澳門翠苑餐廳

營業中

休息中

前兩天來呢到開餐叫了蕃茄牛腩通粉 ---幾好, d湯混入薯仔,粉粉地,飲左唔口渴 好大碗, 用料充足，有牛腩,蕃茄,紅蘿蔔, 薯仔 等，通粉 texture okay, 唔會太腍咖喱牛腩農夫包 --- 個包夠鬆化, 牛腩夠腍，咖喱汁okay老闆話凍咖啡最出名, 果然好好飲,有好濃郁既香味, 值得一試

今晚食左個蕃茄牛腩通粉套餐, 連一個暖笠笠脆卜卜牛油朱仔包, 仲有杯熱飲 tim.首先係茄牛通, 整體上梗係好味啦, 但牛腩似乎 "鞋" 左 d, 而且咬落去沒有啖啖肉汁0既牛肉香味, 扣左分. 不過, 個湯底好好味, 湯濃味香, 我飲到一滴都冇淨(我平時係唔會飲晒 d 湯0既). 若然 d 通粉可以再彈牙少少, 咁就真係無懈可擊!估唔到0既係, 套餐奉送0既牛油朱仔包, 本人就認為屬高質數食物, 暖笠笠唔在講, 外皮好鬼脆, 加埋半溶牛油一起吃, 既可帶出牛油的咸香, 亦可襯托出包包像新鮮出爐般的感覺.由於係食晚飯的關係, 怕飲左咖啡瞓唔著, 如果唔係一定會試埋佢地有名0既冰咖啡

我同餵食朋友去吃,兩個人的肚子都有的餓之前搵左好耐都搵唔到..原來係朗豪坊後面隔一條馬路過完馬路 就見到電梯 有個牌寫住熟食中心上一層就係架喇一入到去冷氣真係凍左少少見到尼到食評話豬柳幾好 就揀豬柳咖哩豬柳農夫包餐- 農夫包 真係好大個 唔怕唔夠飽 - 豬柳 我一食 <豬柳又林又入味 都未食過咁好味既豬柳 雖然份量得5-6舊 但真係好好好味 唔係誇張=.=- 羅宋湯 好似水溝湯 又唔好味 飲左幾啖真係唔想飲- 咖哩汁 唔太辣 都叫岩岩好 因為我自己食得辣所以我覺得無乜味....- 咖啡 唔同出面既咖啡 真係好飲好多 上面仲有D咖啡粉 得閒上黎飲返杯都抵 真係飲得出唔同!!!- 奶茶 尼個比較遜色..一飲得奶茶 無茶味總括係幾好既我同朋友2個人一個餐都食得好飽豬柳真係好正!!下次都會黎試..不過豬柳少得制 個包又太大好似口感不太好!!價錢：咖哩豬柳農夫包餐，另加奶茶　＄５４　　　餐＄４３　奶茶＄１１

翠苑ge茄牛湯粉真係百吃不厭，我已經唔係第一次食，依然覺得好好食，令我忍唔住要上嚟寫吓好評俾佢。嗰日同朋友叫咗2個set，一個係蕃茄牛柳粒湯螺絲粉轉豬扒包餐，另一個係咖哩牛腩農夫包餐。1) 蕃茄牛柳粒湯螺絲粉餐：首先講吓個茄牛湯粉，平時佢係俾通粉架，唔知點解嗰日轉咗螺絲粉，一樣咁好味，個湯好有鮮茄味，加埋啲牛柳粒，更加帶出湯ge鮮味，同埋見到啲茄油浮晒上面就知個湯都應該煲咗唔少時間，所以先有咁好味，而且食完唔會覺得口渴，應該無咩味精，通常我都會食完啲粉再飲埋個湯；我地加錢轉咗豬扒包，個包脆卜卜，塊豬扒好"林"，加埋夾咗洋蔥(洋蔥係炒過的)，又香又鮮甜；金牌凍咖啡，喺冰上再灑上一啲咖啡粉，令成杯咖啡更香濃，個樣又吸引啲，一個字－"正"!!2) 咖哩牛腩農夫包餐：農夫包外脆內軟, 麵包質感夠"煙un", 咖哩牛腩又炆得夠"林"，啲咖哩汁好好味，唔太辣，用嚟點麵包食一流，不過個農夫包size真係大咗啲，最好多啲人share會好啲；個蕃茄湯其實同湯粉嗰個湯底差唔多，都係咁好味，咁有茄味。雖然環境就麻麻地架啦，尚算坐得舒服同埋乾淨，而且勝在夠平夠抵食，我一定會再繼續幫襯。

