Greyhound Café (MOKO新世紀廣場) (已結業)

之前有朋友介紹呢間fusion泰菜，兩個人嚟試試，叫左3樣野食加一個甜品，的確不俗。首先講嘅係一個粉皮生菜包（唔記得菜名），有泰式肉醬同蒜片芫茜醬，可以按自己喜好用粉皮或者生菜包住食，惹味帶點酸辣，但醬料稍嫌有點油膩。而好鐘意食青木瓜沙律嘅我，今次就試下呢度嘅青芒果絲魚沙律。好開胃嘅一道菜，酸酸地又硬嘅芒果絲加上泰式醬汁同煎香左嘅魚塊一齊食，感覺好新鮮。跟住就係我去泰國最鐘意食嘅小食之一，炸單骨雞翼。呢個都好食，但因為對比其他野食之下呢個算係冇乜驚喜，係穩陣嘅選擇之一（可能因為雞翼太易整得好食啦）。甜品有好多選擇，我地最後叫左個椰子千層蛋糕，因為曾經喺清邁食過一個好好食嘅椰子蛋糕，好想食返果個味道。呢個蛋糕真係有驚喜，好香椰子味，入面真係有椰子肉，非常邪惡，不過一個人食一件應該會有d滯，建議女士們可以兩個share一件。食泰菜嚟講呢間稍貴，不過環境同服務都唔錯，食物算係有d出面較少見嘅選擇，我覺得係可以偶爾一吃嘅選擇。