fantastictat的個人專頁

朋友搵咗新工 就話請我食飯 咁就係佢公司附近搵咗一間食辣嘅鋪頭 估唔到樓上舖都有啲咁特別嘅美食！！！入到去都幾多客人 整體嚟講都算幾簡潔 算乾淨 餐牌入面 午市就可以揀想食啲咩 但係晚市就係由老闆安排 本身我地都擔心嘢食會唔會唔啱自己口味 但係嚟到嘅都係比較普遍傳統嘅川菜 所以都可以 等咗一陣就有嘢食啦！！！「一嗚驚人」口水雞個味道偏濃 而且佢嘅辣唔係淨係得辣油 而係有好多香料喺入面 面頭又有好多辣嘅醬料 配合埋芝麻同花生 帶出到個辣嘅香味 做頭盤係幾開胃既 而雞肉就幾嫩滑 骨唔算太多但係都有啲細骨 雞皮就冇乜油膩感 咬落同個辣汁撈埋好香口 好醒胃！「各取所需」水煮魚一嚟到就聞到好大陣辣油嘅香味 唔算好嗆鼻 但係個麻味好香好濃 入邊有魚頭 有魚鮫 亦都有魚柳 我自己本身鍾意食啲冇乜骨嘅 所以有魚柳喺入面就好啱我口味 而朋友就鍾意食啲有骨嘅魚肉 所以大家各取所需 成碟餸好啱我哋食 水煮魚入面個魚肉亦都好嫩滑 除咗魚之外都有金菇菜喺入面 令個餸唔太單調 食下魚肉又可以有蔬菜配搭「秀外慧中」四川臘肉炒花菜係全晚較為清淡嘅餸菜 臘味唔算好強但係聞落好香 係臘肉嘅香 而唔係麻辣嘅味道 所以同前兩份餸菜嘅感覺好唔同 臘肉咬落除咗有淡淡嘅油脂香之外 亦都有一陣鹹香 花菜炒得好軟身唔算太硬 咬落亦都有少少嚼頭 花菜吸咗少少臘肉嘅味道 同埋少少辣油嘅味道所以味道同口感算幾豐富！「錦上添花」最後嚟嘅四川涼麵係全晚嘅畫龍點睛 貌相非常吸引 我地將個涼麵攪拌好之後 好大陣麻辣嘅香味即刻飄出嚟 撈埋青瓜食好爽口！ 而且涼麵真係有過冷河 凍冰冰嘅涼麵撈埋辣油食非常之香口 而佢個辣味係入口唔算太辣 但係入口之後辣味慢慢滲出 令你個口腔同埋喉嚨都感覺到嗰陣麻辣嘅味道 好有層次 食完即刻要飲啖水！成晚嘅感覺非常好 而店員嘅服務態度亦都好友善 不停為我哋斟水 加水 又問我哋嘢食啱唔啱口味 好親切！ 下次有機會一定會再去！！！…查看更多

