烏蠅館 (九龍中心大廈)

營業中

休息中

有朋友訂咗枱去尖沙咀烏蠅館吃晚飯，見餐廳座無虛席，但好快有位。餐廳簡樸佈置，柔和燈光，而分咗兩個區，噪音唔會互相影響，食得自在啲。餐廳烤魚出名，就點咗個小辣嘅招牌香辣烤龍躉，如果食得辣嘅朋友，就要選特色泡椒配大辣，可以過足癮。熱燙嘅烤魚端上檯時已聞到辣味，打開蓋香味更加一湧而出。龍躉嘅質地好滑溜，烤得剛好夠熟，唔會過火，烤盤上的素菜，雲耳、芋絲及萵筍，吸滿了醬汁，非常惹味。之後侍應添加上湯轉火鍋底，滿足我哋打邊爐嘅口味。羊肉片切得夠薄，一放入烤盤灼幾下 ，入口爽滑，冇羶味，鮮甜 可口，一人一塊，好快就KO一碟。如喜歡爽爽脆脆口感嘅朋友可以選豬黃喉試試，無論灼幾耐都保持爽脆，配合湯汁一齊食 ，就唔會太單調。墨魚滑係必選，按你喜好逐一逐一撥落去煮，十多分鐘就食得，好味又易食。大家都鍾意食菌類，叫咗碟姬松茸，由一開始放落湯裏面，直到我哋食晒其他食物時，姬松茸都冇變色或變軟，入口仲有一陣噏味，勉強食咗。飲品有凍碧螺春加奶蓋，既有淡淡茶味亦有奶蓋嘅香味，可以中和火鍋嘅油膩。

最近經常與兩個同事突然約食飯。決定出尖沙咀搵好野食。最後朋友推薦食烏繩館。6點WALKIN入去，佢話7:30 後有BOOKING 問我地可唔可以。無多諗既情況下話可以，但我地錯啦。建議大家都係打電話BOOK定好點。因為太趕啦，無得一路吹水一路慢慢食。我地叫左個招牌香辣烤魚（多寶魚）小辣，佢地送左3個時令素菜（木耳、金菇、蘿蔔）。材料叫左蜂巢豆腐、蟲草花、寬粉、雙拼滑（蝦滑和墨魚滑）。當然梗係唔少得飲啤酒🍻湯底方面：夠辣，湯底夠甜。多寶魚肉質嫩滑，口感細緻。特別推介要加蘿蔔和寬粉，寬粉夠煙韌和夠入味。蝦滑都唔錯，夠爽口。但墨魚滑就一般，唔夠爽口和彈牙。蜂巢豆腐個質感唔算好強，可能雪得太耐。整體來講都唔錯。聽朋友講冒菜幾好食，下次有機會黎尖沙咀會試下佢既冒菜。

琴日同朋友仔去咗烏蠅館慶祝生日🎂早幾日就已經打電話去訂位，店員會提醒麻辣火鍋同埋呢烤魚先可以提早book位. 早1日店員都好細心咁問想要啲咩海鮮🐟原來呢度嘅海鮮係即日到貨，所以我哋早一日就已經要確認. 當日我哋有預備蛋糕，砌餅費$58-，店員亦都好細心問有冇話點樣擺設、想幾時上蛋糕、有冇啲咩人唔可以比佢知㗎⋯而且早到15分鐘，佢都可以俾客人入去等. 佢知道我哋差唔多齊人，都提議我哋上咗湯料先，因為要預熱返大概10至15分鐘. 最後我哋叫咗唔同嘅海鮮、丸、肥牛、蔬菜同埋每人叫咗杯嘢飲. 杯黑糖鮮奶好值得叫，因為好好飲、好解辣. 油炸鬼就一定要嗌，海鮮都好甜、好新鮮. 最特別嘅部位喺佢嘅火鍋湯底，原本喺濃縮哂一塊塊咁，加水後會變咗正常麻辣樣. 味道方面我覺得喺譚仔3-5少辣，店員話佢食開譚仔少辣就覺得唔辣. 補充麻辣火鍋就冇得揀辣度.

