美心MX (已結業)

$51 牛+豬肉火鍋再 + $4.5 有杯酸梅湯 穀飼牛: 牛肉味好濃, 雪花紋均勻分佈 豬肉: 切得大塊, 肉質鮮嫰 蟹籽蝦滑: 蝦膠彈牙, 有鮮蝦味 ***可惜以上好食的材料份量不多 其餘的以菜為主, 洗切得都算乾淨, 其中以黃芽白最甜, 唐生菜帶苦, 粟米不新鮮, 唔甜又唔爽口, 烏冬過軟, 唔夠吉野家火鍋的烏冬好食 湯底: 蕃茄湯 ---- 太清, 淥到 2nd round就飲唔出有番茄味 酸梅湯: 堂食都用紙杯庄住, 味道好濃好好味!

見萬寧收據下半部寫住 --- 買美心mx 御串燒便當, 買一客加$10就有多一客!!!!一客$29.5, 加$10多一客, 即可慳$19.5!!!可惜不太好食 ------------- 珍珠米過稔 飯面淋上太多好鹹的醬油 餸就普普通通 (餸有雞翼, 墨丸或豬肉丸, 車厘茄, 翠肉瓜.........) 芝士蛋糕幾"漏"最正都係杯 *** 蜜桃賓治 ***

去黃大仙整野既最後一日...午餐揀左美心mx$30一個飯...加汽水...個飯係黑椒牛扒配腸黑椒汁中有肉碎..唔錯..幾好味...不過略厭牛扒太薄腸仔..係司華力腸...所以冇得彈

上個星期去左黃大仙中心分店，叫左個冬瓜盅+牛肉餅點知一打開個牛肉餅...哇，得o個小小牛肉我即刻拎去問職員係咪得咁少，有個阿姐好冷淡咁答 -- "係呀~ 係得咁少架咋"我當堂打左個突，得咁少收39蚊，其他燒味都正正常常份量，點解個牛肉餅得咁少?出菜o個幾個員工即刻無聲出...靜晒所謂o既牛肉餅，根本就係 "山竹牛肉球" ，不過唔係整到球狀，而係肉餅狀份量少，我3啖已經食晒整個牛肉餅冬瓜盅，有少量菇，湯好淡似水一樣，因為點之前已經見到冬瓜盅size，所以可以接受(大約係兩個飯碗合埋o既一個球體咁上下大)如果大家去美心mx食野...可以揀其他野黎食...呢個牛肉餅...完全係浪費金錢

上個月食過牛肉喇沙,還想試下海鮮味道的,點知原來己轉了扎肉雞絲喇沙.哎,見到無乜野想食,最後在悶熱夏天還是吃碗粉吧 今次食了香茅雞翼先,雞翼炸得香脆,今次又沒有這麼乾,還保持著肉汁,只是醃得太重手,入面的肉超鹹 扎肉有薄薄的幾片,味道無乜.至於雞絲.WELL,印像中的雞絲多半是手撕,好明顯今次這個係用刀切,仲要大大條好工整添.咁大件應該唔好叫雞絲,叫雞條更為合適.至於味道預期中的無味,加埋只有幾條會唔會孤寒左少少呢?? 湯底同樣無乜椰香味道,或許這樣便加上大量紅薑 絲,等個湯叫做辣辣地啦! 這個喇沙真是唔多好食,上次的牛好味好多,而且牛的份量還多一點,總之一次就算了.俾得28元仲有更多好的店鋪選擇

tea今日鐵板炒麵餐 ------- 鐵板三絲炒麵 + 紅豆冰 ($21) 今次差左, 鐵板唔夠熱, 無熱氣冒出/"磁磁"的聲音 麵上淋上好多芡汁, 所以只有濕麵, 沒有乾身的脆麵 三絲幾足料, 有火腿, 冬菇, 肉絲, 甘荀, 芽菜, 份量算唔錯 朋友仔叫左燒鴨义燒瀨 ($17) + $2配可樂 此為"至抵系列", 已經係優惠價, 無得再用$2 coupon 相比起剩燒鴨瀨 $13, 此$17"雙併"燒味份量唔算多, 無咁抵食, 不過仍然便宜過大家樂

美心mx早餐選擇不多, 攞住張$2 coupon, 通常都會揀新出的"排包早餐" 排包烘過, 帶少少脆, 及帶出牛油的香甜 炒滑蛋蛋味濃郁, 好食過大家樂 雞肉漢堡扒比menu圖細塊好多好多, 味道普通 茄汁焗豆係凍的 腸仔鮮茄通粉都幾好, 算多餸, 湯底好似帶少少薑味包埋凍低糖綠茶, 原價$19.5早餐算多野食