今天去左中環度食飯，平時自己都鐘意食日本菜，不過廚師發辦都係第一次。一入到去就聞到好香既綠茶味，充滿日本既味道。餐廳座位唔多，而且我地附近全部既客都係講日文，可能呢間餐廳係日本都好出名！今次係朋友介紹，所以等佢同經理傾好之後就有得食喇！（其實實際有咩食我都未知嫁！哈哈！）前菜黎左三小碟：菜之花配昆布，菜之花鮮甜、多汁當中帶有小小芝麻香，好開胃；宮魚涼涼地，有豐富既魚肉甜味，有陣微香，亦有小軟骨，魚肉當中亦有魚籽，有咬口；希靈魚籽配木魚碎，魚籽脆口，帶小小咸味，同木魚味好夾；炸鰻魚魚苗，脆身，易入口，係一道開胃菜，炸魚苗可配柚子醬，配搭清新。整體黎講，成份前菜都好開胃！ 左口魚配辣蘿蔔蓉、青蔥、酸汁左口魚可以捲住黎食，蘿蔔蓉小辛口，蔥好香，酸汁亦好醒胃。整個組合好有條理，食落有層次。北海道蟹肉蟹肉鮮甜、多汁，中間亦都有蟹膏，配埋薄薄一片青檸，做到提鮮既效果。鰹魚咬落係意想不到既脆皮魚皮，好香口，而且魚味鮮，食果陣亦都唔會有筋。魷魚頭配鮟鱇魚肝魷魚頭入面有滿滿既魷魚卵，個外表似小米粒，咬落剝剝聲，但又唔腥。鮟鱇魚肝入口即融，面頭有小小柚子，成個感覺清新哂！拖羅毫無懸念重油脂感，係口腔果陣，佢果陣油香完全佈滿成個咀，又做到入口即融既效果！飛龍騰呢款蒸物個名好特別，當中既蝦肉真材實料，配料春筍有咬口，食苫唔會話太腍，而且吸到湯汁味。湯汁鮮甜，不過唔太多，店員亦有細心提我地可以飲埋啲湯汁，好體貼！鯛魚佢係入面放左芥末，不過唔太多的。肉質呈挺身，特別欣賞壽司飯，經過調味之後帶微酸，同魚肉好夾！日本貴族魚 一夾起已經聞到陣焦香味，咬落個質感似蟹肉，味道唔太濃。魚肉面頭仲加左特製醬汁，豐富左個層次感。三文魚腩同青蔥蓉夾得幾好，雖然蔥味濃，但都冇喧賓奪主，搶左魚肉既油香，恰到好處。春子鯛配埋酸汁，幾開胃，佢既肉質偏厚實。有別於三文魚腩。池魚肉質咬落已經覺得非常新鮮，醬汁處理得岩岩好，面頭既芝麻碎昇華層次，唔單止係有麻香，放入口果陣亦有軟硬之別，好欣賞！迷你丼配拖羅雙色呢個組合係我成晚最鐘意既！海膽同三文魚子一啲都冇吝惜，每一啖都食到呢兩樣野既鮮甜。海膽冇腥味之餘，亦有淡淡既甜味，好高質！三文魚子亦係粒粒飽滿！而拖羅雙色都冇任何問題！幾近完美！經過火炙既拖羅油脂感更強！未放入口已經好香！大蜆清湯與海鰻配玉子蛋味唔太濃，而且腸住佢個貌相黎食，真係似食緊蛋糕，中間部分非常鬆軟。海鰻好香，面頭帶有小小焦味，咬落冇骨，肉質厚實，唔會太薄。清湯真材實料，蜆肉粒粒分明。水果甜點士多啤梨好甜！大大粒！完全冇令人失望！最後，值得欣賞既係，店員對客人非常貼心！只要一見到我杯茶有飲過，或者涼左小小，就即刻幫我換過杯，將茶既熱度保持最高，唔好比客人飲「涼茶」，呢個位置真係好令人欣賞！唔係間間都做到！…查看更多

今日喺銅鑼灣行完街，行下行下就到咗灣仔，隨便行就入咗呢間拉麵鋪嗰度食，估唔到小店都有驚喜！呢間係名副其實嘅小舖，內部座位唔多，間隔亦都比較樸實。檯面有水同埋水杯畀顧客自己斟水，又有少量調味料，一切都好簡單、貼地。餐牌亦簡單！最後我點咗呢一份辛辣味噌湯底拉麵，黎到嘅時候見到面頭嘅蔥非常之豐富，青白色同個湯底好襯，食慾大增！佢嘅辣味好香，但唔算太辣，配合埋味噌，好易入口。湯底唔會話太鹹，但好濃郁。麵條咬落有彈性，同埋好掛到汁，連埋湯底一齊食啱啱好！半熟蛋蛋黃仲係呈流心嘅狀態，外面有淡淡嘅酒味，好香，就咁空口食都覺得好過癮，連埋個湯底有少少辣嘅感覺，更加可以豐富層次感！最後叉燒好大片，物超所值！脂肪分佈好平均， 唔會話太柴，咬落亦都好彈牙，好軟熟，唔黐牙！估唔到小店都可以食到咁出色嘅拉麵！分分鐘好過好多大型連鎖拉麵店！…查看更多

