牛品台式火鍋

營業中

休息中

酸菜白肉鍋酸味強烈卻唔刺鼻唔傷喉嚨，酸菜煮過後口感依然清脆重酸味。沙茶海鮮鍋口感自然鮮甜，沙爹花生味凸出🥜辣味只是輕微，加入青口、蝦🦐、大蜆，食到海鮮鮮甜味，濃郁又帶點清新，非常特別。湯底加入安格斯牛板腱、西班牙豬梅肉。安格斯牛板腱牛味濃郁，牛板腱無筋口而且軟嫩適中；西班牙豬梅肉肉質軟稔有一層白白嘅肥膏。台式小食方面最鍾意個甜不辣，甜不辣類似炸魚糕，因為經過油炸所以魚糕外皮香脆，魚糕內身有少少魚肉香味🐟口感煙韌有彈性。醬汁酸酸辣辣同甜不辣非常配。

1. 澳洲M9和牛肩胛肉肉味濃郁油脂唔重亦都唔會有難咬嘅筋位2. 鹿兒島黑毛和牛算係我咁多款肉類內面最最最 最推薦嘅。呢款油脂感會比澳洲牛肩胛肉重，所以更加有融化嘅口感🐮🐮3. 黑蒜黃金鍋帶黑蒜甜味同埋獨特香氣🧄、4. 牛品一品鍋加入大量牛部位，顏色深啡色，非常香濃。5. 麻辣鴨血麻辣汁同牛品一品鍋顏色一樣深，但會帶麻麻辣辣嘅刺激感，仲插左一條紅辣椒，非常吸睛🌶️6. 台式甜不辣🐟係用魚漿來油炸，外皮酥酥脆脆，內裡煙煙韌韌口感非常彈牙。表面加上橙紅色醬汁酸酸地🧡 第一次食已經榮升必食之選🌟

超開心啊今日終於約到大忙人爸爸嚟到呢間尖沙咀火鍋店食晚飯😋我地叫咗好多充滿台灣風味嘅食物 最推薦一下呢幾款！！炸地瓜丸子🍡 丸子外皮酥脆有一定厚度所以煙煙韌韌 又食到香甜嘅地瓜蕃薯味道🍠 而且金黃色見到就已經超級想食台灣第一鹽酥雞🐔每塊都有一粒粒嘅炸皮 食到少少鹹味都幾惹味澳洲M9和牛肩胛肉🇳🇿脂肪雪花同牛肉分佈平均 色澤又鮮紅色 感覺非常新鮮架 入口軟綿綿好似食棉花糖咁 半入口即化🐮芋圓甜品🥣有深紫色 淺紫色同黃色芋圓同埋愛玉 芋圓煙韌有少少彈性 愛玉就滑捋捋又清甜

☑️台式小食鴨血浸係麻辣汁裡面，鴨血係軟綿綿嘅口感唔會話太硬咬唔開唔化嗰啲。麻辣汁果然好有台灣嘅味道，香中帶辣辣中帶麻麻中又帶點甜，唔會太辣太嗆。☑️台灣直送台灣原味香腸煎到香脆，充滿油香。口感紮實，嚼勁十足，香腸外皮煙韌多汁。☑️肉類鹿兒島黑毛和牛會見到白色嘅油脂部分分佈比較少，但係食落肉質都好嫩好滑，完全無阻佢嫩滑嘅口感🐮西班牙栗飼豬梅肉就會見到每塊肉都有一層層白色嘅油脂部分，肥瘦均勻，口感鬆化🐷☑️湯底牛品秘製麻辣鍋顏色暗紅色好似好變態好辣咁，但其實味道接受度都幾高，麻麻辣辣又甜甜地好有層次🌶️

🌟澳洲m9和牛肩胛肉🌟有甜香的牛肉鮮味，食落味道好似比日本美國和肉更加香濃。 和牛雪花紋路明顯，肉汁豐富，渌烤放入口香氣迫人，口感嫩滑。🌟海鮮🌟叫嘅最貴嘅放題套餐牛御品除左雞肉牛肉豬肉仲有埋幾款海鮮類，蟹子墨魚漿、手工蝦滑、五味墨魚仔 同香辣青口。為穩陣起見我地都將海鮮放落鍋底度煮左一陣，發現原來我地本來叫嘅沙爹湯底已經包含左唔少嘅海鮮貝類😍 大蝦、蜆 同青口，所以加入我地另叫嘅海鮮就更有鮮味🌊 沙爹湯底花生味配搭海鮮鮮味剛好中和咗少少沙爹嘅膩感，都幾特別。

