影片
港鐵香港站 C 出口, 步行約1分鐘
繼續閱讀
附加資料
只限會員
營業時間
星期一至日
12:30 - 22:00
以上資料只供參考, 請與餐廳確認詳情
招牌菜
餐廳未裝修之前有醫生朋友帶過我來食飯， 同職員傾開先知原來醫學會clubhouse個餐廳都可以俾一般人join個免費會籍去食飯呀!!當時填左D簡單既聯絡資料，好快就入左會。4月尾醫學會會所餐廳裝修後重開，又換左新大廚同管理，即刻去試一試佢晚市質素如何。一入到去個場明顯光猛同靚左好多，多左好多中式元素同擺設。會所座位唔多，但勝在可能唔係好多人知道，環境清靜。新餐廳換上全套新既餐具，我自己非常鐘意。一來就試一試佢地個premium tea “瑰麗堂皇”，荔枝香氣足，又解膩，順口舒服。之後講下當晚食左咩菜色~椒脆黃金豆腐，香口脆身，碟底無油，抵讚。潮式凍馬友，馬友賣相精緻，搭配不同醬料(有魚子醬)，一魚三食，有打卡位又好味。松露鵝肝花枝球，大大粒，點埋黑松露醬，香口惹味，仲識流心!!椰皇焗海鮮 - 椰皇味道清香，用新鮮原個椰皇整成，一打開已經香氣扑鼻，忍唔住食左少少椰肉，但怕食唔落後面既菜色，試左兩啖忍痛pass。爵士湯味道清甜，頗有驚喜，湯料(花膠)質量不錯，前面菜色偏香口濃味，飲完個湯refresh一下個味蕾，又可以繼續作戰。三色煎肉餅(日月星.琢) – 三款味道入面我自己最鐘意墨魚味，其中一款係芫荽味，有朋友係芫荽愛好者，非常鐘意，但我就不了。蔓越紅莓咕嚕肉，秘制醬汁調味剛剛好，咕嚕肉外層亦夠鬆脆，呢個必點，坊間都比較小見用紅莓做汁，酸甜平衡得好好。巧手香麻脆皮鹽焗雞，睇個樣我諗唔洗多講，皮脆肉嫩。牛肝菌飯，職員推薦我地加鵝肝潤腸，可惜大家已經好飽，無加到，但素食版對我來講有D淡味，唯有下次再試 。甜品個蛋白杏仁茶真係喜出望外，呢個必點，蛋白非常滑，甜味適中，本身我唔係咁鐘意杏仁個味，但呢個包括我在內大家都讚不絕口。價錢雖然比未裝修之前貴左些少，但係中環會所呢口價，呢個服務，CP值依然高企，抵食無投訴啦~
繼續閱讀
香港醫學會中環會所，跟其他私人會所不同，位於中環商業大廈，其實只是食飯的地方，也歡迎任何人去食飯。位於中環華商會所大廈二樓全層，光線充裕，中環晚上的人流比較少，餐廳通常都有位，會所私隱度較高。他們說最近換了個好廚師，所以我專程去試下菜。彩椒炒鮮鮑片，鮑片爽口，又有點鮮味，彩椒亦夠爽脆。砵酒生蠔煲，最重要是什麼？把蠔洗淨，煎蠔至呈金黃色，這個做到色香味俱全。千葉豆腐，沒有煎、炸、炒、鹵，我估計師傅想表現刀功，豆腐薄切，入口很滑，豆香亦濃。原條清蒸海斑，雖然我平時不太好食海鮮，但是這條魚太好吃，多肉少骨，清蒸火喉剛好。記得要預訂，才會有新鮮魚食。蛋白花雕蒸花蟹，師傅細心地把花蟹的殼拑開，花蟹啖啖肉，我喜歡。花雕很香，配上蛋白很吸引，花雕蛋白可以撈飯食。招牌炒飯，名字平凡，內容不簡單，炒飯香口而不油膩，飯粒軟綿有嚼口，我吃了兩碗，想添第三碗時，已經被朋友掃清。 