好冇食過北京填鴨，咁啱今日朋友請食飯，我哋就去咗食呢間餐廳啦！店員好熱情，就算我哋冇預訂，佢都畀咗一個近海邊嘅窗邊位畀我哋！值得一讚嘅係，呢度嘅餐牌真係影得好靚，而且好有格調，未食已經好有期待感，流曬口水。「打響頭炮」口水雞同粟米羹係第一道菜，都算係一道開胃菜。口水雞味道偏香辣，而且好有芝麻醬香 味。咬落啲雞肉好嫩，同個醬汁幾夾。佢唔係油淋淋好多辣椒油嘅口水雞，反而係重視醬料嘅味道，不過愈食愈會有一種麻辣嘅味道，喺舌頭上散發。睇個樣唔覺得太辣，但食落係會有啲辣嘅，呢個係我幾估唔到。粟米羹係見唔到一粒完整粟米係入邊，佢係將粟米打成糊狀作一個湯汁，中間會有啲竹笙同埋魚肚，兩者咬落都幾爽口，同個粟米味好相配！「金漆招牌」終於到咗填鴨呢個重點啦，呢度食北京填鴨好講究，每一個鴨嘅部位，店員都有細心同我哋去解釋清楚。佢有提到，因為油脂分佈太多嘅部位係唔適合配埋個捲包嚟食既，就咁食就可以。之後有啲部位就可以點黃芥辣同埋藍莓醬黎食，呢兩個配搭我都覺得好新鮮，之前都未食過，幾特別！而鴨肉部分就可以點返傳統嘅北京填鴨醬，同埋夾返青瓜絲食，最正係我有紫色嘅山楂條，咬落好開胃同鴨肉好夾。「桃紅柳綠」一字骨非常之開胃，汁醬嘅酸甜度啱啱好，咬落唔會太濃味。而且唔會得骨，入面都有足夠嘅肉畀我去食，當中一字骨嘅肉好重肉香。貌相幾特別，又紅又綠。如果四個人一齊食一碟應該啱啱好，但我哋兩個人食就好似有啲太多。「拍案叫絕」黑椒蜜糖雞翼係我全晚覺得最震驚嘅一道菜，蜜糖啱啱嚟到嘅時候，依然係呈半融狀態，用筷子夾起雞翼之後，仲有拉絲嘅效果。一黎到枱已經非常之香，同埋好吸引！加埋微微黑椒味，唔太濃，黑椒味同蜜糖出奇地夾！雞肉非常正，軟滑，咬落仲有好多肉汁。「嘖嘖稱奇」最後上檯嘅係芝士焗大蝦同埋鹹蛋黃鮮魷，大蝦既蝦殼已經係中間開咗邊，用支叉輕輕一吉就可以起到成嚿肉出嚟，食落都算彈牙，大蝦同個芝士汁好夾，芝士汁有微微嘅焦香味，濃稠度岩岩好，又唔太鹹，吊到蝦肉既鮮甜味出黎。 鹹蛋黃鮮魷個皮炸得好香脆，鹹蛋黃味好出，而且夾埋個鮮魷食幾特別。鮮魷本身冇乜調味，鹹蛋黃味幾濃，加埋鮮魷配搭得幾唔錯，只係略嫌鹹蛋黃脆皮放耐咗少少會有啲油膩，所以食嘅時候要快啲食！…查看更多

今日去黃大仙見完個客，就同咗朋友喺黃大仙度食飯喇！本身都冇諗住食啲咩， 咁啱經過呢間越南嘢，睇落好似好抵食就入咗去啦！一入到去店員就比餐牌，檯面都算幾整潔，而且選擇算幾多元，有好多嘢揀。最後我哋叫咗個二人餐。「軟硬兼施」生牛肉湯河個湯底好濃郁，加埋青檸汁同埋辣椒落去之後，成個湯底嘅層次感豐富咗好多，辣味唔算好勁，但有陣淡淡嘅辣香。湯底唔會太鹹，牛肉味幾重。而且牛肉好冧，唔會太韌，咬落都冇筋，入口即溶。做配菜既蘿蔔都幾軟身，同埋洋蔥幾冧，整體感覺都唔錯！「相得益彰」豬頸肉越南春卷配料幾豐富，入面嘅粉絲好多，而且蔬菜好爽口。本身以為蔬菜會搶咗豬肉嘅油香味，喧賓奪主，但係咬落又有淡淡的豬肉香，豬油味都幾重幾濃厚。 加埋枱面嘅酸汁，好大得出蔬菜嘅新鮮感。呢度仲有我最鍾意飲嘅鹹檸七，鹹檸味好濃厚，而且唔會太多冰，搞到成杯嘢淡曬！「喜出望外」牛油雞翼係成餐飯令我最驚艷嘅一味！面頭嘅蒜同埋雞翼外皮完全融為一體，咬落好脆口！面頭既蒜好脆身，連埋個雞皮食好夾，而且中間好保留到肉質既鮮甜味，鎖到肉汁！原本我哋諗住額外叫多份牛油雞翼，但好彩冇。因為所有嘢食加埋食到超級飽！呢個二人餐真係好抵食！！！…查看更多

