yeungssssss的個人專頁

帶父母來吃一個buffet，主要是因為他們喜歡食物的多樣性，覺得這家主打亞洲菜的buffet他們應該會滿意，加上母親大人很喜歡吃蟹，這裡的冷海鮮應該能滿足她吧。果然，她身第一時間就去了拿海鮮！鱈場蟹腳、麵包蟹就拿了一碟回去慢慢吃，打開入面也蠻多膏的，媽說就是要吃那些膏才正解，又說鱈場蟹腳沒有雪味很新鮮，一吃就是４隻。我自己很欣賞魚生的部分，即場叫才即場切，記得有三文魚、八爪魚、油甘魚同吞拿魚，很厚很肥美，特別愛油甘魚！到了熟食的部分，那個熟食區面積也不少，主打韓式食物的樣子，一眼看去就是燒肉、泡菜豆腐湯、海鮮煎餅等等，調味做當不錯，辣之中帶點甜，眼看當天也有幾檯韓國人食客呢～芝士龍蝦是我今晚最愛的菜式之一，芝士真係好濃好creamy，龍蝦雖然小小的，可是肉是滿的，燒好的芝士配一起吃超香!中式湯麵bar食材很新鮮呀，可以自選自己喜歡的食材再給師傅幫你弄熱，這個蝦雲吞好好吃呀，小小顆的我就拿了6顆，還加點木耳，湯底是金華火腿湯，好fresh，一整碗湯都喝完了。你看！有很多gelato口味可以選耶！有個姜汁撞奶的好特別就叫了一杯，哇真的是姜汁撞奶！要叫回一個士多啤梨去中和一下那個姜的辣～最後是甜點的部分，也不少選擇，有最愛的red velvet呢！小小件的，吃了２年，個支古力撻也不錯吃，可愛的是他有韓式黃豆餅，很特別。…查看更多

平時好少特登行去荃豐-華都-荃昌方向搵食，見奶茶group有谷友推欣榮嘅奶茶，搵日平日有時間就去嘆下杯奶茶。當日就算過咗午餐時間有8成位都滿，要搭枱。一坐低拎起餐牌，對面個伯伯同我推薦豬扒包同奶茶，最後決定聽伯伯意見🤣奶茶-夠厚身，茶味有層次，前濃後甘，奶味剛剛好，係我杯茶👍🏻豬扒包-大大塊豬扒，肉質唔係行鬆軟路線，有咬口得嚟唔會好硬，中間有沙律醬加黃芥末醬。本身個人唔食太醬汁，食到一半"了"走部分醬，店員姨姨就好好心咁問👩‍🍳你係唔係唔食黃芥末，叫我地走呀嘛😺唔係呀，我唔食咁多醬👩‍🍳下次叫我地少醬嘛，無問題架😺唔梗要，係我頭先唔記得講加埋搭枱嘅伯伯，呢餐我食到小店嘅人情味，令到看似普通嘅野食，擁有普通的美味。…查看更多

以前一講燒肉就會諗起一大班聚會先會去，但宜家開咗好多一人燒肉店，有時想食/享受一下燒肉都唔駛約齊人先去，今次約個朋友係旺角食飯，經過呢個燒肉店突然興起就燒一燒肉。店入面座位都算多，唔算太迫，店員話用手機落單，入面有最新嘅餐單，我揀咗個牛舌套餐，友人就食和牛套餐。套餐包飯、湯同沙律/泡菜，好豐富，一開始未控制到個火力，頭2塊肉比我地燒到有啲老😂牛舌厚薄適中，燒完口感爽口，加埋洋蔥蒜蓉好惹味。A4和牛燒完油脂足又夠肉味，好好味！套餐有兩大塊，食完立即再追加。豬頸肉本身有醃料，個人覺得燒耐少少，迫走啲油份，更脆口又唔會太油膩。整體食身質素都唔差，份量好足夠又唔算貴，推推A4和牛，雖然燒肉點都係比較油，不過間唔時食下無咩所謂～…查看更多