👉🏻台式蔥油餡餅👈🏻餅皮外層半煎炸至金黃色，Q彈有嚼勁。配上超級多汁又香氣十足嘅蔥油內餡，一咬開就會爆出香香嘅味道同埋超級多汁唔會乾爭爭非常好味誘人💚👉🏻元氣養生鍋👈🏻打邊爐又唔想太熱氣可以點做？就係叫個比較養生嘅湯底麻醉下自己🤣 呢款湯底有杞子 人參 多款養生湯底 仲有啲雞塊，飲到雞嘅鮮甜加上微微養生嘅藥材味道，味道有層次得黎罪惡感又會比叫麻辣湯底或者沙爹湯底嗰啲重口味湯底嘅低超級多🤣👉🏻鹿兒島黑毛和牛👈🏻貴價肉類呢度都有得點仲要同屬任食，肉質軟綿煮幾秒已經可以食得🐮

好味指數❤️❤️❤️❤️❤️衛生指數❤️❤️❤️❤️❤️抵食指數❤️❤️❤️❤️❤️種類指數❤️❤️❤️❤️❤️食物種類十分之多，由台式前菜小食到到肉類火鍋配料火鍋湯底再到到台式甜品都會有得比你選擇任食，絕對唔使怕無選擇或者食唔飽😉等我都根據食物種類每款推薦一兩樣先台式前菜小食嚟講個人認為最出色係皮蛋肉鬆豆腐，冰冰凍凍，滑滑豆腐配上帶鹹味皮蛋肉鬆非常開胃。火鍋配料嚟講西班牙豬梅肉肉質鬆化。火鍋湯底推薦叫鴛鴦，黑蒜黃金鍋配牛品一品鍋，一款甜甜地另一個就有濃郁牛味，配搭唔同食材有唔同嘅味道同效果，非常多元

😋熟悉我嘅朋友就知道 從來邊度有鴨血我就會喺嗰度😋呢度係一間主打台灣火鍋任食嘅餐廳，餐廳仲有提供台式小食、自助火鍋配料、台灣直送配料等等嘅任食，超級超級豐富🤰當中最吸引到我嘅係佢竟然有我最最最愛嘅台灣鴨血😍😍😍😍😍台灣鴨血浸泡係紅卜卜嘅麻辣汁裡面，味道偏鹹帶微微辛辣，不過辣度唔會嗆喉，反而非常帶出到鴨血嘅鮮甜味🦆咬落軟呼呼又有口感。齋係麻辣鴨血我都已經追加左五碟😆講返佢地嘅打邊爐，同樣叫咗麻辣湯底🌶️肉類嚟講最配係個鹿兒島黑毛和牛🇯🇵軟呼呼吸受哂麻辣精華

台式小食有台式肉鬆皮蛋豆腐 醉雞卷 牛品牛三寶 炸地瓜丸子 台式甜不辣 麻辣牛展 麻辣鴨血等等 連台式滷肉飯都有 非常台式非常台灣🇹🇼叫咗當中嘅兩款台式小食：台灣第一鹽酥雞同台灣蔥餡餅。第一鹽酥雞外皮炸法真係好似係台灣食到嘅一樣 有一粒粒嘅脆皮口感雞肉肉質多汁嫩滑🐔；台灣蔥餡餅充滿蔥油香味 咬開爆汁非常juicy🫓牛肉就鍾意個鹿兒島黑毛和牛 有一層白白嘅肥膏位置係外層 ；黑毛和牛肉厚薄度適中 有咬口又唔會太厚太鞋，有明顯雪花花紋 口感柔軟 牛肉同油花味道分布均勻

咁耐無食過出街食晚市 今日嚟到呢間尖沙咀新開嘅台式火鍋店，有三個唔同嘅套餐等級 我哋就叫咗最貴嗰款<牛御品吃到飽套餐>。套餐包括啲更加靚嘅牛肉moooooo🐮🐮就咁牛類已經有👉🏻澳洲M9和牛肩胛肉、安格斯牛板腱、精選美國牛胸腹、美國封門柳、牛舌片、安格斯一口牛、麻辣牛展，多達七款牛！！🤤咁多款牛裡面我就最鍾意個美國封門柳，原來封門柳肉質係全隻牛之中最滑溜嘅，而且每一隻牛隻只有一條😱所以十分珍貴。封門柳纖維好幼細所以口感很滑溜好容易咀嚼！牛魔王嚟到可以狂食牛類回本啦！！除左肉類仲有啲台灣特色食物👉🏻台式肉鬆皮蛋豆腐、 牛品牛三寶、醉雞卷等等，非常有台味

