港澳米芝蓮2021!新上榜餐廳逐間睇 炮台山湯圓店成惟一新上榜街頭小食
2021-01-27

嚟到第13屆港澳米芝蓮,今年係第一次以線上發佈會嘅方式進行,共有87間餐廳獲得米芝蓮星級肯定,10間為新上榜或由米芝蓮餐盤推薦晉升,另外仲有首年頒發嘅「綠星」餐廳,即刻同大家逐間介紹下先!
 

香港澳門
三星7間3間
二星12間(2間晉升)6間
一星50間(7間新上榜/晉升)9間(1間晉升)
車胎人62間(7間新上榜/晉升)7間
街頭小食21間(1間新上榜)9間

  
新上榜一星餐廳

中環西日料理 Andō

年僅32歲嘅阿根廷廚師Agustin Ferrando Balbi首間個人品牌餐廳,只係開業短短六個月就成功奪星,皆因餐廳所有菜式都帶有主廚豐富嘅個人色彩。主廚擅於利用日本手法去烹調意大利同西班牙嘅美食,堅持選用季節性及優質食材,而且經常創出未知嘅味道組合,令人驚喜。

Agustin表示:「我哋好榮幸獲得《米芝蓮指南》嘅認可。呢項殊榮為我哋帶嚟好大嘅鼓舞,並肯定咗我哋團隊喺創造卓越用餐體驗上嘅努力。我哋衷心感謝每位食客、合作夥伴、供應商,以及喺呢個充滿挑戰嘅一年裡面支持我哋嘅人。」


五星級酒店中菜 萬豪金殿

香港食中菜選擇好多,但要做得出色都唔容易~中菜館由於香港土生土長嘅鄧家濠擔任行政總廚,擅於喺傳統粵菜中變通改良,菜式出色之處在於無論味道定視覺都令人好滿足。必試有招牌菜萬豪金魚餃、鮑魚酥、貴妃叉燒及艇皇花膠鮮魚湯等。

鄧師傅表示︰「對於萬豪金殿首次獲得《香港澳門米芝蓮指南2021》一星美譽,我哋深感榮幸同自豪,呢個係成個團隊努力合作嘅成果。我哋衷心感謝賓客一直以嚟嘅支持。我哋會繼續努力,為饕客帶嚟愉快嘅餐飲體驗,滿足佢哋嘅味覺享受。」


殿堂級壽司大師坐鎮 The Araki

圖:catherine.b.duan

想有一次完美嘅omakase體驗?The Araki由殿堂級壽司大師荒木水都弘師傅主理,係現今唯一一位成功於東京及倫敦均榮獲3星級米芝蓮殊榮嘅傳奇人物,今次亦成功於香港取得一星殊榮。餐廳只有壽司吧12個座位,食客可近距離一睹其風采及手藝,感受最正宗日本風味。


堅持選用頂級有機食材 大班樓

圖:eatwithsirui

呢間粵菜只有一個宗旨,就係認為想做得好,首要條件必須採用最優質新鮮嘅食材。而且菜式兼具傳統同創新,招牌作包括雞油花雕蒜花蟹及羊肚菌炆腐皮等功夫菜,一直都有唔少老饕捧場。


上環高級焼き鳥店 Yardbird

圖:RheaChim

超人氣雞肉串燒專門店,主廚Matt Abergel用盡雞嘅每一個部位如腳筋肉、小腿、雞膝軟骨、肝、腎臟等製成串燒。特別推薦雞肝,外層燒到微脆內裏超粉,好有驚喜。


經典上海菜 夜上海

喜歡食上海菜嘅食家們,應該都對呢間上海菜唔陌生喇。開業廿幾年嚟,合共獲得《米芝蓮指南》頒發13粒米芝蓮星,於K11 Musea選址重開後亦能保持水準,難怪可以再次奪星!新店5,500呎,仍然由主廚施萬歲主理,仲新增咗唔少菜式,如蟹粉鮮肉包及牛油果素鴨卷等。


日式割烹料理 瑞兆

圖:Handsome XO

同樣都係omakase,不過就主打割烹,餐廳只有八個座位,由日藉型男鈴木師傅掌舵。餐廳均一款供應九道菜嘅廚師發辦御膳,菜式會不定時更改,由前菜到甜品都盡顯師傅功架及誠意,絕對值得一試!