雖然今日喉嚨痛，但係朋友請食飯，仲要係食佢最愛嘅燒肉，咁就唯有畀面出席一下啦！一入到舖頭，見到唔算太多人，唔使等位就可以入去。裏面都算幾乾淨，所有設備又已經準備好，一坐低就可以叫嘢食。可選放入爐燒嘅嘢食大概有呢三大張紙，款式都算幾多元，而且比較仔細，每款燒肉都幾講究，唔係就咁雞肉、牛肉、豬肉就算數。飲品就自取嘅，熱水、熱茶、醬汁就係另外一個櫃，所有嘢都係自取算係幾自由。一黎到既金菇牛肉捲，貌相非常之吸引。本身我認為金菇應該好難燒得熟，因為畀嚿肉包住咗，但係朋友就就冇乜所謂。燒落又真係幾容易，好快就得食啦。生菜包嘅生菜非常新鮮好大塊，而且好夠水分。我哋每份肉類都點咗少少，餐廳就畀咗呢個拼盤碟我哋裝住。 餐廳仲將我哋點嘅肉加以發揮，中間嘅牛肉仲捲咗花添。薄切西冷個賣相非常唔錯，面頭嘅蜜糖汁仲好香，燒完可以鎖到個水分，咬落甜甜地，好好味！我哋叫咗少少海鮮，當中嘅帆立貝同埋蝦就好令我印象深刻。帆立貝燒一陣就食得，唔使成隻熟曬如果唔係就會好韌 。而蝦燒熟咗之後，橙紅色個樣已經令我流曬口水，有陣好香嘅蝦肉味，而且仲有少少蝦膏，好正！最值得一讚嘅就係呢度嘅柚子汁炸雞，炸雞脆脆既口感加埋柚子汁酸酸甜甜嘅感覺非常之夾！我仲問店員拎咗額外既柚子汁，攞黎點其他燒肉估唔到都出奇地咁夾，呢個可能係呢度嘅隱藏食譜，有興趣嘅朋友可以試下！…查看更多

今日約咗個朋友食飯，朋友住觀塘介紹咗我食一間放題，自己又未食過，咁就姑且同朋友食下喇！一出升降機之後見到鋪面都幾大，有好多位。 好好彩我哋安排咗可以坐喺窗邊，仲要喺卡位黎，枱面都算幾整潔！可以揀嘅嘢食都算幾多，整體而言算唔錯，我哋唔算太肚餓，所以好多都係叫小食為主，飯麵果啲就不了！首先一嚟到就係刺身拼盤，各款刺身都有齊，賣相非常吸引。我自己比較鍾意食帆立貝，呢度既帆立貝算幾大隻同新鮮，加埋豉油食，正呀！ 三文魚腩刺身油脂感好豐富，咬落啖啖肉，成個口都有魚油味，不過甜蝦就細隻咗少少。有一個估唔到嘅位置係，呢間放題竟然有提供打邊爐，有得食牛肉鍋壽喜燒！ 配料仲可以自己揀，有超過幾十種。牛肉都冇令人失望，同燒物表上既牛肉質素一樣， 咬落軟身，冇筋，亦都唔覺韌！ 有個小建議係，食配料之前，先食咗牛肉，因為壽喜燒湯底煮得耐，配菜可以吸收牛肉味，咁會更加好食！燒物炸物都冇令我失望！菠蘿燒得夠脆口，做到外脆內軟嘅感覺。吉列蠔亦都炸得啱啱好，咬落仲有少少水份，入面唔會太乾身。芝麻雞翼係我最吃驚嘅一款小食，因為佢係熱辣辣，咬開仲出煙！ 鐵板牛肩肉非常入味，面頭嘅燒汁同牛肉好夾，牛肉唔會炸得太硬，咬落軟腍腍，好易入口。羊架同樣好軟身，不過略嫌香料落得唔夠，孜然味唔重，有少少羊羶味。仲有炸魚皮都幾開胃，好脆口！雪糕款式算豐富！不過我地太飽就冇食了。值得一題係，呢度嘅店員幾有禮貌，一舉手即刻會過嚟接單。同埋每次食物落枱前都會同我哋講聲，仲會講下慢用呢啲語句，幾好態度！…查看更多