由舊舖幫襯到新舖，烏蠅館既麻辣火鍋fans～好耐無去打邊爐，今日約食火鍋，一定要黎烏蠅館,仲要係食麻辣火鍋，因為貪佢夠麻夠辣，又唔會太油。呢度個麻辣湯底係用一舊舊既固體麻辣，用開水將佢煮開，之後就變成好味道既麻辣湯。配料叫左鴨血，個人認為麻辣鍋配鴨血係好好食，而且寬粉都同麻辣火鍋好襯，吸晒湯底既麻辣味道。另外推介呢度既雲吞同韭菜餃，餃皮薄，鮮蝦大大粒，韭菜餡份量夠多。蝦滑咬落爽口，有嚼頭。如果中意食麻辣火鍋，推介黎烏蠅館一試！

以前會去深圳食烤魚，因為價錢平，配料款式又多，同朋友講起都有啲掛住呢種味道，所以搵吓香港邊度有得食今次去咗烏蠅館，發覺年青嘅顧客都好多，可能因為有得食烤魚之外，仲可以揀火鍋同埋冒菜，咁多元化令到吸引咗唔少顧客我同朋友揀咗香辣烤魚，揀咗最貴嘅龍躉魚，魚質幾爽口，唔算太多骨，味道鮮甜，雖然唔算好大條，但魚嘅質素都配合到個價錢每份烤魚都送三份素菜，今次係雲耳、芋絲同萵筍，三種素菜都能夠吸晒湯，十分惹味，我尤其喜愛萵筍另外叫左蕃薯粉，發覺煮完之後好煙韌，透明狀態係最適合食，可以索晒魚嘅精華，亦比較飽肚，值得一試蜂巢豆腐有十幾粒好抵食，係火鍋同烤魚嘅好配搭皇帝菜味道比較特別，有點似茼蒿，食下可以平衡下油膩嘅感覺飲品揀左消暑嘅檸檬蝶豆花，賣相吸引，酸酸甜甜好開胃奶蓋高山銀絲綠茶味道比較淡，因為本身茶係冇加糖，而奶蓋都唔太甜，成杯清清地掛住烤魚嘅朋友可以嚟試吓，除咗香辣口味，仲有其他泡椒、蒜香等，相信總有一款啱大家

今日食寶林川式麻辣雜醬撈麵，有小辣同大辣，同埋幾款麵食選擇，另外可以俾錢加餸，蔬菜五蚊一個，肉類八蚊一個，我叫左小辣同火鍋寬粉，另外加左五個蔬菜，黎到碗麵另外仲有油麥菜同肉碎，肉碎炒到好香好濃味，要撈埋麵一齊食，味道唔錯，埋單麵係四十七蚊，抵食！

一睇到餐廳名叫做烏蠅館，未必會知道係食緊咩菜，但係原來呢一間餐廳最出名嘅係食冒菜例如四川麻辣火鍋，啱晒愛辣之人🌶之前都有去開呢間火鍋店，今次再去先發覺原來改咗地址😂以前食過烤魚，感覺唔錯，今次就試吓佢嘅麻辣火鍋，挑戰吓究竟自己嘅辣度可以去到邊😎一坐低枱面已經放定左醬料（$10），我哋叫嘅呢一個重慶牛油麻辣火鍋（$108）食落比望落更辣，熱辣辣食、個嘴真係好麻！朋友都話我食完個嘴腫咗🤣🥲火鍋料方面，我哋都叫咗唔少主食，包括：四川寬粉（$28）Q彈口感好特別！羊肉片（$118）花雕雞 半隻（$78）雙拼菜類（$38）- 唐生菜、皇帝菜雙拼水餃（$78）- 西洋菜餃、韭菜餃新會小青柑普洱 + 奶蓋（$23）由於太辣，我仲叫多咗杯嘢飲😢 本身未飲過新會小青柑普洱、所以就叫咗杯嚟試吓，仲加埋我至愛嘅奶蓋❣️入面仲有陳皮，後勁都幾大😂茶味都好特別，好有甘味，不過略略覺得奶蓋同呢一種茶唔太夾🙈