服務，食物質素都有待提升。只可以講餐廳環境係唔錯，地理位置都方便。首先食物種類選擇少，然後錯漏百出，我地叫左中間個價錢既嘢食，最後埋單就無啦啦變左最貴嗰款。我地經openrice訂4位，去到都係同佢講4位，但係因為有一位朋友會遲來，就問都無問我地就收走左一份餐具。埋單時張單都係無改返，只收我地三人價錢，（我地最後有同職員講返我地4個人，叫佢更正返張單）我地四個女仔大概1:30去到開始食，已經無曬一支支樽裝機桂花烏龍&白桃烏龍，剩下全部洛神花及罐裝飲品，問同事一個解釋都沒有，就係同你講唔會refill出來就走左去.跟著明明有甜品，甜品紙一開始無比我地亦無提及每人有一款甜品，要我多口問先話有，想叫芋圓，職員只係一句話午市無。 最惱係明明入座嗰陣係個職員帶位叫我地坐嗰張台，隔左一段時間就有另外一位同事語帶惡意咁過嚟質問我哋係咪自己私底下轉左枱，所以總結全程食得好唔開心！

第一次寫食評… 因為喺IG介紹新開火鍋舖 見佢個樣好似幾好食同埋幾吸引就去咗試吓一去到 要排好耐walk in 就算book咗位既人都要等 呢間火鍋鋪係翻版嘅牛大人 基本上所有嘅嘢都同牛大人一樣 但係價錢仲要貴牛大人少少 都唔緊要 小食方面 如果係食$219套餐嘅 原來係唔包埋海鮮 同埋其他嘅小食，而且出邊嘅蔬菜類別都好少。至於服務方面，啲侍應好似好呆滯咁，問佢攞多對筷子，佢都好似唔想比咁(因為我哋想攞多對筷子夾生野)總括而言，呢間野試過唔會再食，同牛大人相差太遠，職員仲要好似急住趕你走咁樣（even 係已經食到10點11點先閂門） 建議大家真係唔好去試，寧願食返其他火鍋鋪。性價比唔高

安格斯牛板腱 精選美國牛胸腹 澳洲M5和牛肩胛肉 牛舌片 紐西蘭羊卷肉 西班牙豬梅肉 西班牙豬五花肉 唔同豬肉牛肉雞肉類都應有盡有🥩安格斯牛板腱 精選美國牛胸腹 澳洲M5和牛肩胛 紐西蘭羊卷肉 我地都試左其中我最鍾意就係個安格斯牛板腱🐮一啖就已經可以食到軟嫩、鮮美、多汁嘅口感。放落牛品一品鍋有牛三寶：牛骨、牛腩、牛筋。其中嘅牛骨、牛腩、瑤柱、藥材、黑胡椒熬左足足8個鐘頭🔥牛味異常濃郁 非常真材實料嘅味道配上高質牛肉就更加好味，配海鮮類都會更加鮮甜 原來配搭牛骨味道都好正！

呢間火鍋任食餐廳位於旺區，尖沙咀樂道從尖沙咀地鐵出口只需要走大約兩分鐘就可以到達，再大吃一番！因為係樓上鋪頭所以餐廳環境都比較光猛而且私隱度比較高，坐得非常舒適💺湯底我地只需要加五十元就可以轉為沙茶海鮮鍋、酸菜白肉鍋雙拼鍋底🍲沙茶海鮮鍋係花生味濃湯底加入蜆肉蝦同埋青口，非常鮮味酸菜白肉鍋酸菜呈翠綠色，並唔似平時米線嘅深綠色酸菜。湯底酸味最爲突出，但係又唔會辣喉嚨，屬於比較溫和嘅感覺。白肉用嘅係豬五花肉，有明顯嘅油脂感同埋肥膏，質地軟綿入口半即化🐷

平時是台灣菜見到炸地瓜球或者芋圓嗰啲都會覺得好吸引非常想試試，所以食放題見到呢個炸地瓜丸點可以唔嗌啊😍 炸地瓜丸外皮酥酥脆脆裡面就軟軟糯糯好QQ，地瓜味道香甜味道超濃郁但又唔會過甜令你覺得好口渴要不斷飲水🍠另外都有叫台式肉鬆皮蛋豆腐，食到傳統醬油膏嘅味道。雖然可能會有少少偏鹹但因為皮蛋同豆腐都係非常夠凍，所以食完會有透心涼嘅感覺。台式麻辣湯底辣中帶甜非常有層次，見到鍋裡面有大量紅辣椒同埋辣椒乾🌶️越煮越惹味，放入靚牛肉就更加滋味