自從之前去台灣旅行食過台灣野之後，好耐都冇食過台灣嘢啦，今日喺朋友嘅推薦之下，就嚟到旺角試一間！一入到餐廳，就感受到濃濃嘅台灣風味，店員會用台語講歡迎光臨！餐牌都算幾精緻，而且每張枱會有一瓶水，自助斟水，好方便！因為我哋兩個都唔算好肚餓就叫咗少少嘢食算啦！「引人入勝」台式雞肉飯係一個比較豐富嘅飯，一黎到就見到雞肉非常多，而且係雞絲，放入口啖啖肉！ 雞肉上面有少少炸蒜做點綴，增添色調之餘亦都增加咗口。 雞肉算腍，而且入味，送飯一流！「別出心裁」雞扒刈包入面個雞扒係炸雞排嚟嘅，原本以為係燒雞扒，不過原來炸雞扒同個刈包都幾夾，咬落好多汁，中間重夾咗少少榨菜，增加濕潤感。刈包本身都軟熟，偏暖，唔錯！台式醬牛肉，係令我比較驚艷嘅一碟小菜，因為佢個外貌非常吸引，而且有陣陣嘅微辣香氣，牛肉幾入味，有種好濃嘅麻味。牛肉下面嘅青瓜絲就偏辣，如果唔食得辣嘢，記住唔好就咁食青瓜！「七星拱照」宜蘭卜肉係我第一次食，見到餐牌上面個名，我覺得幾得意就叫咗黎試下，佢個感覺有啲似係條狀炸豬扒！咬落個皮幾脆口，入面唔算好鹹，但有小小韌，好岩做傾計小食。「喜出望外」最後餐廳竟然提供黑糖鮮奶！因為我唔飲奶茶，問過店員可唔可以茶走，店然話可以！第一次係餐廳入面試飲黑糖鮮奶，如果加埋珍珠應該同出面差不多！…查看更多

今日係尖沙咀見完客，諗住打個邊爐，自己一個悶悶哋諗住食個一人鍋，就入咗呢間8鍋臭臭鍋入面試下啦！餐牌簡單，前後兩頁當中有個好處，就係佢嘅套餐已經幫你揀好曬所有配料、湯底，想食咩配菜多啲就點邊個餐，唔使煩要揀咩餸。 不過如果有部份配料想食多啲，都可以散叫，但就貴小小。「喜出望外」因為第一次食，就保險啲叫個招牌鍋，黎到之後我覺得佢都算幾豐富，大部分火鍋配料都有齊。火鍋面頭嗰啲係豚肉唔係牛肉，魚蛋、貢丸都有，又有金菇、娃娃菜做蔬菜部分。 不過要小心，我自己係唔太食內臟嘅，我見到餐牌有豬大腸就預先叫店員幫我走咗先啦！鍋入面有包埋蜆，但唔算太大隻。 一開始飲嘅湯係冇乜味，純粹係清湯。但食到差唔多最後再飲嘅時候，就會變得鮮甜左，應該係吸收哂配料既味道！「麟角鳳毛」點一款套餐可以送一份主食，我就加錢要左份魯肉飯。魯肉飯嘅醬汁煮得啱啱好，唔會太稀，而且魯肉肥瘦適中，撈埋個飯食岩岩好，好有台灣嘅風味！「恰到好處」飲品就叫咗一個芒果鮮奶沙冰，好解渴！而且唔會太甜，仲夠哂大杯，都算抵飲！…查看更多

