果然冰室 (香港仔大道) (已結業)

果然冰室係 Let's Jam 嘅分支，啱啱開嗰陣走西餐廳路線，menu 有心機菜，後嚟可能唔係好切合社區需要，所以就轉咗走較平民化路線，好抵食。我叫咗個日式吉列豬扒咖哩飯，由於之前喺 Let's Jam 飲過杯用果醬沖，超香超好飲嘅玫瑰蘋果茶，所以今次專登加錢將餐飲轉做玫瑰蘋果果醬梳打。咖哩飯份量足，豬扒炸得好脆，上枱時非常高溫，要攤一段時間先放得入口😂，味道正常，肉質就稍為結實咗少少。咖哩汁較為稀身，不過咖哩味都算濃，入面嘅薯仔同紅蘿蔔又腍又入味，好食👍。至於杯梳打，可能因為係凍飲，玫瑰香氣大為減少，杯入面嘅冰塊亦令味道變得有啲淡，同期望有少許落差😐。下次緊緊緊記要叫熱嘅果醬茶😅。