碟頭飯嚟講個人好鍾意食椒鹽豬扒飯，雖然好普通，但唔係度度都整到好食。豬扒肉質影響口感，椒鹽炸蒜份量影響味道，飯身為主角之一，質地好重要，如果炒飯底就更加需要一定功力。上網見到呢間以炒飯為主打嘅金飯館，見評價唔錯，咁啱經過觀塘就去試一試下。#️⃣椒鹽豬扒飯可能過咗食飯時間，order完好快就有，一見到山咁高有啲嚇親，好大碟！豬扒大約有七塊左右，炸粉算薄身，味道較為濃味少少。炒飯方面夠乾身，粒粒分明又炒得平均，好味。但炸蒜係最後放上面而唔係同豬扒一齊炒過，所以味道有啲分開，椒鹽．豬扒．炒飯，各自都好食嘅，可惜佢地未能融合。最後有個扣分位，就係堂食但用外賣杯，個人唔鍾意外賣餐具，覺得無「溫度」，所以下次再食可能就唔叫飲品。…查看更多

久仰大名的台灣過江龍，身為仙草愛好者一定要去試下。第一次去當然要試招牌嫩仙草雪花冰，將仙草加入雪花冰中，食嗰陣會見到冰入面有一絲一絲仙草，食入口先係雪花冰棉棉嘅口感，之後仙草淡淡甜味係後面慢慢淡出，甜味自然無苦味，我無加其他topping，仙草甘甜味唔會比搶走，全程食完仙草味都好足，唔會一下淡味一下濃味。另外芋圓都好煙韌，好味！另外叫咗杯仙草奶茶，可以免費加白珍珠，但個人覺得加咗珍珠偏甜，下次淨仙草奶茶已經夠。…查看更多

好耐無食雞煲食火鍋，放寬後要去大食一餐! 頭盤揀咗酥皮麻辣芝士雞煲，雞本身已經煮好，職員會幫手切開酥皮同撈好啲芝士，煮一下芝士溶晒就食得，雞肉肉質都幾嫩，唔會鞋口，味道剛好，酥皮撈埋個麻辣醬汁都唔算太濃味。火鍋就揀港式沙嗲湯底，本身包一set牛加海鮮盤，海鮮新鮮，牛肉方面個人比較喜歡牛下肩(肉味油脂平均, 口感嫩滑)、M4和牛(肉味重)、封門柳(肉味重，口感結實，啖啖肉)、牛板腱(肉味油脂並存, 偏爽口)，牛下肩牛板腱仲可以再添加😆出面自助區都有唔少食材，菜類丸類都各有幾款。沙嗲湯底好香，味道一開始剛剛好，唔會濃到蓋晒食物嘅味道，就算係海鮮都食到個鮮味，慢慢食下食下去到最後先覺得鹹，當然大家要適時加水。最後落個公仔麵，完美變咗超濃郁沙嗲牛麵！最後仲食埋雪糕，非常完滿。全程職員都好有禮貌，價錢同食物質素都滿意，會再回頭👍…查看更多

抗疫期間，相信大家少左出街食飯，就算出街食飯記得要好好做足保護措施同勤清潔，大家保重。呢排都係係屋企煮飯，突然一日好想食壽司，放工就去左食壽司滿足下。今次揀自選壽司，想食咩就叫咩，而且可選既壽司種類都好多。蔥吞拿魚腩軍艦。自己本身好鍾意食吞拿魚蓉，甜美新鮮，入口即化既口感好正。火炙左口魚邊壽司。另一推介，軟腍口感又有濃濃魚味。火炙三文魚壽司。唔係腩位都好肥美，好甘甜。腐皮壽司。唔係度度有得食，好食既腐皮壽司甜度要控制得好好，呢個腐皮既甜度剛好，會令人想不停食。呢度有omakase，想食靚野可以試試，如果想食指定款壽司就食自選，全部都高質，任君選擇。餐廳位置易去，位於尖沙咀價位唔算太貴，推介。…查看更多

新年前多團拜，今次同朋友去土瓜灣聚會，見有間新開餐廳，就立即去試試新野。白酒海鮮忌廉意粉。海鮮有帶子，青口同蜆，好濃忌廉味，意粉煙韌，整體不錯。炸軟殼蟹。粉薄香口，每隻size細細的，易食但食落唔夠滿足。焗大啡菇。好足料！啡菇大大舊，芝士有好濃芝士味，下面有薯蓉襯托，三種材料好夾好平衡。黑毛豬肋肉煲仔飯。好特別，以煲仔飯做法，但用日本豉油配黑毛豬肋肉，比起港式煲仔飯無咁濃味，再甜一點，豬肋肉好淋，配上飯焦口感豐富。整體用餐經驗不錯，態度親切，會耐心介紹食物，食物質素偏高，如果想食好啲又係土瓜灣聚餐會再選擇。…查看更多