之前有聽過旺記冰室嘅滑蛋飯好吸引、好多人食，咁岩大本型新開張，咁我就同朋友兩個人入咗去試下啦！雖然要等位，但唔使排好耐。店員速度非常之快，一坐低就有餐牌遞上黎。佢係開放式餐廳，不過個環境都算幾靚，裝潢不錯！「瑕不掩瑜」本身諗住叫叉燒滑蛋飯，但見到牛肉同埋蝦呢個配搭都幾吸引，最後就叫咗呢個喇。 牛肉好軟身，蝦仁爽口， 滑蛋有啲部分係未完全熟曬，撈埋佢個豉油汁其實幾夾。同埋有醬汁嘅濕潤，撈埋底果啲飯，成件事係好開胃！ 豉油汁唔係偏鹹嘅，反而係有少少甜，有啲似煲仔飯豉油，但又冇咁濃，可能係廚師自己調過，幾唔錯。 但美中不足係份滑蛋唔夠厚，如果有多少少蛋攞嚟配飯，就非常之理想喇！ 熱奶茶好濃厚，茶味非常夠，吞落去之後仲有回甘嘅茶味，好欣賞！最後要再重點讚嘅係，成間店舖嘅店員速度都好快！無論係煮嘢食嘅定係傳菜嘅都超級快！如果想拿拿林食完一餐嘅一定要去試！…查看更多

一直聽人講麵屋武藏都算係一間幾好食嘅拉麵，因為同朋友經過坑口就入咗去試。時間都仲係幾早，唔算好多人排隊 我哋一坐低，店員就送上茶，都算幾貼心。枱面簡潔。餐牌幾精緻，而且顏色都算豐富。「恰如其分」首先嚟嘅係兩款小食，第一款係炸池魚仔，咬落幾脆口，蘸上隔離嘅酸汁，食落幾夾，而且算係幾醒胃。朋友話咬落有少少幼骨，有啲唔舒服。但我個人感覺就覺得冇乜問題，可以成舊放入口咬。值得提嘅係，佢唔算好油膩，咬落亦都冇翻炸嘅感覺，一啖一舊，好爽！ 煎餃我覺得比較普通，內餡係入口貨，唔算太驚喜。不過外皮煎得夠脆，作為一個前菜小食，都可以係合格嘅作品。「喜出望外」主食我哋一人點咗一個拉麵，朋友嘅係黑蒜油，我嘅係蕃茄湯底。蕃茄湯底有個特點就係有舊薯蓉係當中，我空口食咗一啖，唔算太濃味。但同啲湯混和之後，令到湯底有少少濃稠，係有少少做到調味嘅感覺，將番茄隻鮮甜帶出嚟。豬肉嘅油脂分佈好平均，咬落肉質、油脂都有齊，係上等嘅豚肉。另外最值得提嘅係糖心蛋，中間嘅蛋黃係流心嘅，冇畀啲湯整到熟曬。就算最尾先放入口都依然係流心，呢個真係好值得回味！最後要讚嘅係店員嘅服務態度，成餐飯我哋一舉手就即刻有回應，值得欣賞！…查看更多

