同人鍋 (已結業)

天氣開始涼啦，即刻出動去烚烚下，平時去尖沙咀搵食都會覺得又多人又迫，今次俾我搵到間環境清靜，仲有西餐廳feel既火鍋放題，可以電話預約，咁就唔怕等餐懞啦。餐廳位於內街，地下係接待處，上一層樓梯就到用餐區。裝修好有Cafe味道，空間感十足，就算滿座都唔覺迫，而且有一排窗外望街景，感覺開揚。調味料自助調配，另外飲品選擇都好多，最體貼竟然有酸梅湯，蜂蜜柚子同菊花蜜，菊花蜜清甜潤喉，唔會太甜，絕對真材實料。麻辣雞煲一上枱就聞到香噴噴，配料絕不馬虎，麻辣醬夠晒惹味，雞件嫩滑多汁，讚！呢度對食好有要求，食完雞煲，就換個湯底鍋先開始打邊爐。而且有專人指導每款海鮮既烹煮時間，好細心。嘩，真係未試過打邊爐打到咁高級囉，竟然有原隻龍蝦海鮮拼盤。龍蝦啖啖肉，鮮甜彈牙，龍蝦頭蝦膏都好滋味。鮑魚爽口彈牙。生蠔飽滿唔縮水，夠晒海水味。海蝦大大隻，又彈又甜。好簡單既道理，因為夠新鮮，材料靚，所以樣樣都好有水準。配料選擇多，連海鮮都任叫任食，唔知係咪個海鮮湯底太正，普通淥個烏冬淥粒丸，都好味過人既。