漁民麵館 (已結業)

週末午市行過都有條龍。今日周三普通午餐, 有位。梗要試下花膠啦。餐牌只看到 "花膠冬菇肉燥飯", 就呢個。到面前第一感覺係 咁細兜嘅! 勞動人民實唔夠食。再望下片花膠, 得2小片咋！所以試唔真 總體而言味道可以啦! 食一次夠了(這款)。小店環境, 坐滿會逼。實木方形無背櫈, 攞明食完即撇格。原來枱上自剔柯打紙係底面頁, 有花膠類㗎! 見隔離美女叫左花膠撈麵, 或者比多次機會,黎多一次啦！

粉麵精選 花膠冬陰公米線$50先得一舊花膠同冬菇，有啲過份。價錢平啲嘅花膠撈麵都有4-5舊啦。個冬陰公湯係咪仲貴過啲餸？個湯味又淡，又唔係正宗呢個真係精選伏餐日。

見網上食評幾好，今日中午就去試。一入到去，見到有其他客人自己搵位，咁我咪跟住自己搵。個店員叫我出返去禁飛(入面未坐滿有空位，咁我又行返出去準備禁飛之制，另一個職員問我幾位，我真係一頭冒水，究竟要吾要禁飛呀🙄🙄好後好快就落左單等野食。等左幾個字，啲野食仲未黎，隔離枱遲過我黎既都食緊就黎食完，我就吹單。個店員解釋，因為廚房出單部機無紙一記得換，以為無單。😦咁點解遲過我黎既人啲單又有呢？ 我叫左個花膠蠔汁撈麵，等待其間我見佢出左好幾個麵都無我份，我覺得佢地吾係跟次序黎個落單先就出邊個先。漏單之餘，出菜出到亂七八糟。我見眼其他枱啲野食，出完又出，出完又出。一係就出錯左去其他枱。其實佢地鋪面吾大，都吾知點解出餐可以亂到咁。我吹左好幾次單，職員仲要黑面，最後等左成7個字就食到個麵。即使幾好食，都吾會再幫襯。態度差，出餐亂。講返食物，味道一般，吾係特別好味，不過不失。料足，麵多。

之前每次尼都係食花膠燉鮮奶，聽講花膠燉鮮奶對女人超級好同美顏，今次因為太肚餓所以轉左唔識花膠燉鮮奶變咗食花膠蠔汁撈粗面，上面有幾舊花膠同埋冬菇，粗面係底，再加一碗有蔥花嘅湯。女仔嘅胃口你咁食晒都算夠飽，花膠略嫌冇咩味，但粗麵就有汁嘅味，冬菇易整得好林，都算幾好食。可能我係下午茶嘅時間尼， 人唔多唔使等位， 一落完單好快上菜。$48一碗撈麵撈麵入面有花膠，都算抵食，女士為左美顏呀真係要多啲食花膠，食完唔知係咪會變靚啲呢。

有日經過看到這家店吃花膠湯麵，很少吃到餐廳賣點是花膠海參，所以入去一試！😎整店有一種醋味，每枱差不多都點一樣的食物，餐牌選擇也不多，所以很快便有目標！點了花膠海參湯幼麵，可根據個人喜好點粗麵。湯喝下去，很黏口，很夠味！花膠跟海參都很軟熟，很容易吃，味道像已煮了很久一樣，心機之作，冬菇更是畫龍點晴，很惹味！麵條容易咬開，份量不算多，如果正餐的話應該很快會餓！🤓飲品可選豆漿，很不錯！或是餐牌有燉湯，如果晚餐也可以點配，住家飯的感覺！😍

咁岩入天水圍學插花，順道同住元朗嘅朋友食晚飯，佢推介花膠麵，心諗應該要起過百蚊一碗，我呢個朋友對食比較高要求，所以我望到menu價錢都呆左！$48有一碗燜冬菇花腸撈麵？太抵食了！上菜見到冬菇大大隻厚肉燜得好入味，花膠仔爽口彈牙，個汁同撈麵味道好夾，我記得自己都冇乜點撈湯！食飽左個花膠麵之後再叫個$55足料嘅紅棗花膠燉鮮奶，超級滋潤，花膠嘅膠質都溶左喺鮮奶度，鮮奶飲起黎係張住個口的，岩岩轉涼嘅天氣飲好滿足！

今日要去元朗做野，見到呢間野食花膠麵近近地巴士站方便就試下，食左個叫花膠墨魚丸既湯麵$38, 幼麵或粗麵， 飲野加$6, 碗麵來到細細碗，碗麵得4粒墨魚丸一條菜係咁多，搵哂碗麵都無任何一粒花膠，我己經好無奈，呢個係取巧？定粒墨魚丸裏面真係含有花膠？？完全吾覺墨魚丸裏食到有花膠，吾想同佢理論咁多，拿拿聲食完走人算，4粒墨魚丸細細碗麵$38, 我諗吾明，明明無花膠可以叫個咁既名，取巧？我係咪可以去消費者委員會投訴？大家食吾食自己諗啦，無下次，係咁多

早幾日經過返呢間漁民麵館，記得以前黎食過呢度嘅花膠麵。心思思想再去食！冇食咗一排，雖然唔知佢水準有冇下降到，但都抱着一種試吓嘅心態再食多一次！ 其實想上碟個下都覺得冇咩野變過，花膠都係咁大塊，冬菇都係咁大粒。但係食落口個下就知道好似唔同左咁，以前花膠味好重，依家花膠味就變得淡左d 。至於冬菇就比以前整到林咗啲咁，但係個面底就保持到水準！見面一樣咁彈牙！有時有啲野出咗名，就變得冇咁好㗎啦！呢個好似不變嘅定律黎。希望佢做返好啲啦