度小月算好出名既台灣餐廳，係台南食過一次，原來已經係香港開左分店，就去食一食台灣味道。三杯雞煲。一入店就聞到好香既三杯雞味，所以二話不說點了。一上枱香味好夠，食落香料味都好足，雞件切得有點細，但咁反而好入味。滷肉飯。同台南食到既一樣，細細碗，但滷肉精華已經足夠。擔仔粿條。之前食都係擔仔麵，今次食粿條，同滷肉飯一樣食度小月一定要食。櫻花蝦高麗菜。菜新鮮，加上櫻花蝦淡淡鮮味，好鮮甜。黃金蝦卷。好鮮味，外皮好脆，食左一條就停唔口。台南芋糕。推介，芋頭味好濃，質感好煙韌，好特別，但一定要襯熱食。古早味滷豆腐。用硬豆腐配上滷水汁，同港式滷味好唔同，好入味，但唔喜歡硬豆腐質地既朋友可能會覺得麻麻。…查看更多

豆腐沙律。豆腐份量很多，醬汁份量剛好，不會過多而破壞平衡。煙肉荔枝卷。煙肉不會過乾，有一定厚度，有口感，包著甜甜荔枝肉，味道好平衡。和風炸雞。大大舊啖啖肉，本身炸雞醃得好入味，好適合送酒。蒜燒茄子。大大條茄子，蒜蓉好香，茄子肉都幾多，有少少辣好嘢味。貓飯。好少地方可以食，白飯上加上鰹魚碎，簡單美味，但食落偏乾。黑松露炒烏冬。偏向日式炒麵既感覺，加上黑松露又幾特別幾夾，黑松露香味唔會搶味，而烏冬係煙韌口感，好入味但又唔會過濃味。呢間串燒種類算頗多，唔只串燒類，沙津同主食都有幾款選擇。串燒調味好岩配酒，可惜不是週未去食未能盡興。下次一定搵多幾個朋友一路飲一路談心！…查看更多

九展開左outlet 之後終於有機會去行下街掃貨，行完街上去「食街」搵野食，開左好多餐廳（本人真係勁多年無入去），最後俾老夫子吸引左入去。餐廳環境好多老夫子模型，牆身亦有畫老夫子圖畫，仲播埋主題曲（應該係）！食物方面主要係港式食品，粉麵飯燒味煲仔飯之類，叫左個口水雞飯同蝦醬豬頸肉煲仔飯。奇味麻辣口水雞飯。個口水雞醬唔係一味得個辣字，有少少甜甜地，辣度還可以，好送飯。蝦醬豬頸肉煲仔飯。除左蝦醬仲有蝦乾，好嘢味，豬頸肉份量算多，美中不足係飯焦唔夠多，少左脆卜卜既口感。我對九展以前既印象係無咩餐廳食野，但今次見到有成條食街咁，老夫子餐廳整個環境都勾起童年回憶，用餐感覺好舒服。下次入九展唔駛食左野先入去嚕～…查看更多

商場裝修完後有新餐廳進駐，其中對呢間燒肉有啲興趣，就搵左一日放工去試。今次坐係吧枱前面有塊鐵板，不過驚燒肉套餐會好大陣味，最後係叫極上二人餐。漬物+刺身。三款漬物都幾濃味，係每道食物中間可以用黎轉換下口味。刺身新鮮，size 都幾大片。牛油果蟹籽沙律。牛油果足半個，無打成蓉保留口感，配上蟹籽同青瓜，清爽開胃。玉子燒。好大份！足足有六件，甜度適中，口感偏厚實。雜錦天婦羅。有蝦，菇同南瓜等等，炸粉有點厚，但都做到酥脆口感。鐵板石燒和牛板腱。用鐵板燒和牛，生熟程度容易控制，和牛牛味好重，油脂均勻，輕輕燒熟表面已經有油脂香味。海洋串燒。有蝦，蠔，帶子，魚。整體味道中規中矩，最鍾意其中既燒魚，外皮脆口，內裡肉質嫩滑唔乾。和牛烏冬。烏冬爽滑彈牙，湯底清甜，和牛醬汁煮過非常濃味，但配上烏冬味道中和番，好好味。整體表現唔差，係商場鋪呢講味道算中上，位置都方便，係會再回頭既餐廳。…查看更多

