粥粉面饭入面,你食边样最多?边样最少?通常好多人都系细细个就成日食粥,反而大咗之後就比较少。咁又系嘅,有几可你会约个饭局话一齐去食粥㗎?除非食粥底火锅啦。不过有时都会想清清地,食返一两餐粥嘅,今日就同大家推介5间粥舖啦。
生滚及第粥 生记粥品专家
呢间喺上环嘅粥舖,出晒名食生滚粥。每碗都系热辣辣煲好拎出嚟,豆腐嘴嘅朋友成日都要摊一摊先食到。呢度嘅粥煲得好绵,仲可以落埋秘制豉油同姜丝等,再吊一吊味,令碗粥再甜啲。及第粥超足料,肉丸、猪润、猪心、粉肠都有,包你食粥都会饱。
驰名鱼粥 新兴栈食家
锺意食鱼嘅朋友,就要嚟呢间食喇。呢度最出名就系食鱼粥,鱼嘅咩部位都有得食,包括鱼头、鱼尾、鱼咀、鱼腩、鱼云、鱼骨等等,而且系料多过粥咁样。鱼腩大大件,仲啖啖肉,成碗粥亦因为好多鱼嘅关系,相当鲜甜,不过有时就略嫌稀咗少少。
潮州海鲜砂锅粥 心夜来潮
图:Wildchildcarol、zoe_fooddiary
潮州粥又啱唔啱?呢间潮州菜餐厅嘅砂锅粥都好受欢迎㗎,食客可以自由选择自己锺意嘅食材,蟹呀、蚬呀、花甲呀、蚝仔呀,甚至象拔蚌、鲍鱼之类都有得拣,啲海鲜令到碗粥好鲜甜。而粥本身亦煲得好绵好杰,一啖粥一啖海鲜, 系丰富嘅。不过,当然,一分钱一分货,呢碗粥,唔平呀。
蚝仔肉碎粥 陵发潮州白粥
太子呢间粥舖,个个去都实会嗌蚝仔肉碎粥。啲蚝仔虽然叫蚝仔,但都好大只下,最紧要系冇沙吖嘛。又鲜又滑,一餐粥入面都有好多只啊,唔使惊话去到最尾得返粥水冇晒蚝仔而就住就住食。而落咗咁多蚝仔落去煲嘅足,唔使问,当然系好甜啦。
清甜南瓜粥 满粥
一般去粥舖,都会见到及弟粥、鱼片粥、皮蛋粥之类,呢间嘅粥就比较特别,连苦瓜粥、南瓜粥、窝蛋鲜牛粥都有。全部都煲得好绵,碗南瓜粥仲有好多南瓜蓉添。佢哋平时仲会定期派粥畀啲长者㗎,好有爱。
文:Kar