两个人「撑枱脚」谂食咩菜嘅时候,如果怕少见嘅特色外国菜食唔惯,其实东南亚除咗香港人食开嘅泰国菜同台湾菜之外,马来西亚菜同新加坡菜都系好选择。去到以下餐厅,唔单止唔洗飞一转,而且唔洗夏日炎炎坐喺无冷气嘅熟食中心就食到正宗肉骨茶同喇沙等美食!
西环唔离地马拉菜 马来一菜馆
位於西环区又有米芝莲推介嘅酒店餐厅,担心定价偏高?但睇返Set Lunch都系$148加一,其实又未到离地。招牌之一槟城炒贵刁即系炒粿条,有啲似广式嘅炒河粉,不过配料调味就变成芽菜、鸡蛋同黑酱油等。呢间嘅胜在镬气够又香口。另外佢地嘅喇沙同海南鸡饭都系招牌嚟,钟意榴槤嘅朋友仔记得试埋佢地啲特色榴槤甜品!
大坑出色肉骨茶 肉骨皇
图:阿打
餐厅叫得自己做「皇」,当然系有返咁上下水准,招牌槟城香浓肉骨茶嘅汤头睇落几深色,闻落亦足药材香,不过饮落药材味道唔会过浓,容易入口。而且猪肉排煮得非常腍,易咬开,而且既保留到肉味又有药材甜味。配埋米粉同油炸鬼食啱哂,唔够汤嘅话仲可以请店员免费添!另外海南鸡饭同宜保咖啡骨都系推介。
鰂鱼涌香浓海鲜喇沙 随心
呢间小店主打新加坡菜,所以招牌海鲜喇沙亦系新加坡式嘅喇沙,虾膏同辣椒香味比较重。而且比马来西亚式嘅无咁重椰奶味,所以夏天食都唔会太腻,但香、辣、鲜味都有。值得加分嘅系配料够多:蛋、帆立贝、鱼片、蟹棒、鲜虾同豆卜。仲有麦皮虾、班兰叶炸鸡、沙嗲串烧等方便开心Share嘅嘢食。
更多【二人前指南】: |
湾仔车胎人推介马拉菜 莎巴马来西亚餐厅
至今连续三年(2015-2017)得到米芝莲车胎人推介,呢间以正宗马来西亚菜做招徕嘅餐厅自然唔可以睇小。精选菜式包括惹味又香喷喷嘅沙嗲串烧,同有浓烈香料味道又够入味嘅巴东牛肉。另外推介油松饼,香口松软,无论点巴东牛肉定咖喱都一样咁夹。仲有小店秘方炮制嘅炸香蕉都系必食推介!
新派马来西亚餐厅 PappaRich Malaysian Delights
呢间嚟自马来西亚嘅连锁店喺香港有中环旗舰店同铜锣湾分店,装修一样舒适好坐。餐厅糅合马来西亚嘅娘惹、印度菜同中菜风格,所以Menu选择亦相当多。例如有最啱相机食先嘅纸巾飞饼,香气诱人嘅虾面,重口味嘅咖喱鸡配椰浆饭等,就连黄金饭都有唔同配菜任拣。值得一提佢地嘅饮品同甜品都各有特色,好似三色拉茶同榴槤芝士蛋糕。
新加坡连锁Cafe 吉利尼
正如我地专栏作家小不啦叽1大口分享嘅一样,呢间嚟自新加坡嘅连锁餐厅比较低调,但无阻Fans捧场嘅。Tea Time想一边吹水一边食少少嘢嘅话,咖椰多士就啱哂,烘到金黄香脆嘅多士夹住香甜咖椰酱同邪恶牛油,分量唔大但食完够满足。记得饮埋杯美禄恐龙,冰冻香浓,而且杯上面仲有满满嘅美禄粉,饮得几慢都唔怕沟淡!
文:Cathy