【虎年开饭】创新蟹粉糯米糕 限量陈皮萝卜糕 18款特色贺年糕品一览
2022-01-19

虽然唔知新年有冇得出返街食团年饭,但年糕都系要食嘅,惟有希望食完年糕,虎年事事顺境,步步高陞啦。今年有好多贺年糕品呀,除咗传统口味外,亦有黑松露、陈皮、野生花旗参伯爵茶,甚至蟹粉等食材,都可以用嚟制作糕品,认真够突破。

上三两  蟹粉糯米糕

呢间以蟹为主题嘅专门店,够晒创新,居然谂到将蟹混入糕品中,首创蟹粉糯米糕!团队花咗超过3个月研究,以自家调配嘅蟹粉入馔,蟹肉同蟹膏嘅黄金比为3:7,一半混入并喺糯米糕内,糕面亦再洒上另一半份量嘅蟹粉。原粒糯米吸收咗蟹油,啖啖都系甘香蟹鲜,够晒特别。佢哋另外有黑松露萝卜糕,都系香气浓郁呢。

Feast 手制椰香班兰年糕


一向以提供一站式到会服务嘅Feast,贺年糕点都充满诚意,无论系黑松露萝卜糕定系椰香班兰年糕,都系手制。前者用上约60克黑松露酱炮制,非常足料,萝卜清甜,香气层次分明;後者以新鲜班兰叶同椰子水制成,口感软糯烟韧,兼有淡淡班兰同椰香,洒埋香脆花生糖碎同椰丝一齐食,口感更丰富。

Little Bao 大紫芋头糕

以原创「中式汉堡」小包包为主打,一向都主意多多嘅Little Bao  ,今年推出咗2款糕品,分别系大红萝卜糕同大紫芋头糕,颜色大胆鲜艳,异常吸睛,食材同口感亦交足功课,其中萝卜糕有别於传统,特意选用三兴隆玫瑰露酒腊肠、日本干贝、日本香菇干、泰国虾乾、有机葵花籽油,再佐以龙舌兰花蜜、海盐同柚子皮制作;而芋头糕则以冲绳紫薯为主打食材,另加入泥浦芋头等,口感软糯。

皇玥 年糕礼盒

由前5星级酒店同米芝莲师傅创立嘅品牌,今个新春首次推出年糕礼盒!包括黄金糕同黑糖年糕,两款都系用传统石磨将香米磨制成质感细腻嘅米浆,保留返香米原始香甜同风味。黄金糕咸香味浓郁,仲有粒粒咸蛋黄,烟韧弹牙;而黑糖年糕加入姜汁令黑糖香气更突出。

营致会馆 全新椰香红豆锡兰年糕

呢款全新嘅椰香红豆锡兰年糕加入锡兰红茶,一入口散发醇厚茶香,混入象徵吉祥好运嘅红豆,清甜不腻,食多两件都无问题。

香宫 日本黑糖柿乾年糕

全新日本黑糖柿乾年糕以冲绳纯黑糖制成,黑糖味够晒香浓,加埋日本杮乾,两者结合甜味清而不腻,年糕口感仲好软糯~

唐人馆 赤崁糖有机紫糯米鲜椰汁年糕

唔嗜甜嘅朋友呢款糕点就啱晒。特别采用来自台湾赤崁以古法炼制嘅黑蔗糖,甜味自然,更以新鲜纯椰汁代替水分,令糕点清新带椰香。

龙景轩 全新洋金菊茶香马蹄糕

以洋金菊茶入馔,大厨以85度水温冲泡茶叶,过程同时间掌控相当严谨,确保茶味甘滑醇厚、浓淡均匀,令传统马蹄糕味道更清甜芳香。

皇御园 紫米马蹄糕

加入紫米嘅马蹄糕你又食过未?马蹄糕清新爽甜,加入富含抗氧化花青素及膳食纤维嘅紫米,令香味层次更加丰富。

宽巷子 鲣鱼汤如意腊味萝卜糕 + 平安马蹄糕

餐厅同艺人黎诺懿合作推出嘅糕点~ 腊味萝卜糕今次唔用鸡汤,转用鲣鱼汤制作,再以优质白萝卜配瑶柱、惹味腊肉、腊肠同虾米等,既食得到萝卜鲜香味,亦有阵阵鱼香渗出,蒸又得煎又得。而平安马蹄糕就系今年全新推出嘅,集清香马蹄味同爽脆口感於一身!

文华厅 x 大师姐 限量远年陈皮萝卜糕

由酒店行政总厨黄永强师傅同大师姐麦丽敏女士共同推出嘅限量远年陈皮萝卜糕。加入新会15年嘅陈皮,每一啖都散发柑橘陈香,带有淡淡甘甜。

Green Common 南瓜姜黄红藜麦燕麦奶年糕

人气推介「黄金满Oat」即系南瓜姜黄红藜麦燕麦奶年糕,系同英国品牌Minor Figures合作,以轻盈燕麦奶制作出全新配方,低脂又健康。

帝苑轩 日本萝卜牛肝菌素糕

特别为素食人士而设㗎!选用日本大根,萝卜味重又清甜多汁,再加入云南牛肝菌,菇菌香气好突出。最後加埋炒香过嘅黑木耳、冬菇同榨菜,有口感又惹味。

国金轩 黑松露纯素山药糕

纯素人士重有另一款选择——黑松露纯素山药糕,以意大利黑松露牛肝菌酱、香菇粒同鸡髀菇粒制作,菇味香浓,加入山药同沙葛口感仲丰富咗。

老行家 X LHK Doux Cadeau 野生花旗参伯爵茶年糕 + 珍珠粉绿茶红豆糕

野生花旗参伯爵茶年糕带有人参甘香味,配上茶香浓郁嘅伯爵茶,呢个配搭又几有惊喜;而珍珠粉绿茶红豆糕加入100%纯珍珠粉制作,另外重有绿茶、红豆同烟韧麻糬,估唔到食糕都可以养颜。

ate18 芫茜萝卜糕

呢个本地90後创立嘅品牌推出芫茜萝卜糕,标榜由⾃家⼯场全⼈⼿制作,无味精、无防腐剂、无添加剂,好似屋企食到嘅味道咁。芫茜萝卜糕更喺萝卜糕粉浆内加入⼤量新鲜芫茜,唔单止闻落有芫茜味,食落更系啖啖芫茜香,同萝卜嘅清甜味好夹! 
 

奇华 x LINE Friends 孖装年糕礼盒

锺意卡通系列又点可以唔买LINE Friends年糕礼盒,包括BROWN「亚嫲糖年糕」同CONY「椰汁糖年糕」。前者以泰国出产嘅上等优质糯米生磨米浆蒸制而成,口感烟韧细滑。而後者则混入咗清香嘅椰汁,甜而不腻。

恒香 x 轻松小熊 年糕礼盒

呢间饼店今年同轻松小熊合作推出5款产品,糕点系列有蔗糖年糕同椰汁年糕,前者甜味天然醇厚,後者椰香四溢,重点系好可爱呀~



文: Yanica
编:Kar



关键字
新年
年糕
萝卜糕
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【随时更新】零食速报 每周新款零食、酒品点评
5天前
【2022生日优惠】持续更新!5月寿星+指定月份补祝生日 叹火锅78折起
2022-04-29
晚市堂食恢复!最新酒店自助晚餐一览 低至78折、龙虾/海胆主题
2022-04-20
好消息!6间老店/人气小店 结业重开
5天前
8大必试片皮鸭!超平$178/只、特色北京填鸭三食
2022-04-27