岩鹽日本料理 (利舞臺廣場) (已結業)

秋天起，最想食啲暖粒粒嘅野，所以黎咗試日式嘅煲仔飯~試之前先叫咗啲小食。三文魚牛油果米子卷($48)，薄薄嘅米子包住厚切三文魚、甘香嘅牛油果、仲有青瓜同沙律菜，非常清新開胃。蟹味噌甲羅燒伴法包($68)，以蟹蓋黎裝住蟹膏、魚子、鵪鶉蛋，幾有特色，蟹膏味非常香，配上法包後一硬一軟，口感十足。日本南瓜天婦羅($58)，卜卜脆嘅外層，軟綿綿嘅瓜肉，最特別嘅係配上粉色嘅岩鹽，調味一流。終於到咗主角香魚釜飯($128)喇，係餐廳出面可以見到廚師煮釜飯嘅過程。2人份量，除咗有一條香魚之外，仲有栗子、豆、雞蛋絲、冬菇絲。上枱後會有個漏斗計時，等一分鐘先開蓋，等佢嘅飯香更加均勻。未食已經聞到陣陣飯香，香魚肉質鮮美，而且粒粒米飯都沾滿上魚香味。食到最下面侍應建議加入紫茶片同茶，好似茶漬飯咁食~最後叫咗一杯芒果梳打($28)，清爽怡人。