之前已經試過清湯 今次試下新野 就嗌左個BB辣 岩哂我呢D唔太食得辣既人又好多款式可以食 唔會好似平時出面食野 來來去去都係果幾款食材食落去都好夠麻  D菜留到最尾先食 吸哂D味 真係好C服

一向都知道尖沙咀多好野食，是日想食麻辣火鍋，朋友就帶左我黎呢間烏蠅館食麻辣鍋。一坐低即刻點左個麻辣鍋，用一個大鐵鍋放左幾舊麻辣膏，一落滾水就會化開，味道好濃，而且夠麻辣，一大陣麻辣味撲鼻，如果覺得太辣，仲可以沾一點麻辣火鍋專用麻油，可以減低辣度。見到個鍋紅卜卜都好興奮，岩晒麻辣控既朋友火鍋配料方面我哋點左寬粉，食麻辣火鍋識食一定係食寬粉，吸晒湯底精華，建議食其他配料前先食寬粉，如果唔係之後食會好辣，當然如果你食得辣可以之後先食。我哋重點咗鴨血、餃子拼盤、墨魚滑等等。麻辣火鍋點少得鴨血，鴨血滑溜新鮮，雲吞同韭菜餃都好大粒而且餡料好足，墨魚滑份量好多，二個人食綽綽有餘。

尖沙咀有不少四川菜選擇，個人都幾鍾意食辣，既香口又可以去濕，哈哈。嚟到亞士厘道全條街都係食肆，有火鍋，日本菜，越南菜。今次來烏蠅館食吓川菜，平日晚上七點客人已經坐滿，好旺場。較多人食一碗碗粉麵，見到有粉絲，土豆粉，撈麵揀。粉面基本可以揀六款配菜，都好抵食，再加新鮮水餃，有芹菜牛肉，蓮藕豬肉，水餃款式比較少見。今次order烤魚，有泡椒鍋，招牌香辣，麻辣。waiter介紹泡椒會比較少油，但必須係中辣，冇其他辣度可以揀。雖然我最近比較熱氣，脷底生左兩粒大飛滋，但為咗食美食，我豁出去。泡椒鍋嚟到好香，有少少酸菜，蔥花，果然係好少油，龍躉魚好滑。我本身有金菇，木耳，萵筍，金菇吸晒湯底脆脆的，正。寬粉煮1-2分鐘至透明，滑脫脫好味。

之前都有食過，今次就試下佢個火鍋🍲湯底方面我哋揀咗滋補菌湯🍄真係落足料去整㗎😚入面仲有蟲草花添！-​🔖雪花肥牛💰128打邊爐當然唔少得肥牛啦☺️有時係出面見到嘅肥牛雪花位置會有好多，見到都覺得唔應該食咁多🤣但係呢到嘅就唔會🤓而且亦都唔會因為咁而令個質感變得嚡口😛💫推薦指數: 8.5/10🔖鮮脆響鈴💰48其實呢個好抵食，有成8舊響鈴😌索哂個充滿菌香嘅湯底，好正啊🥳💫推薦指數: 9/10🔖芝士丸💰48又係俾佢嚇親咗，呢個價錢有10粒芝士丸🤣外層爽彈，而入面就充滿住咸咸香香嘅芝士，做到拉絲效果㗎🧀💫推薦指數: 8.5/10🔖墨魚滑鮮蝦滑💰98墨魚同鮮蝦嘅味道都好突出，比較推薦鮮蝦滑🦐質感夠哂彈牙😚💫推薦指數: 8/10

