Amitie Kitchen (已搬遷) 新店位置

朋友生日，想搵間靚少少但又靜少少嘅餐廳慶祝，見到餐廳網上評價唔錯，預先book左檯，避免到時去到要等位咁掃興。環境唔算特別靚，但勝在燈光調得暗暗地，幾有情調，所以見到唔少情侶黎食。平時食野，見到有set就嗌set,貪佢夠抵食，今次都唔例外，不過其實除左menu上嘅野食，發現餐廳黑板上都寫左其他更多嘅選擇。首先上檯嘅係西餐一定有嘅餐包，比起其他餐廳，餐包種類真係幾豐富下，有牛角包、提子包同餅乾。是日餐湯係番茄濃湯，質地幾傑下，味道新鮮唔假。沙拉有兩種可以簡，自己比較偏愛紅菜頭果款，加左黑醋，酸酸地比較開胃。芝士BBQ醬燒美國豬仔骨豬仔骨燒得好入味同好嫩，份量一個人食應該會覺得略膩，但味道有驚喜。餐會加埋薯條，薯條係幼身果隻，似McDonald，比起粗身薯條，口感不足。北海道帶子蘑菇意大利飯伴黑松露一上檯，見到三大舊帶子，非常搶眼，帶子味道都冇令人失望，夠鮮甜。不過略嫌黑松露味唔算太出，蘑菇切得太細，口感層次路夠兩杯熱檸水值得一提，雖然職員人數唔算多，但service唔錯，見冇水就不停斟，抵讚！