La Famille

營業中

休息中

La Famille嘅蛋糕一直喺我嘅bucket list上面，最欣賞佢簡潔而精緻嘅賣相，唔會過份浮誇，而且身邊食過嘅朋友都一致好評，趁住朋友生日，順便滿足自己嘅好奇心。五點左右嚟到門市，蛋糕已經賣得七七八八，好在有提早預訂，唔係分分鐘買唔到想要嘅款式。品牌主打戚風蛋糕，口味選擇相當多，實在係花多眼亂，經過一輪內心掙扎之後，最後訂咗新出嘅法國香梨無花果。Bavarois係佢嘅另一款主打，望落亦超級精緻，底層係平滑嘅慕絲，面頭係加入食用鮮花同水果嘅果凍，淨係睇見都令人心花怒放。嬌滴滴嘅迷你戚風蛋糕亦非常吸引，比起鋪滿忌廉嘅大蛋糕，感覺亦冇咁邪惡，而且好適合二人慶祝。香梨無花果戚風蛋糕只有忌廉同水果做裝飾，賣相清新樸素，非常討喜，完全係我杯茶，朋友亦非常鍾意。戚風蛋糕口感鬆軟濕潤，一啲都唔乾，係我暫時食過嘅戚風蛋糕之中最好味，忌廉味道亦非常清新，帶有濃濃嘅奶香，配上香梨同無花果，食多兩件都唔會膩，非常有驚喜！食過唔少品牌嘅蛋糕，通常外表同味道唔成正比，La Famille嘅蛋糕完全係打破呢個舊有嘅印象，做得到內外兼備，完全將其他品牌嘅蛋糕比下去，難怪短短幾年時間就開多咁多間分店。