之前喺黃大仙已經食過呢間和氣，幾個月之後再同朋友黎開呢一頭，就再食多次，估唔到水準依舊，值得欣賞！雖然今日係平日，但都好多人排隊，等咗好耐先有得入去食。檯面都算幾整潔而且一坐低就有餐牌送到。呢款鯛魚湯泡飯似係呢期嘅招牌。「先聲奪人」左口魚邊牛油果沙律係我好欣賞嘅開胃菜，一送到嘅時候已經聞到好香嘅黑松露味，牛油果非常之軟，如果夾起牛油果加啲芥末豉油，感覺真係有啲似三文魚。左口魚邊唔硬，好易入口，仲吸收咗唔少黑松露嘅味。沙律菜加埋黑醋、酸汁好醒胃，唔單止有酸酸甜甜嘅，咬落都好新鮮。「直截了當」刺身定食點咗唔係好多，只有三款刺身，但係三款都係我哋鍾意食嘅。三文魚切得好厚，感覺係啖啖肉，而且冇腥味。生蝦好爽口，咬落都唔會霉，夠曬彈牙，整體感覺都幾唔錯！「破舊立新」記得係呢度之前食過火鳥雞翼，今次有機會試到呢個電擊雞翼，應該都算係呢度嘅招牌菜。本身睇個樣以為電擊雞翼應該係偏微辣，而且係脆口嘅。但食落完全相反，入口係甜甜地，而且係放涼咗嘅，一種甜味之後，帶啲啲微辣感覺。而且係一字骨雞翼，食落好方便，就得欣賞！「香氣馥郁」主食我哋點左兩份，首先係白咖哩烏冬，一嚟到個賣相已經非常之吸引。有忌廉喺碗面，下面係黃咖哩烏冬，我哋試過就咁食下面既咖哩汁，但係感覺偏辣。但加埋忌廉之後味道啱啱好，稠度足夠而且辣度亦都係剛好。烏冬入口彈牙，唔係一夾就斷嘅平價烏冬。另外，見好多人都有嗌呢一個鯛魚泡飯，咁我哋都跟住叫咗一份。一上檯有個石頭鍋飯，仲醒有一壺魚湯，同埋三小碟配菜。泡飯面頭有鯛魚、帶子、蝦等食材，店員幫我哋加咗熱湯落去之後，等一陣就可以開始食。珍珠米吸收曬魚湯嘅味道，入口好鮮甜，而且蝦煎得啱啱好，咬落都係爽口嘅。我哋自己額外加咗玄米脆粒，食落嘅口感再多一個層次。兩份主食加埋真係不得了！「畫龍點睛」最後臨走前，我哋都忍唔住叫咗個甜品食。綠茶雪糕綠茶味超級香濃，而且側邊放嘅白玉同埋綠玉都非常之軟糯，配埋雪糕簡直係一流！雪糕下面有啲紅豆蓉，偏甜，但加埋雪糕可以話係啱啱好。冇後悔叫埋黎食！…查看更多

早前喺淘大見到龍城冰室新開 ，啱啱開張嗰陣好多人排隊 ，所以都冇點樣幫襯。但今日見人流好似少咗啲，就同朋友兩個人嚟食喇！餐牌都算幾精緻同埋幾新淨， 見到有出二人餐睇落幾吸引， 不過我哋唔算太肚餓所以都係散叫就算了。有方型大枱，六七個嚟食都應該可以。「別樹一幟」我諗常餐應該係呢度嘅招牌，我見好多人都叫呢個餐嚟食。 炒蛋個賣相就比較普通，但估唔到食落入面都幾嫩滑，我估應該落咗少少牛奶落去炒。脆豬本身唔跟煉奶，但同店員講完之後加既！ 原本搽咗牛油焗完之後已經好香，再加埋煉奶真係更上一層樓！ 瑞士雞翼顏色好夠，淨係睇個賣相都已經好吸引，而且醬汁一啲都唔吝嗇，畀咗好多夠哂撈個面。 覺得唔會太甜，仲帶有少少麻油香，個人覺得如果有小小辛辣味會更加正！「貨真價實」黑松露蝦仁炒蛋配料好足、非常豐富，成碟餸超過廿隻蝦，一嚟到已經俾佢個樣嚇親！炒蛋同埋黑松露估唔到都幾夾，黑松露個量都唔少，佢係啖啖都有。但係我覺得蛋方面可以唔使咁熟，稍為炒得嫩少少會更加啱口味，不過可能落得太多蝦，導致個炒蛋嘅水份略嫌偏多，失左滑蛋個口感。但整體而言都係幾唔錯嘅！…查看更多

