酒鬼必试期间限定 新酒厂手工啤酒、小食配搭(有片)
2018-12-14

Beer geek对精酿啤酒(a.k.a 手工啤酒)应该有一定认识,大约知道主要分有lager、ale、IPA、stout等等唔同类型,而有间新晋嘅本地酒厂H.K Lovecraft暂时都系主力酿制lager。而就算喺lager呢个category入面,都仲有好多种,今次佢哋就联同咗4间餐厅合作进行Food pairing,畀大家可以一边食好西,一边饮酒,分分钟你仲会发现lager嘅世界比你想像中大好多。

Smoked Doppelbock x酥炸鹌鹑    Second Draft

唔少酒迷都锺意去呢间餐厅度饮酒食嘢,因为佢哋嘅嘢食水准真心高呀,今次仲特地为咗两款新酒设计咗两道新嘅菜式,讲明先,期间限定嚟,之後冇得食㗎啦。

常见嘅lager通常都系比较金黄色啲,但偏偏Smoked Doppelbock就呈深红啡色,酒体醇实,一入口系几smoky嘅味道,慢慢香甜嘅焦糖味就偷偷跑出嚟,层次系几丰富。而新菜酥炸鹌鹑先经过烟腌,而下面好似面包糠嘅其实仲混入咗谷麦喺里面,个酱都有啲烟燻味,所以配衬烟燻味重嘅Smoked Doppelbock,就好perfect池喇。两者相辅相成,各自嘅味道都提昇咗。

Vienna Lager则系起源自维也纳嘅lager,清爽中带有烘烤同焦糖味,口感顺滑。团队将日本柑、食用菊花等食材加入带子他他入面,配返清爽嘅啤酒,系会有种refreshing嘅感觉。但又为免成样嘢太清淡,所以又加咗啲辣辣地嘅四季红入去,刺激返下。

Second Draft
地址:大坑铜锣湾道98号地舖

Vienna Lager x 牛肉汉堡   无问题

讲到够chill,西贡海旁嘅呢间餐厅一定有份。你试下合埋眼,想像下自己拎住杯酒,望住个海,吹住海风……好啦,返嚟啦。介绍返先,呢度饮到嘅都系Vienna Lager,但连埋佢哋自家牛肉汉堡扒配苹果木燻烟肉及芝士一齐食,可能又有唔同嘅感觉。

上面讲过,Vienna Lager系一只比较清爽型啲嘅lager嚟,而呢个burger就相对比较浓味。块扒系自家搓制嘅,100%澳洲牛肉嚟,烟肉又用苹果木燻过,再加埋半溶美国芝士,大大份好足料。食落喺浓香嘅芝士味中,渗透住阵阵嘅烟燻味,块扒仲好juicy添,就连个bun都好软身,索晒啲肉汁。呢个时候,饮返啖啤酒,就可以减去汉堡嘅腻度,继续大啖大啖食。

无问题
地址:西贡惠民街2号海滨公园1号舖

Vienna Lager x 鸡翼配腐乳芝士汁    Tipsy tap

开业未够半年嘅Tipsy Tap,迅速成为一众beer geek嘅新蒲点。佢哋嘅水牛城鸡翼一向都好受欢迎。平时食嘅可能系湿身嘅居多,但佢哋嘅就系乾身版,皮够脆原来有窍妙,煎香完仲会放入焗炉度焗返乾。配嘅酱汁亦系坊间少有—自家调配嘅腐乳加蓝芝士!选用最淡味嘅腐乳,混埋有「鬼佬腐乳」之称嘅蓝芝士一齐嘅口感又几滑,咸香中带微辣。於是饮住带有烘烤麦芽味同焦糖气息嘅Vienna Lager,就可以中和返个辣度。

Tipsy Tap
地址:尖沙咀柯士甸路5号地舖

Helles x咖喱肠仔    Hoppy junction

第3款酒款要出场啦,Helles系一款德国风格嘅lager嚟,色泽金黄,口感轻盈、清爽,啤酒花嘅香气亦够鲜明,所以配啲清新或浓味嘅食物都容易夹到。

而呢间位於湾仔嘅酒吧餐厅,新开冇耐,主打本地精酿啤酒!呢度嘅咖喱肠仔,一款系牛肉肠,一款系纽伦堡肠,两款都德国肠嚟,肉味浓郁,就连个咖喱茄汁都系德国嘅,成件事好德国风啊~ btw,佢嘅咖喱汁香而不辣,同Helles亦好夹。

Hoppy Junction
地址:湾仔庄士敦道2-12A文熙大厦地下G号舖

文、相、片:Kar


关键字
尖沙咀
西贡
湾仔
大坑
手工啤酒
精酿啤酒
饮食潮流
开饭仔为大家发掘香港这个美食之都的最新美食资讯,分享饮食潮流文化。
餐厅资料
更多
收起
本月热门
【随时更新】便利店寻宝 每周新品速报
2019-12-30
荃湾新开无敌海景日式放题 占地过万尺 新张期间88折!
2020-01-03
【2019回顾】 过江龙之年 逾50间海外人气店登陆 + 2020年预告 (有片)
2019-12-30
迎接全新2020 1-2月下午茶推介
2020-01-06
【特约分享】新年去始创 食尽中、日、国际贺年佳肴
2020-01-13