更多
2023-01-24
395 瀏覽
中午去咗基隆街搵朋友食飯,佢揀咗間叫「Marshal King」嘅餐廳,店名幾霸氣😎。門口設有室外座位,可帶埋寵物一齊幫襯。餐廳設有八款午市套餐🍽,價錢由$68至$98不等,跟餐湯同熱飲。考慮到份量都幾多,價錢可接受。食肉獸嘅我哋一人嗌咗一個扒餐🥩,有肉又有主食,好難唔飽囉。紐西蘭殼飼西冷牛扒配紅酒牛油汁($98),🐮牛扒賣相幾靚仔,食落肉味都濃,但煮得稍為熟啲,所以口感少韌;而紅酒汁配紅肉幾夾。主菜要咗意粉,估唔到係用上扁意粉,口感彈牙🍝。香煎厚切豬扒配新德里咖喱汁($88),🐷我認為豬扒唔算厚切,不過就有成兩大塊,肉質OK,冇醃到過火。🍛咖喱汁偏向港式風味,香而不辣,老少咸宜;食咖喱配飯就最適合不過。飲品方面🥤,雖然凍飲要加$5,不過堅係大杯。店員推介飲港式絲襪奶茶,果然係唔錯,茶底唔澀、口感順滑。另一杯就要咗草莓乳酸特飲(半價$21),甜酸味道幾特別,但甜咗少少。總括嚟講,呢日食咗大塊肉扒午餐,夜晚都近乎唔使食😆。午餐選擇集中幾款,睇餐牌晚市好似多元化啲。題外話,餐廳環境幾好,裝修簡約舒服。
張貼