今日同朋友行開九龍城就去咗食呢間打邊爐啦呢度係行香港六七十年代嘅路線 成間鋪頭都好有熟悉嘅感覺 餐牌都比較簡單一睇就明 一坐低 店員就送咗啲配料你畀我哋自己揀 仲有介紹今日食夠五百就會有一份牛肉送 好抵食我哋叫咗雞鍋湯底 一嚟到店員好細心咁同我哋講 叫我哋先試咗個湯頭先 之後等隻雞熱咗再夾起上嚟幫我哋剪開 全程唔使我哋負責非常細心同方便 湯頭非常之清甜 而且油脂感唔重 全部雞肉都好腍 就算雞胸肉都好放到入口都唔覺得柴我哋叫咗唔同嘅配料幾份都係呢度嘅招牌 首先特大蟹棒喺其他地方有食過 但估唔到可以喺呢度做火鍋嘅配料 一嚟到已經非常之吸引因為一條就咁大條可以滿足曬我哋嘅胃口 一份仲有四條我覺得都算幾抵食 另外 就有呢個即炸響鈴 原本以為只係餸菜嘅名 點知呢到真係即炸 上到枱仲有啲熱熱哋嘅煙冒出 呢個響鈴次係兩食 店員有畀甜酸汁我哋自己蘸 又可以擺落個鍋度淥好再食食食下店員就拎埋今日送嘅安格斯牛肉畀我哋 牛肉呢個擺盤非常之精緻 另外一碟就係麻辣牛丸 原本以為同普通嘅黑椒牛丸冇乜差別 但估唔到真係非常之辣 相信鍾意食辣既朋友一定好鍾意 佢辣嘅感覺係你喺口腔度越咬越出 越嚟越辣 但佢一入口嗰陣唔太辣 等你放低警覺就開始辣 好正除咗店舖送嘅安格斯牛肉之外 我哋自己都另外叫咗一碟 我覺得呢間店舖嘅牛肉都算幾唔錯 雖然只得細塊 但可以一啖一塊 可以接受 入口嗰陣仲有牛油嘅香味 肉質算細嫩最後要讚嘅係 呢度嘅店員非常細心 見我哋牛肉食多左個鍋有油 就過嚟幫我哋撇走啲油 唔使我哋負責 依個真係值得一讚…查看更多

今日忽然想食日本野，但又唔想食啲大型連鎖，街街行行下，就上左黎呢間日本餐廳。店員話通常都FULL BOOKING 但咁岩有張枱冇黎，我地先入到唯一一張，(真係好好彩^^)店面係走樸實既路線，枱面都算整潔。一坐低都會送埋一份漬物做前菜，今日係茄子，都幾好食。餐牌既圖片都幾精美。「出神入化」好彩我地兩個唔係太肚餓，叫得唔係好多，因為呢份海鮮沙律係超級大份，入面充滿左角切魚生、沙律菜、玉子等，最令我估唔到既，係竟然加左天婦羅脆粒落去，本身咬落全部都係菜既沙律，突然多左一份脆感，呢個係口感上加左唔少分！另一份都屬於冷盤既係刺身拼盤，拖羅油脂感好重，一啖放入口你會感覺到魚油係充滿哂你成個口腔。三文魚腩切得好厚，啖啖魚肉好滿足。海膽非常鮮甜，唔腥，佢係吞左落口之後，會再隱隱淡出小小甜味，好新鮮！「嘖嘖稱奇」串燒就點左雞翼、牛舌，呢兩樣係我係日本餐廳最愛點既野食，因為一食就知道師傅既能存力高低。但估唔到呢兩樣都係超水準！雞翼成功燒到雞皮好脆口，但又唔係炸過既脆，而係燒到微焦既脆口。咬落肉質好鮮甜，雞肉仲保持到肉汁同水份，入面唔柴，非常唔錯！而牛舌就燒到好爽口，食落係有嚼勁但唔韌，而且面頭既鹽味落得岩岩好，唔會死鹹，喧賓奪主。「點到即止」熱葷就點左忌廉薯餅同埋牛油帶子，因為我有小小喉嚨痛，所以冇食好多，只係食左小小內餡，忌廉味重，不過薯味唔太出，朋友話個皮夠脆，而且冇臭油味，咬落油膩感都唔重。而牛油帶子就係另一款我鍾意既熱食，呢度仲加左白汁落去，小小似忌廉焗帶子。我比較鐘意食裙邊既部分，有小小嚼勁之餘，又有種海鮮既鮮味。中間帶子部分好軟，唔洗太大力咬佢都已經可以分開，煮得岩岩好！呢間餐應值得讚既係算幾有格調，可以慢慢食，每碟野食都會比足夠時間客人食完，店員收走之後，先去炮製下一道菜，所以岩哂想搵個地方慢食、嘆世界既朋友！…查看更多