一直覺得元朗已經有多隱蔽好餐廳，但其實行遠少少既錦田一樣有好多美食。入錦田自己揸車會比較方便但亦有巴士小巴可以入去，今次就跟朋友車，闖一下錦田既餐廳。呢間日式鐵板餐廳行過個門面就立即決定要食，叫左個特上活鮑魚鐵板燒二人餐，彌補近排工作壓力大～一路睇住師傅煮一路聞住食物香味慢慢四處飄散，真係好正白甘鯛。第一次魚會連鱗食，鱗炸到好脆，配上嫩滑魚肉，口感好豐富，底部嘅醬係支豆薯蓉配黑松露，支豆同黑松露味道清淡唔會影響魚嘅鮮味。日本鮑魚。鮑魚爽口唔會過老，最欣賞個鮑魚肝醬，師傅話係將鮑魚肝蒸熟再製作成醬，勁濃既肝味但完全無苦澀味。清酒煮蜆。蜆勁大隻勁鮮味，見師傅煮既時候落好多酒，但個湯一啲都唔濃烈，好溫和好鮮甜。美國牛柳+黑豚薄燒。牛柳叫左5成熟，睇住師傅燒真係好享受，牛柳一口一件，肉質好嫩又唔會太生。黑豚中間包住薑同蔥，好衝擊嘅味道，肉質好嫩一啲都唔老，可見師傅功力十足。激邪惡多士！見師傅整焦糖多士以為係其他客人order，點知係請我地食，見師傅落勁多白砂糖以為會好甜，但焦糖化左既焦糖味勁正！師傅話menu無架，每位想食就試下問問師傅。炒野菜，炒飯。芽菜好甜，去到最後令個口有啲小清新。炒飯配料有櫻花蝦洋蔥蘿蔔蔥，味道剛好，食完肉配上一碗飯絕對係完美。奶凍。最後甜品叫左奶凍，個人覺得有啲甜，但奶味濃郁，食完唔會膩。估唔到係錦田會有咁高質鐵板燒，如果過海相同質素既價錢應該會貴一倍，下次有大事慶祝都選擇呢間鐵板燒食餐好！…查看更多

之前係日本食過Omakase，非常喜歡可以一路食一路睇師傅處理食料既感覺，返到香港突然心癮起，決定搵一間omakase試下。今次去食Lunch set，抗拒唔到海膽魅力決定食有海膽杯既「春」。前菜墨魚仔：墨魚仔爽口，個醬汁酸酸地好開胃。菜碗蒸：蛋好滑，蒸得剛剛好，蛋味都好濃。壽司十貫-金目鯛，獅魚，櫻花鯛，深海池魚楠，黑鱸，左口魚，赤身，甜蝦，北海道帶子，廣島蠔（希望無記錯）。師傅每上一個壽司都會介紹，有啲魚平時無機會食到，好「新鮮」，當中最喜歡獅魚，味道唔會太濃，口感偏爽口。而甜蝦難得地好甜，好多時食到唔新鮮會苦。整體水準好好，壽司米用北海道米，好有咬口。海膽杯：大大啖鮮甜海膽加上煙韌北海道米，無得頂手卷：無影到，因為師傅叫我快啲食，紫菜好脆，比起壽司又多左一層口感。金目鯛魚湯：好好味，好濃郁既魚湯，魚既精華係晒入面。豆腐雪糕：唔太甜，有淡淡既豆腐味，作為結束既一道甜品非常合適。食完好滿足，雖然價錢偏貴，但去唔到日本食偶然放縱係可以的…查看更多

前排去長沙灣探朋友時，沿路見到街上好似無咩特別既餐廳，經朋友帶路，入左呢間日本餐廳。日本餐廳當然要食壽司。我地叫左火炙三文魚，大拖羅，帆立貝，玉子燒，豆皮，油甘魚。整體壽司都唔錯，新鮮，大細適中。串燒。推介雞肉大蔥，大蔥清爽，雞肉鮮嫩，呢個組合非常之夾。而其他串燒比較重口味，適合配上酒類飲品。鰻魚茶漬飯。湯底偏清淡，配上烤過既飯團，食到最後味道剛好唔會覺得太咸。土佐豆腐。豆腐加上木魚碎一齊炸，嫩滑又帶點酥脆口感。整體用餐滿意，係長沙灣普遍都係見到茶記同連鎖快餐，突然都食日本野不妨考慮一下。…查看更多