 

正宗高級粵菜  永利宮

位於澳門永利皇宮嘅永利宮由行政總廚譚國鋒掌舵,呢位香港出身嘅大廚16歲入行,曾擔任曼谷半島酒店、曼谷文華東方酒店嘅中餐行政主廚,之後帶領澳門譽瓏軒奪得米芝蓮二星。轉到永利宮同樣成功摘下一星。餐廳供應正宗高級粵菜,秉持符合健康、天然、合時三大原則,蜜汁黑豚肉叉燒同二十年花雕蛋白蒸法國藍龍蝦都係招牌菜。

 

新上榜二星餐廳

創意高級法國料理 L'Envol

座落於香港瑞吉酒店3樓嘅L'Envol由舊年嘅新上榜一星,到今年再度升為二星!餐廳由擁有超過20年餐飲經驗、曾經多次摘得米芝蓮星級嘅大廚Olivier Elzer擔任餐飲總監,特色為挑選嚟自法國同亞洲嘅精選時令食材入饌,炮製烹調創新嘅高級法國菜餚。
 

首位二星亞洲女廚師  TATE Dining Room

餐廳連續八年保持米芝蓮一星後,今年終於「升呢」成功奪得二星肯定。總廚Vicky Lau喺2015就獲The World’s 50 Best Restaurants評選為亞洲最佳女廚師,而家更係史上首位獲得米芝蓮二星榮譽嘅亞洲女廚師!餐廳每季以Edible Stories為主題嘅Tasting Menu最為著名,舊年年底更創立Date by TATE美食平台。

TATE Dining Room總廚Vicky Lau表示:「好榮幸可以獲得呢項標誌餐廳另一重要里程碑嘅殊榮。呢個係我們多年嚟嘅夢想,尤其喺呢個艱難嘅時期可以獲得大家嘅肯定,令我哋感到份外高興。未來我哋希望可以同一啲有相同理念嘅人士合作,尋找能夠改善食物系統同時改革傳統嘅方法。熱誠、耐心、血汗同眼淚真係能夠令夢想成真,我哋一齊為明日共同努力。」
 

新上榜綠星餐廳

精緻英國菜    Roganic

 「米芝蓮綠星」係今年新增嘅獎項,藉以表揚喺日常營運中努力實踐「永續發展」嘅餐廳。同時獲得一星推介嘅Roganic ,就成為香港區嘅首間得獎餐廳。呢間由英國名廚主理嘅英國菜餐廳,主打精緻英國菜。佢哋對於「永續發展」一直不遺餘力,例如採用Evogro最新嘅技術,喺餐廳內自家種植微型蔬菜同香草,再用於菜式裝式或雞尾酒中,亦盡量選用本地食材,滅少碳足跡。而喺使用食材嘅時候,都會善用每個部分製成醬汁、油或者裝飾等,避免浪費食物。另外,即使而家外賣嘅需求大咗,但餐廳嘅外賣包裝要求亦相當嚴格,只選用環保及可生物分解嘅物料,做到減塑效果。

Roganic創辦人兼廚師Simon Rogan表示非常高興成為米芝蓮綠星最早嘅得獎者之一,「香港並唔係容易實踐可持續發展嘅城市,因此我哋嘅香港團隊一直努力不懈,以嶄新、令人興奮且與本地息息相關嘅方式推動可持續發展,並致力喺業界中樹立典範。」佢亦期望喺未來一年可以繼續探索更多實踐可持續餐飲嘅方法。
 

澳門唯一教學餐廳  澳門旅遊學院教學餐廳

顧名思義,呢間餐廳係澳門旅遊學院專設嘅餐廳,為酒店管理、廚藝管理等學生提供實習場地。餐廳支持有機農業,自己種植有機香草及蔬菜。亦會利用廚餘做肥料,並用生物性農藥防治蟲害,有助保護自然環境。餐廳亦以安裝太陽能源系統、無紙化政策等減少資源消耗,達至環保。
 

新上榜街頭小食

手工湯圓老店   福元湯圓

 圖:susanfan0706EatWithLocal

位於北角炮台山嘅呢間老字號,有近30年歷史。有多款中式糖水選擇,不過最出名嘅一定係佢哋每日全人手新鮮製造嘅湯圓,有芝麻同花生味等。湯圓皮薄餡多,多到好似要爆漿咁。啲芝麻同花生包入餡之前都會炒香過,再用磨米機磨碎,啖啖都係心機嘢呢!老闆獲知餐廳首度上榜後,喺Facebook簡單打咗句:「受寵若驚 ,不過上榜都好,都會做好每一粒湯圓。」餐廳舖位較細,相信得獎消息傳開後,呢輪都會有排隊人龍咯。

 

按此查閱2021及歷屆米芝蓮香港澳門指南完全版



文:Kar、Cathy、Yanica

關鍵字
米芝蓮
香港
澳門
2021
奪星餐廳
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
《優秀開飯熱店大賞2021》賽果公佈
2021-05-24
【優秀開飯熱店大賞2021】至尊大獎 排隊熱店阿木台灣麵 台女家傳牛肉麵發揚光大
2021-05-28