Wildfire Pizzabar (諾士佛臺) (已結業)

Item: Wildfire Pizzabar (諾士佛臺)
Rating: 3
Author: 奧志雷

3.5

65 食評

味道

環境

服務

衛生

抵食

2969

尖沙咀

$101-200

意大利菜西式海鮮薄餅酒吧

奧志雷

等級4

2.1K

難得出城用餐，難得約到兩位美女雙伴晚宴，早少少到場打點一切，沒有預謀的 happy hour。雞尾酒十分有趣吸引，嘆多幾款先。大量色彩繽紛的雞尾酒，已經多年吸引不到我喇，可能大部份時間都留係新界某幾個地方。出城食飯場內好多美女，我真係好難專心嘆美酒佳餚呢。朋友們遲遲未到，實在太肚餓，點款小食頂住肚先。

雞牛羊豬都有齊，仲有海鮮、龍蝦、薄餅、等等等等。好多肉好多肉，骨子裡不折不扣食肉獸的我，見到口水流！還有獨特的餡角餅，第一次見要試試。暴飲暴食，美酒佳餚，美女相伴，歡樂時光。飲掉馬天尼、芝華士、積丹尼。消滅掉 24 安 T 骨扒、腸併、炸魷、焗薯皮、龍蝦湯、提拉米蘇、等等等等，實在利害。

遲兩秒行入門口，比前面兩條仔行先一步，見佢地仲係度猶豫之際，我即刻示意叔叔侍應想講我訂左位，竟然唔比機會我講野，不客氣地嚷著叫我等等先！態度好似話我阻佢招呼兩條仔款，我即時黑面有點上火！最終被那兩條仔霸左梳化位，激死我！好啦終於輪到我，我訂左位，依個叔叔侍應才如夢初醒。仲要安排我坐廁所門口，真係火都黎！我有訂檯架，唔坐呀！寧願坐門口旁比較熱，都唔坐廁所。

Stella 生啤，我多年的死穴，不知何解兩杯生啤就可以醉，雖然酒味中度帶清爽。百里香馬天尼 Thyme Martini，簡約的設置亦不失優雅！霧氣加微南雲朵的顏色如詩如畫，使我想起北海道的美瑛青池。酸酸甜甜夾雜少許咸味，酒香醇厚不濁，極合我口味。

肉桂蘋果威士忌，頭半杯加得芝華士不夠，甜甜的而散發微弱肉桂味。尾半杯落足芝華士，除酒味外什麼都飲不到。粉紅豹 Pink Pankther，啫喱味的什果賓治加即釘遼，後期慢慢滲出玫瑰花香，內外都極具浪漫風格。微風 Bay breeze，十足十有酒味的 pussy foot。早飲早爆早訓覺，食飽飲醉即回家休息。

青蘋果莫希托 Green apple mojito，清新味道不太甜，少少酸蘋果味，隱約有點薄荷香。咖啡狂想曲 Coffee dream，咖啡及雲尼拿味道突出極濃，甜味酒味也不弱。西班牙特飲 Sangria，已飲大半才覺得非常奇怪，似足果汁一樣越飲越甜，原來忘記將紅酒倒出，搞覺笑﹗鮮果味欠奉，陰沉，起碼不苦澀。

水牛城雞翼，西芹條芹斷絲連，爽脆多汁十分鮮甜。用手食最滋味最地道最狂野！只得茄汁及藍芝士醬，漏給水牛城辣汁嗎？嫩嫩白肉充滿肉汁，雞皮香脆，原味淨食已非常香口美味。

烤八爪魚鬚沙律伴焗新薯，嚥韌惹味的八爪魚鬚，粗粗的帶著濃厚海鮮味，焦香非常，越食越想食。新薯亦半點也不馬虎，焗得熱烘烘香噴噴，微爽而薯味甜美出眾，烹調出色！

鐵板香蒜炒辣蝦，海蝦球大大碌煎得兩面金黃，還保有可口蝦汁，爽爽彈彈有蝦味十分罕見，搭上蒜香辣汁更加醒神，沒有挑剔的空間。辣汁散發著鮮蝦味道，並不會浪費，用多士條索汁慢嘆，精髓所在，香口美妙。

