尖沙咀1881三间新餐厅一览 摩登中菜+轻法式餐馆+特色扒房
2020-07-08

香港虽然仍然受到疫情困扰,但系最近就愈开愈多新餐厅。好似位於尖沙咀嘅1881古迹咁,就一口气开咗三间全新嘅餐厅,有摩登中菜、有轻法式餐厅,亦有特色扒房。

摩登中菜   后园

新开嘅中菜厅,菜式选择丰富,集齐中国八大菜系,无论系广东菜、上海菜定巴蜀风味等都有得食,更邀得曾喺米芝莲星级中菜厅工作嘅陈其白师傅担任总厨。

点心款款精巧,卖相一流。好似粉红色嘅玫瑰虾饺,面层嘅一片玫瑰花瓣固然系点睛之作,但师傅嘅心思不可没。先以玫瑰花水浸外皮,再用玫瑰花腌虾,令到成粒虾饺都渗透住阵阵花香,创新之余,亦不忘虾饺包13摺嘅传统,皮薄虾爽。至於橙色嘅系麻辣浓汤小笼包,以甘笋汁为外皮上色,一啖食落去,除咗有猪肉嘅鲜香外,仲有刺激嘅川辣汁,锺意食辣嘅朋友仔必试。

 琼州胡椒饼、野菌素肠粉

除咗点心,餐厅亦有多款独门名菜,首推一定系味道香浓 、口感丰富嘅龙虾绵花泡饭。师傅会烘香只龙虾之後再煎一煎,然後再用大火熬9个字,令到龙虾嘅鲜甜同精华尽出。「绵花」口感软绵,系将带子肉酿入蛋白中,再等佢慢慢喺汤上浸熟。到上菜後,先至喺客人面前倒埋脆米,务求做到啖啖都有卜卜脆嘅效果。

 法葱黑松露脆皮鸡


轻法式餐厅  ODEA

法国菜一向畀人用餐时间长、摆碟靓但份量少嘅印象,不过呢间餐厅就有啲唔同。份量大大der,share都可以。而且感觉开扬光猛,仲有室外长廊嘅用餐位置,有如置身庭园中。餐厅由米芝莲星级名厨Calvin Choi主理,提供多元化嘅时令菜式。

讲到靓,一定系好似一朵花咁嘅红菜头油甘鱼配香槟啫喱。底层嘅油甘鱼他他好鲜爽,面头嘅香槟啫喱亦有淡淡酒香,平衡有致。而薄切嘅生牛腰肉薄片配山葵萝卜,阵阵咸香。

使用多款摩洛哥腌料泡制嘅摩洛哥风味烤鸡,煎香後加入西班牙橄榄油、酒、醋等再煮,皮脆肉嫩,juicy得嚟啖啖都充满浓郁香料味。

最尾必食甜品,特别推介朱古力梳乎厘伴云呢嗱雪糕,记住唔好摆咁耐先食呀,会塌㗎。朱古力味浓香,口感松软,食完好满足!

特色扒房   The Steak Room

即将开业嘅扒房,云集咗前星级酒店集团扒房嘅团队,主力提供多款来自世界各地嘅牛肉,更有坊间少见嘅朱古力和牛,并奉行「从农场到餐桌」嘅理念,牛魔王要bookmark定了。

想要餐全牛宴并冇难度,先嚟一份牛肉他他。肉质嫩滑香口,配埋自家制嘅薯片同芒果酱,零舍开胃。

主角当然系烤牛。Mayura Wagyu朱古力和牛,牛魔王冇可能唔识。由南澳进口,系100%纯种和牛嚟,而且更以朱古力饲养法养大,油份比一般牛肉更重,肉味亦比一般澳洲牛肉更香。



地址:尖沙咀广东道2A号富卫1881公馆主楼

文、相、片:Kar

关键字
尖沙咀
中菜厅
牛肉.法国菜
新店直击
走在最前线,为大家搜罗及报道有关新开餐厅的资讯。
餐厅资料
本月热门
2021及历届米芝莲香港澳门指南完全版
2021-01-27
情人节爱意满泻 甜蜜蜜堂食/外卖下午茶推介
2021-02-01
【随时更新】零食速报 每周新款零食、酒品点评
3天前
日本吉列牛排店京都胜牛进驻铜锣湾 黄金六十秒炸法 推介京都胜牛三味套餐
7天前
楚捻记新line!荃湾新开饺子店 必试黑松露什菌饺+香煎潮汕韭菜粿
2021-02-10