下午五時多食tea, 經過美心mx時第一次見到鐵板麵都有做tea, 配埋紅豆冰都係$21, 仲可以用免費報紙的$2 coupon, 好抵 , 真係無第二間能做到這個價錢 鐵板黑椒牛柳絲炒麵--等左兩分鐘就有, 鐵板夠晒熱--tea份量細細碟--黑椒牛柳絲好惹味, 牛柳絲夠嫰--嫌d汁唔夠多, 食到一半時已無晒d汁, 剩返乾爭爭的麵 (下次再食要係取餐之前問下可唔可以加汁先) 紅豆冰--好濃的奶

晚上唔知食咩好, 黃大仙中心度度都要等位, 行過美心見差不多full 晒, 好多人食冬瓜盅見仲有coupon就來試下. 點知冬瓜盅售罄, 變左老火湯, 價錢就平左 $5. 滿$30仲送一碗紅豆沙 黑醋小排骨--好滑的肉, 多肉少骨 (近乎無骨). 醋落得頗重, 唔係太適應到 青紅蘿蔔豬骨湯--湯面好多凝結左的浮油, 不過飲落覺得幾好味, 落足料去煲 紅豆沙--起晒沙, 不過就過甜

tea 剩燒味湯瀨粉只售 $13一碗, 不包飲品, 若加coke都係加 $2 燒鴨瀨--雖然只售 $13, 但燒鴨份量足, 切得靚靚的, 尚算多肉食, 唔會多骨少肉--大家樂tea "$19包餐飲"有時佢d鴨都唔夠美心靚

事先聲明對食喇沙我無乜研究,也唔知甚麼叫正宗,只是寫番我食完這碗牛肉喇沙的感受.這碗喇沙牛肉有8至10塊,是一大塊的,並不是濕濕碎,原本可以加分,可惜牛味欠奉,有些還太熟.除了牛肉還有幾粒草菇和大量芽菜.湯底無椰香味,又唔夠香濃,喇沙唔會煮得好淋,份量女仔食係足夠,男仔可能差少少至於香茅雞翼真是食唔到有香料味道,跟只是普通醃完去炸的無乜分別.幸好炸得唔算乾.由於此餐不包飲品,最後加了8元的凍奶茶,加完先知又衰左,無奶味無乜茶味,只是有甜味,又唔夠幼滑,這8元真是俾得不爽28元的午餐再加8元奶茶,合共36元1

公司三文治係大家樂就食得多, 係美心食都係第一次 (都係因為coupon的誘惑)$22 公司三文治 + 炸薯條 + 凍低糖綠茶 雖註明"制作需時"要等耐些, 但都好快有, 只等左幾分鐘, 比大家樂快好多 麵包外層烘過; 白麵包夠新鮮 餡料好豐富 -- 雞蛋, 火腿, 生菜絲, 沙律醬, 咸咸地及幾嫰滑的雞肉, 蕃茄, 青瓜 --- 食材新鮮 大家樂配既係熱浪薯片, 美心就係炸薯條, 薯條夠熱唔怪得咁多人都讚抵食!!!

吞拿魚卷--餐牌上"圖片" -- 好正!!! 吞拿魚好多, 滿滿的, 約佔三分二, 生菜絲三份一--"實物" -- 原來好細件, 而且近距離望都唔覺有吞拿魚, 只有好少魚茸圍邊--結果, 攤開舊卷來睇, 吞拿魚真係少到.......... 雞翼 --雖然唔熱, 但都幾好食, 好食過大 x 樂--外皮炸到好脆, 裏面的肉脹卜卜, 好多肉食, 唔會像一些茶餐廳炸到乾柴咁--味道好好, 外皮好惹味, 內層亦夠味, 可見醃的時間夠長 粟米--仲以為像KFC嗰d稔到無晒質感無味道的粟米, 原來美心燒粟米唔錯! 粟米粒粒爽口, 唔會過稔, 亦保留了粟米的香甜

重踏美心mx, 只因阿蘇的so mx住家菜 *** $29.5 -- 蒸豆腐蝦醬豬頸肉 + 白飯 + (送的) 低糖綠茶 *** 蝦醬香味濃但唔會過鹹 ---- 屋企都有樽大澳蝦醬, 但都唔夠佢咁香 豬頸肉大件且厚身, 已悉心片去約七成肥膏. 因蒸耐左少少, 有少少硬 豆腐像用了挺身有豆味的百福豆腐, 撈埋清清地的蝦醬汁都夠味 標榜無味精, 有自己煮的感覺, 夠清因餸份量足 (意料之外), 又送大杯綠茶, $29.5 真係抵~ 會再試其他餸... ...

工作完畢後才有時間吃下午茶.今次食麵麵套餐$19,有蝦多士.薯條.粟米.水餃麵配熱好立克.好立克因為未攪溶唔多夠味道.蝦多士加上芝麻,多士炸得幾脆,上面那塊疑似蝦多士的物體超古怪,唔好食.薯條已經淋左,唔好味道.粟米應該未發育完成便被迫割下,又乾又無汁.最正常算係碗水餃麵,水餃的味道似某牌子,師傳唔知點解煮到兩隻都穿左窿無晒汁,今次的麵無乜鹼水味,只是仍然有點淋.麻麻地