スーパー丼 (大埔超級城) (已結業)

入到餐廳，坐低無幾耐都覺得有少少伏，見無乜人又有位直入，坐咗喺角落位。睇緊餐牌期間，隔離枱起身走，除咗投訴職員服務欠奉，原來仲漏咗單，聽到話餐廳話再落可以俾八折佢哋。如是者，我睇完份餐牌，想叫嘢食，等咗兩分鐘都未見有侍應過嚟。於是我走去出餐個度同個職員講，我想落單。跟住有個貌似經理嘅人同我講，返去坐低，等佢同事落單。我心諗，新年流流，我唔同你講你同事好似啱啱先落漏成枱單。於是俾多次機會哩間餐廳。返埋位，坐低無耐真係有人過嚟落單，叫咗兩個餐，另外同職員講想要三杯清水。之後忽然間多咗人入嚟食嘢，坐滿人咁滯。時間慢慢咁過，我哋除咗三杯滾水，就無喇。後過我哋入坐啲客人陸續有嘢食上枱。初頭我見到啲一鍋鍋嘅壽喜燒，心諗，fine 主打嚟嘅，應該係大量預先製作。但又過咗二十分鐘左右，我隔離枱兩個丼飯同刺身都上埋枱，我就知我太仁慈喇。即刻問個職員係咪漏咗單，佢話幫我跟跟。之後佢返返嚟，係送餐俾另一枱客人，無理會過我。我就執嘢走。出門前遇到同我落單嗰個侍應，佢問我落咗啲咩，佢可以幫我跟跟，嗰下我火都嚟埋，礙於新年流流，無同佢理論，只係笑笑口咁同佢講，你連我落咗咩都唔記得。跟住走人。