上星期同老婆來試，叫了一個葡式鮮茄牛腩粒通粉餐同一個咖哩豬柳農夫飽餐。葡式鮮茄牛腩粒通粉幾好食，不過呢個通粉其實唔係太難煮，應該在屋企都煮到。至於個農夫包，個賣相幾好，不過真係鹹左d ，如果淡一d ，加番d 生菜同蕃茄，就 very good 啦。

哈哈!住得近呢度有個好處,就係可以久唔久黎食澳門翠苑既農夫包喇!今次試咖喱豬柳夫包,感覺又同上次唔同喎!上次係牛腩,可能牛腩味道本身較濃,所以牛味都幾出,而今次呢,其實佢俾既咖喱汁少左好多,個包因而比較乾身,但係反而咖喱味更出!不過,今次個咖喱稀左同淡左,顏色都淺左,希望唔會係打算減材料減成本啦!個包依然新鮮依然脆,至於個柳呢,又唔錯喎,切開細細片易入口,而且唔靭,無乜筋又肥膏,我覺得算係幾高質素。雖然一直都唔覺得佢既凍咖啡特別好味,但係次次幫襯都要飲番杯,因為係佢獨家嘛!咁個水準又真係幾保持得到既,起碼次次飲親,味道同感覺都係一樣,唔會時好時壞呀!個湯呢,都係咁啦,飲唔飲都無所謂咯!呀,係呀,服務好好呀!我坐得好遠,但佢都攞到埋黎我果張桌呀!

真係唔錯呢~~~想試好耐~~~~見到咁多人都話正!!尋晚同個同事去食晚飯!!好在叫左一個餐share~~~唔係一定食唔哂~~~~其實兩個女仔share都食唔哂呢!!個包好大個,而且好脆呀!!d雞肉好滑~~~好好味呢!!個羅宋湯都ok,杯咖啡我就無飲~~~不過我個同事就話唔苦!!都唔錯!!最後個環境都幾乾淨呀!!其實個到仲有唔少食市~~~~下次可以試埋其他既!!

農夫包農夫包邊度有得食.......多得openrice 資料﹗~^^~兩個月前我同女朋友搵到農夫包食啞﹗諗住一人食一個啦﹗估你唔到個包真係好大啞﹗重有湯飲添啞~^^~兩個人都食唔晒﹗好好味丫﹗我同餐廳講想要個多紅豆O既紅豆冰﹗佢話唔叫都多﹗睇下又真係好多喎﹗無介紹錯~^^~

依度好容易搵西湯唔岩飲可以轉中湯服務態度好好有人送埋黎好味

雖然個包好大個, 但牛柳好似沙爹牛肉包既普通牛肉.咁既價錢只會試一次!但職員幾nice~

5月8日, 即係尋日, 第二次黎翠苑食農夫包啦! 上次唔知佢既咖啡出名所以無試到, 今次一於同朋友一人一杯嗒真d味道揀左咖喱雞農夫包, 兩個女仔share黎食, 俾錢後拎住號碼牌, 坐定定等佢地將份餐送黎, 以food count 黎講算係唔錯既服務啦.等10分鐘左右, 食物到可以開大餐啦! 先飲一啖咖啡...真係好香喎, 而且唔會太濃, 因為我唔係太受得港式咖啡, 諗住都係試下, 但飲完翠苑杯好味咖啡好在都無咩事~~~農夫包依然出色, 好大個好脆, 夾埋咖喱汁+雞件一齊食味道十分好, 朋友亦都讚不絕口, 讚!p.s. 個包真係好大個, 要2個人share黎食先剛剛好, 否則食唔晒就好浪費呢~~

