如月居酒屋

營業中

休息中

喺旺角女人街入面竟然有咁別緻嘅小居酒屋～踏入餐廳之前，仍然身處香港嘅繁華鬧市之中，然而一踏入門內，柔和嘅燈光，充滿日式風格嘅裝潢，我哋好似用咗多啦A夢嘅任意門，一秒就嚟到日本嘅居酒屋咁！坐喺入面再望出去門口更加有呢種感覺o̴̶̷̤ ̫ o̴̶̷̤✎ 吉列廣島蠔 有5隻炸蠔，蠔外面炸脆，食到入面有種入口即溶嘅感覺，淡淡蠔味，濃郁炸香味。伴隨酸醬一齊食，開胃！✎ 雜錦天婦羅 有炸茄子、炸金菇、炸魷魚、炸蝦同埋炸甜薯。炸茄子嘅炸皮好薄，入面鮮甜多汁；炸魷魚同炸蝦口感爽口Q彈，香濃蝦味並冇俾炸味蓋咗。天婦羅汁幾鮮甜。✎ 串燒拼盤6種 全部都係胖鹽燒同灑上胡椒粉，整體燒得好香。串燒分別有冬菇、牛舌、五花腩、鰻魚、雞軟骨同埋雞肉棒。冬菇帶有濃郁味道，質感厚實飽滿，有嚼勁；牛舌爽嫩，略帶肥膩感；五花腩表面略乾，再食落去質感啱啱好，有少量脂肪反而又冇咁乾；鰻魚肉質同樣厚實，香濃魚味；雞軟骨爽脆，雞味誘人；雞肉棒肉質相對軟糯，表面滿佈微甜嘅燒汁，沾上蛋汁，味道更豐富。✎ 帝王蟹肉炒飯微辣，用蛋、蟹柳、蟹肉炒成嘅飯。口感粉粉地，整體偏乾身，鹹香嘅味道～✎ 牛油炒枝豆 表皮帶有淡淡牛油味，入口清甜。