值得一讚。湯底選了少辣汁，湯底正常無特別，配餸較出色。

兩三碗車仔麵成日都見到有人介紹呢間小名，我住附近，終於有一日行咗上慈雲山試下佢。 —————————————————————    今日叫咗好多餸，因為佢好多嘢都出名﹐雞翼，豬頸肉，雲吞同埋墨魚春卷。 雞翼好入味，瑞士汁好濃味但唔會太甜。豬頸肉呢度招牌，炸得好香，唔會太乾，好好食。雲吞就大大粒，好足料，蝦份量都好多。墨魚春卷都好脆，但係就油咗少少同埋冇乜墨魚味。—————————————————————  兩三碗車仔麵地址:  慈雲山毓華里55號地下5號舖

成日見有人介紹呢間小店🥸今次試完真係覺得佢好高質，每款餸都好用心去煮，絕對唔係就咁hea烚俾你😇而且份量激多，食到小編同朋友仔都攬住個肚走🤰🏻係個人近期食過最正嘅車仔麵🥰💛雖然地點有啲隔涉，但絕對值得為佢入慈雲山🤪三餸麵盛惠$38(每款再加$9)，小編今次同朋友仔各嗌左一碗三餸同四餸(因為第一次去所以嗌勁多😹)，當中最推薦以下嘅配料：🐷招牌豬頸肉 (+$6)好重香茅味，炸得好香口，而且油脂分布幾平均😋重點係份量超多，好似剪咗大半塊豬頸肉落去咁😨唯一要挑剔嘅就係鹹咗少少，但可接受👌🏻🐙墨魚頭 (+$2)雖然小編唔知墨魚頭係咩(因為都唔係頭)🤣但感覺就係魷魚鬚嘅粗身version，口感唔錯😚🐽豬大腸 (+$2)洗得好乾淨，滷得好入味😌同埋都幾多肥膏，鍾意食肥腸嘅朋友仔就記住要嗌喇😈🍄蠔油冬菇超大粒超厚身😱係平時喺盆菜先會見到嘅大舊冬菇😂而且索晒啲湯，咬落去好juicy😍🥕蘿蔔又係好大舊🤣食落清甜無渣，平衡返之前食嘅肉就啱晒🥬另外仲嗌左牛柏葉同香菇貢丸，味道正常，但就冇乜特別😗同埋大家一定要試佢個秘製辣菜脯，唔算太辣但好惹味🌶我哋每人起碼加咗三四羹🤩餐廳仲有得加芫荽，各位荽友就絕對唔好錯過喇

近排幾鍾意食車仔麵於是就上網睇下有咩推介見youtube介紹呢一間見得閒就決定去試下🤭中學年代喺附近讀書真係好多好食嘅小店經過咁多年好多嘢都唔同哂啦阿肥，榮記，文記都仲喺度😬我哋2碗都叫咗油麵，麵嘅份量好夠餸就要咗豬軟骨，豬頸肉同魷魚鬚豬頸肉話係必食，不過我覺得真係好普通豬軟骨反而有驚喜，雖然一大舊無切開不過炆得夠淋，用筷子🥢夾開都易嘅另一碗就要咗豬手，肥腸，雞翼同麻辣雞腎豬手得2細舊又無乜肉，伏雞翼同肥腸無特別麻辣雞腎另上嘅，味道ok，不過凍嘅撈返落碗麵度食好啲個人覺得碗湯偏鹹而且加咗香辣汁都唔香唔辣個湯望落已經唔太吸引餸又無乜特別，無下次啦😅

今日去慈雲山快食午餐太耐冇食車仔麵，去試試我叫左個咖哩豬皮、雞翼尖、南乳豬手配米粉$38三餸仲加左杯凍華田（加$9）總數：$47整體評分：4/5抵食：4/5環境：3/5

依間車仔麵檔係慈雲山都叫出名，啲餸嘅選擇亦都好多，平時都多人堂食同多人叫外賣我叫咗三餸，豬軟骨，韮菜餃，同埋麻辣雞腎，豬軟骨佢係一整舊，完全冇切開，我覺得切開成2-3舊會易食啲同方便啲而韮菜餃真係偏鹹咗啲，不過隻隻餃都好大隻，而且餃皮唔厚，但又唔會穿麻辣雞腎就分開裝，雞腎幾爽口，而且配麻辣都幾好味我麵方面要油麵，我外賣拎到返屋企都冇冧，幾好食，我亦都揀咗辣汁同腩汁，夠晒辣，成個湯都好惹味整體嚟講，鹹味適中返啲會好味啲

那個講唔正廣東話嘅阿姐態度極差，同餃子店實在差太遠。我每次都是叫外賣，但佢嘅態度令我唔想再幫襯！我今日又遇上佢，佢再次沒有令我”失望”。唔知佢係唔係老闆娘，如果係，我唔會再幫襯了！

每一日午餐都係同同事食 通常叫淨每日午餐都係同同事食 通常叫淨餸 牛腩 冬菇 墨魚春卷雲吞胡椒豬扒必叫 冬菇大大隻 好厚身 燜得好淋 豬扒都好大塊 不過水準唔穩定 有時好孩口 滷水雞翼冇技巧可言 淨餸會送三舊蘿蔔 可惜好硬 如果浸淋口感會好啲 湯底一定要揀柱候牛腩汁 另加少辣汁 最重要係加芫荽同蔥花 通常叫外賣 不過總有出錯 比漏左第二日一定補返 抵讚 不過而家唔再幫襯 覺得老闆好似急功近利左 加價加得快 加價加得多 又加得密 成日話成本高 不過似幫對面自己間餃子店吊命 希望老闆回心主意 始終係慈雲山

疫情下小店已盡辧法分隔枱給客人，外面依然排隊等位就知有好野食😍。 以前盡可能堂食因為怕餸會索湯。今次外賣有驚喜，老闆好細心有吸油紙分隔，此店名物豬脛肉正！必食之選還有沙嗲三寶，微🌶又入味，無得輸。仲有麻辣雲耳加雞腎又點小得呢!街坊價，食物有水準不往我山長水遠來見食🥰

星期日中午左右去食幾好唔洗等位, 直入就已經可以落單叫野食, 豬頸肉真係每次必點, 今次得2個人去, 如果唔係真係會叫一個豬頸肉小食黎食, 2個人食唔到咁多野, 所以都係唔叫個大份黎食, 因為仲要留食埋其他野

週末唔想出街食，於是用FoodPanda叫外賣送餐，之前一直想試下呢間車仔麵，好似話唔錯。今次送餐速度快，湯另上令到麵送嚟冇咁淋，唔錯，而且食物麵類選擇繁多，感覺新鮮唔會悶！三餸麵$62- 我選擇芝士粟米餃、瑞士雞中翼、豬軟骨、粉絲走蔥，香辣咖喱汁。咖喱汁辣度有勁，刺激！粉絲爽口彈牙，係我嘅最愛啊！芝士粟米餃被咖喱汁蓋過了味道，食唔出芝士味道，有啲可惜。豬軟骨大大塊，煮得入味。整體上三餸麵好足料，對得住呢個價錢，推介！- 家人則選擇南乳豬手、五香牛筋、麻辣雞腎、米線，香辣咖喱汁加腩汁。可能有麻辣雞腎嘅關係，呢碗麵更加辣，食到出汗，係鍾意食辣嘅朋友必叫之選！雞腎好爽口，高度推介！牛筋則炆煮到入味軟滑，好味！