除此之外，午市套餐有28道小菜選擇，兩位兩個小菜$256，三位三個小菜$384，菜式定期更換。另有六款套餐可選，會所推出不同系列秋冬菜式。也有增值選項，例如沙巴龍躉、燸米炸雞、八寶鴨，要提早預訂。https://www.thkma.org/central_premises.html總評味道：中上，新來的廚師師傅有驚喜；環境：小店，大概五六枱，會所私隱度較高；服務：即叫即做，上菜速度幾快；衛生：好，醫生地方，衛生重要；抵食：物有所值。
繼續閱讀
香港有好多唔同嘅私人會所，位於中環嘅商業大廈入面，美其名說係會所啦，其實只係食飯嘅地方，娛樂設施都未必有，裝修亦都只係普普通通，但通常呢種嘅會所嘢食質素都好有保證。香港醫學會就係其中一個地方。4位既晚飯套餐每位唔使$200就已經有八道菜。燕窩鷓鴣羹又滑又香口，面頭嘅火腿蓉味道好突出，肉類用鷓鴣，嗰種野味嘅香味並非豬肉或者雞肉可以代替。可能我食過太好食嘅蝦多士，呢度嘅蝦多士顯得平平無奇，而且油份過多，面頭嘅炸粉太多白雪雪咁，賣相就唔係幾靚啦。西蘭花炒帶子唔係一樣好特別嘅菜式，但呢度做得相對唔錯，帶子保持到鮮味，西蘭花亦夠爽脆。子薑菠蘿咕嚕肉用黑毛豬來做，呢樣都唔係特別嘅地方，呢道菜最好食嘅係子薑。子薑一年都有，而且都係佢哋自家醃製，周年我唔係太喜好醃菜嘅人都覺得好好食。子薑冇渣，甜酸辣嘅比例亦都做得好好。粟米魚柳係一道我由細到大都鍾意食嘅菜式，外面好多酒樓嘅炸魚菜式會用品質唔好嘅魚，但呢度用嘅魚柳都相當唔錯，而且炸得好香口。呢度用嘅瑤柱都好大條，味道亦都做得好。我係一個唔太食炒食飯嘅人，但佢嘅松子欖菜叉燒粒炒飯真係做得好好，Uncle Roger is not going to put his leg down。最後陳皮紅豆沙，陳皮味都好好，而且唔會過分甜，適合都市人低糖飲食。不過我就略嫌覺得稀咗一d。大抵來講呢度係一個人唔太多人，好適合幾個朋友坐埋傾偈食飯嘅地方，但就留意佢哋收工時間比較早，如果放工太晏嘅朋友就未必去到啦。
繼續閱讀
友人離港在即。我地一行12位女士。想搵個地方靜靜地又可以一班朋友食飯傾計。其中友人係會員一早就寫咗菜單。呢度招乎不錯。份量大。而且即煮。熱騰騰好好味。私隠度高。極力推薦。
繼續閱讀
好朋友最近去咗中環干諾道中附近工作，佢有一日打電話四圍查詢附近的會所怎樣入會和收費幾多錢，突然發現這兒今年之內免費入會，所以我來趁個熱鬧！點知每次每一台客人只可以攞一張申請表申請一個人入會，我今日趁着星期六有空約了兩位同業好友一起來午餐，每人花了$106，點了以下三個菜式：1. 鮮蝦荷葉飯 : 唔係最好味，但係都OK，有四碗飯咁多，好多雞丁。2. 翠塘豆腐：正！好滑！好好味！3. 涼瓜炒牛肉：ok！啲牛肉稍嫌硬左少少。糖水送半碗麥米粥，非常好味！並不太甜！環境幽靜，因為唔准搭枱，今日星期六小人啲，所以招呼都好。中環搵地方食午餐特別困難，呢間會所是中式的，以粵菜為主，菜式款式並不太多，但是勝在全部都是熱門的。打電話來訂枱的時候記住訂一張入會申請表了！
繼續閱讀