清玉 (已結業)

本身好少寫食評，但今次真心希望清玉可以改善，所以想講下最近幫襯後嘅感想。以前一直都幾鍾意飲清玉，一嚟欣賞佢有表態，二嚟覺得佢俾料唔孤寒，茶味突出，但最近幾次嘅表現真係令人失望。早排買過鐵觀音珍珠奶茶，已經覺得無乜茶味奶味，味道過淡。琴日買嗰杯輕盈百香果更加唔掂，杯嘢一睇落去已經明顯比以前淡色，飲落去仲要好似水咁淡味。即使以前都同樣有調整冰度同甜度，都唔會質感似水同埋淡味得咁過分。而兩位年輕男店員喺落單嘅時候依然繼續傾計，落單時講嘢又唔太清楚，搞到我唔知落單嗰位哥哥究竟係同緊我講嘢定同緊隔離位店員講嘢。(同埋俾完錢之後無出單，亦都無喺杯嘢飲上面貼翻label，如果係為環保而略過呢啲工序，我都會支持，但如果呢個係店舖下單時一向須要貫徹嘅程序，我就有啲疑惑，點解只有今次無俾單同label)唔知味道變淡變水係全線店舖都有嘅問題定只係個別員工沖調上嘅問題，但希望清玉都可以回復翻以前嘅水平。