美國牛腹肉扒 5 成熟，竟然會配上茄汁、黑椒汁及蘑菇汁，牛扒這情況少之又少，個人覺得極品靚牛幾乎不需要任何醬汁，食其原味已非凡脫俗。嫩紅牛肉吸引絕頂，肚腩軟塾無比。牛味清爽不膩，滴滴肉汁搶著跑出來，高質味美有嚼勁，食到停不了口，滋味無窮心心眼。

波士頓龍蝦尾龍蝦汁貝殼粉，份量跟我早餐食的火腿通粉相約。半隻龍蝦還要再開二，奀滋滋細細的龍蝦肉，我食虎蝦都大隻過佢﹗過熟韌韌，龍蝦味及海水味還有少許的。微暖通粉無汁乾爭爭，失敗中的失敗！免強有少許龍蝦湯味。

芝士蘑菇牛肉餡角薄餅，脹卜卜新鮮出爐滾熱辣端上，絕對跟薄餅百份百一樣的味道及質地。咬極都係感覺空盪盪沒什麼餡料，原來全部聚埋一邊角落，最後終於食到啖啖肉啖啖芝士。根本係食緊肉批的感覺，味道十足十罐頭忌菇忌廉湯。不要浪費清掉，話晒都皮脆肉嫩。

脆炸魷魚半份 Calamari Fritti，紅椒粉辣椒粉撞出十分熟識的味道，燒烤味粟一燒嗎？鬆化炸漿包著爽彈嚥韌多汁的魷魚鬚，完全度出奇地高！海鮮味濃，彷似置身大海一樣。跟著的醬汁同樣出色，白酸忌廉？原來係香蒜沙律醬，估您唔到又食您唔出。紅稀稀的汁？原來係泰式青檸辣椒醬，調過的泰式雞醬來的，不是馬虎倒出黎就算，有香草有鮮檸芬芳，舒服清爽醒胃不會甜淋淋。靜靜雞自私食，我一個人獨享，似乎有點唔夠喉呢。

脆炸薯皮，另類遍僻的演釋，食材各自各精采，感覺完全無溝通，外觀似十足焗薯皮熱食沙律。炸薯皮墊底灑上煙肉茄粒蔥花炸蒜，再後加篤酸忌廉，有趣有趣！不是焗釀薯皮來的，喜歡的可以拿著薯皮盛著煙肉茄粒蔥花炸蒜沾點酸忌廉同吃，百花齊放！不喜歡的可以淨食炸薯皮，夠厚身都有點薯肉食，薯甜外脆外軟，蠻香口喎。餐牌有寫車打芝士，但不知去了那裡，已溶掉在薯皮上？還是細粒到見唔到？

肉腸併盤 Sausage Party，由圖林根腸、雷根斯堡腸、紐倫堡腸及芝士豬肉腸組合而成，還有薯蓉及酸菜墊底，重量級輸出。熱烘烘高質洋腸，全部甜美各具特色，夢幻組合無械可擊！焦香肉甜、滴汁香醇、啖啖靚肉、不咸不嗆，沒有不好吃的理由。滾埋薯蓉搭堆酸菜齊齊嘆，美味到天涯海角！趁情食味道最佳。

龍蝦湯 Loster Bisque，極度厚身的湯汁，欠缺幼滑質地，普通龍蝦湯味道，蝦味特濃帶少少濁，沒有干邑沒有威士忌。半隻龍蝦肉作點綴，爽爽的有著微微龍蝦鮮甜。平庸免強合格，試試無妨。

美國 T 骨牛扒 U.S. T-bone Steak 24oz，斤量十足還配上大量伴菜，期待已久的主角登場，見到口水流，立刻進行掃蕩！乾硬焗蒜，不粉甜不潤澤，跟大埔 fat belly 天淵之別，有否邊焗邊搽汁架？無話特別好食，色香味正常美式烹調手藝，落味清淡的，牛味有的，肉汁有的，嫩紅色鬆軟的，蠻可口不錯！沾燒汁提提味會更精彩。

熱情脆焗蛋白餅，不愛甜品的我沒意見。色彩繽紛，擺位大方得體，賣相吸引。以為係雪糕，其實蛋糕來的，旁邊伴著少量新鮮雜果。