其實早在未見咁多人讚之前, 我已經成日見到呢間野有樣叫"農夫包"o既o野賣, 點知....過左幾個月, 原來咁多人讚...好! 又去試o下...先講講總結.....um...我會覺得...係 "特色" 勝於一切.特色在於:1. 個名特別2. 個包好大3. 咁大個包又焗得幾脆好得意4. 咖啡有咖啡粉5. 好小咁樣食咖喱6. 咁o既地方又會有d 咁o既o野食就係以上特色, 就好多人都去試了...其實...我又覺得味道冇咩特別, (絕對唔係差, 但只係一般咖哩囉)...但係..食完我都唔知點解佢叫 "農夫包"~

星期天不知怎地熱得不得了﹗旺角正頭焗到流哂汗，急急步跑入朗豪坊來呢度食午飯﹗來呢度當然就係食農夫包，上次食左咖哩雞，今次本來想試豬的，點知來到的時間我地食左兩口先知原來係牛的﹗是旦啦，牛豬都不抗拒，牛腩煮得很腍，入口無渣充斥牛羶香，主角農夫包岩岩焗起很脆口很香，用來蘸咖哩真係一絕，成個食哂﹗跟餐的羅宋湯好多料，啖啖都有我最鍾意的紅蘿蔔，夠哂濃郁﹗今次我地都有飲到凍咖啡，夠香夠滑又大杯﹗好味道﹗滿足的一個午餐﹗

睇左 Openrice 都有一段時間 , 昨天終於有機會係旺角試一試這間長期在傍首的餐廳。昨天下午 4點左右入到去 , 其實講真我覺得食個 Tea , 仲係食個包要 $43 都幾貴 ....加埋杯凍咖啡 .... $45 , 不過既然來到一定要試一下啦 ~~我睇過之前的食評 , 通常都話佢地比得很少料 .... 我估牛腩 , 牛柳份量會更少 (料貴ma) , 豬柳反而個人不特別偏愛 , 所以選了咖哩雞農夫飽 !又係果D, 等了十分鐘, 有人拿過來 .... 有四五件雞左右 , 都一般OK 大件 ~~外面個包 .... 脆 , 內 .... 軟 , 感覺超好 !!! 我覺得愛包之人 .... 如你通常愛吃酥皮湯 , 而又通常都一定會食晒上面個酥皮 .... .我估這類人一定會 ....... 喜歡及滿足到你 ! 你知啦 , 口味因人而異 , 有時你都會見到D網評時好時差 , 我叫一個不愛包之人去試 , 多餘啦 ..... 包很大又脆 , 汁足夠你點 , 夠味夠辣 , 夠飽 .... 而我一個人食得晒 , 就知我幾愛包 , 同埋幾好食 , 同埋幾大食啦 ~~~ 呵呵 ! 總之就好味啦

OpenRice長期榜首，皇者一樣o既咖哩農夫包究竟係乜料！？話說小弟傻仔行錯路，由旺角街市行返轉頭攪一輪先搵到傳說中o既旺角熟食中心。搵到楝o野仲要行左行右先搵到路上去‥上到去都OK喎，比想像中光猛同乾淨，有少少草根Feel，o岩Feel。查實去到正門一入右手面第一二個鋪位就係翠苑，顯眼得出奇。大大個牌上面都係一堆咖哩農夫包餐，當然包農夫大包一個，湯一碗，咖哩汁一碗同飲品一杯。呢面俾錢買個咖哩牛腩農夫包餐o個面老細已經問我坐邊，原來呢樹食飯興送餐到你面前，我見其他檔都有咁做。講返個農夫包餐，又真係好似幾多o野食，個湯唔錯喎，料又多，D牛腩仲好冧添。主菜大包，脆喎，但D料可以話好少‥得三四舊牛‥包入面汁又唔多，個包就真係大囉，搣細舊細舊點咖哩汁食，好飽架都，仲會整到四圍包碎，但D汁查實冇乜味‥個包又大喎，但又少料喎‥食到好悶‥講到杯咖啡，真係點綴，每當我食到時飲返啖，簡直冰凍同爽口。小結一句，榜首食物不過不失，又唔係平，試過算嚕。