藍鳥葡國餐廳

營業中

休息中

【沙田區】【藍鳥葡國餐廳】尋日講起禾輋商場，見到自己好耐之前嚟食過嘅呢間平民葡式茶餐廳仲未執，就叫埋振華哥嚟一齊試。上次介紹個 post 原來已經係 1am0468，夠晒耐，相隔咗成八百幾個 post，我相信我再講，讀者都唔會詐型。入到去我哋都係試「午餐精選」，簡單啲。振華哥試 $63 嘅「牛骨汁香煎西冷牛扒飯」改配薯菜，個牛骨汁係幾香，薯菜就唔係炸薯條，係烚薯仔、車厘茄、紅蘿蔔、粟米，感覺健康好多。我就試 $62 嘅「葡式燒羊仔髀肉燒汁意粉」改配薯菜，啲羊起晒骨，啖啖肉，羊味又香，加上薯菜，感覺良好。一場嚟到，我哋仲試咗三款小食。首先係 $45 嘅「沙梨頭墨魚餅」六件，好香嘅墨魚餅，炸嘅火候啱啱好。而另外必食嘅仲有 $58 嘅「馬介休炸薯球」六件，從來馬介休球都係我去食葡國菜嘅必點菜式，咁平民嘅價錢都食到係正。薯味夠香濃，經濟又實惠。本來都冇諗住食春卷，但侍應話好正，咁就試埋 $45 嘅「春卷脆脆」六件，點知真係好好食，皮脆餡鮮，好有驚喜。嘢飲嗰度我哋各自加 $5 試咗凍「蜂蜜柚子茶」同埋凍「檸檬蜂蜜百香果」，都係清甜解渴之選。埋單價錢 $283，喪加小食嚟講唔貴呀。。。（地址：沙田