第一次見到烏蠅館依個名, 仲心諗究竟點解要用烏蠅黎做店名, 上網睇下, 原來係四川, 食物需做到頂級, 先會被人尊稱作烏蠅館。依度主打冒菜, 烤魚同埋火鍋, 而火鍋更加係近來新推出, 反正我第一次食, 就先試下火鍋啦~重慶牛油麻辣鍋大大鍋, 湯底以大蔥, 薑, 辣椒同埋麻辣磚製成, 店員會加入高湯,  煲至麻辣磚溶化後就成為一鍋香噴噴湯底! 味道超香濃, 唔會死辣, 冇令我失望!!自家西洋菜餃 $68一碟8隻, 就咁睇都見到粒粒飽滿, 咬落去皮薄餡足, 啖啖西洋菜同豬肉口感, 自家製果然係寧舍唔同。竹笙 $48竹笙份量多, 吸哂湯汁勁香, 惹味過癮。花雕雞半隻 $78雞件已經入哂味, 就算放左落辣湯煮, 表面有麻辣味但都唔會蓋過哂花雕香。飲品+$18叫左特飲玫瑰蜂蜜, 好多玫瑰花瓣, 味道清香, 加埋蜂蜜既香甜, 感覺滋潤好岩女仔飲。原本想叫多幾樣海鮮, 但可惜海鮮類要早一天預訂, 想食既就記得留意番啦~

呢間餐廳都幾出名，今日終於有機會試吓佢。餐廳裝修用咗柔和嘅燈光，亦都坐得舒服。佢有烤魚，火鍋同冒菜可以選擇，今日我就揀咗烤魚。烤魚有好多唔同嘅口味可以選擇，個人唔係好食得辣，所以就揀咗蒜香烤魚。蒜香多寶烤魚佢一個烤魚會有三個指定配菜，今日係木耳、萵筍同埋芋絲。烤魚嘅鍋底好多蒜，仲有洋蔥同埋孜然粉調味。所以一打開個煲就好香。而多寶魚嘅魚肉都好滑，好食😋。烤魚可以另外再叫配料叫自己鍾意食嘅配菜。玫瑰蜂蜜 桂花蜂蜜飲品唔算太甜，清清地，飲落去有淡淡的花香味。茉莉蜂蜜冰粉食完烤魚再食碗冰粉真係幾舒服。佢冰粉加咗唔少茉莉花，好食之餘賣相仲好靚。

今日專誠嚟呢間舖頭食烤魚，因為見佢唔係好貴，係咁多款唔同嘅做法入邊我哋揀咗傳統麻辣烤魚同龍躉魚，餐廳話龍躉魚係最鮮味嘅應該最好食啦。我哋叫咗小辣都唔係真係話好辣接受唔到。一大鍋烤魚就喺我哋面前勁有麻香，見到條魚唔係浸喺湯入邊好似同出邊嘅食法有啲唔同。店員建議我哋食咗條魚先，之後會俾我哋加湯再浸其他配菜。店員果然冇推介錯，魚肉好滑，而且唔會好多骨。因為每份贈送三個時令素菜，咁啱今日送嘅有萵筍、雲耳同杏鮑菇，都係自己鍾意食嘅菜。配料全部已經浸到好入味。再另外叫嘅配菜價錢唔係好貴。我哋加咗寬粉同蜂巢豆腐。寬粉浸得耐會好食啲因為可以吸到個湯嘅味道。蜂巢豆腐個質感唔算好強，可能雪得未夠耐。整體來講性價比算高嘅。

出街食晏多肉少菜，如果想食多d菜既，呢度可以幫到你。有六個餸或者八個餸揀，可以全部都係素菜，仲有幾款湯底選擇，個人喜歡菇菌湯，再加一個麵食（火鍋麵出邊比較少有），買單都係$55