今日難得入元朗揾朋友食午飯，見到哩間餐廳專食花膠海參撈麵，而且價錢就十分平民化，所以決定試一試我地一人叫左一個花膠撈麵加豆漿，menu另外仲有花膠湯麵、海參撈麵等等一上枱個花膠撈麵有四至五舊花膠同幾舊冬菇，d花膠味道都okay，性價比黎講都可以，不過d冬菇好入味，比個讚 😋

最近見到有朋友介紹哩間餐廳，一直都好想試下哩個傳說中嘅花膠撈麵，今次終於有機會去元朗食啦！位置黎講都算係幾方便，出左西鐵站行幾分鐘就到。好彩我十一點半就去到，雖然係岩岩開鋪，但已經差啲啲就坐滿哂，我一去到都要撘枱啦。一入到鋪頭，就好大陣魚腥味，不過都無辦法啦，因為哩間餐廳就係主力做海參同花膠，始終會有魚腥味，坐左一陣就唔覺啦😛既然最出名係花膠撈麵，我當然要叫啦，以咁嘅價錢黎講真係好抵食，有成4舊花膠，仲有四件厚冬菇🤤🤤🤤質素你就當然唔可以拎高質花膠比，但我真心覺得唔錯，幾有咬口同無魚腥味，唔會好霉，至於冬菇我個人覺得好出色😂😂好「諗」好厚身同埋好有蠔油味😍而粗麵呢，我覺得可以再有味少少，我就覺得淡味左少少，可以再重啲蠔油味，不過麵質還可以嘅🤭我會推薦大家試下架，哩個價錢真心無得輸😎😎😎

其實一直在網上也有留意呢間平民的花膠店，今次終於有機會試一試。星期天的下午兩時去到，店內的顧客已多得坐爆，最後等了約20分鐘才安排入座。這次我點的是蠔汁花膠撈麵，食物一上到枱，價錢只是40多元的撈麵令我十分驚訝，花膠的數量竟然有很多，而且更有兩大粒冬菇，冬菇肉身很厚，而且盡索蠔油汁，亦被煮得淋身，很讚而且撈麵麵質爽口，令人有驚喜。點選了撈麵還會配上一碗魚湯，魚湯的味道亦鮮甜美味，總的來說，撈麵套餐的性價比真的十分之高

今日入元朗搵朋友，見到網上推介食花膠嘅餐廳！即刻去試吓！我哋兩個人叫咗一碟花膠香菇面同碗仔翅試下。大家可以膠下呢碟面既餸好足料。唔係得幾舊嫁，我地兩個人女仔咁樣食都好夠。因為要留肚再食其他野而碗仔翅就正正常常無太大特別。

食多左係要還嘅，星期六就入左元朗大棠行山。行完幾粒鐘，落返山已是下午茶尾聲時間，決定入得黎元朗梗要試下元朗名物，終於揀左花膠麵，補返啲骨膠原。可能因為已經4點幾所以唔使等位，但都有7成滿。其實佢個餐牌都幾單調，基本上係得花膠同海參單拼、雙拼甚至拼盤的選擇再有啲花膠燉品、熱飲、幾款小食咁。叫左個小食，秘製辣醬皮蛋老實講，個醬一啲都唔辣，幾咸下本人唔鍾意食海參，所以只叫了花膠蠔汁撈粗，麵食黎講已經係最貴 $48，有4、5塊大花膠，同埋4舊厚肉花菇，食完好飽下似呢個價錢黎講, 花膠係俾足料，唔會薄chic chic，質地係偏爽脆。而蠔汁冬菇好厚，但本人覺得太咸。漁民湯麵，其實就係花膠同海參雙拼，相對地，條海參就細左啲，大約手指尾大小，不過$40，又花膠又海參又冬菇，仲想點。平時食碗譚仔或車仔麵都唔止呢個價。加6蚊可有罐裝汽水或豆漿，其實好抵。再黎碗花膠燉鮮奶share，$55，大碗，夠兩個人share，料都好多，個人覺得偏甜，朋友覺得ok總括來說，入開黎元朗不妨一試，但特登入黎又唔使，因為喺荃灣同尖沙咀好似有分店架！價錢唔知係咪一樣呢?

今天路過呢到附近，就決定喺到這兒食午餐，因為聽人哋講這間店鋪岩岩開店果陣來幫襯嘅人都幾多吓。餐牌睇落都幾吸引，都喺滋補嘅花膠同海參之類。撈麵好似無用蠔油，所用嘅豉油與湯混合後，味道唔喺太夾；冬菇的味道很濃，都幾好食。整個撈麵很清淡，如果唔想食太熱氣嘅食物，來呢度食真喺一個好嘅選擇。麻醬同麵嘅份量略少，味道亦唔算太理想。呢碗麵嘅味道相對另外兩樣嘢來講，就顯得比較出色。整體感覺唔算太好，但勝在夠健康，而且價錢又平，店員服務態度又好。

開左都有一段時間既漁民漁館，都幫襯過一，二次，花膠係最岀名， 呢排多咗個海參，諗住試吓啦，本身我比較鍾意食啲酸酸辣辣嘅口味，所以叫咗個酸辣海參撈麵，啱啱上枱個賣相唔錯，試落口就有少少意見比反，個人覺得涐參係要軟熟彈牙入味，係佢呢個海參，係爽口嗰隻，其實有啲硬，可能真係未整得夠林，所以個海參都入吾到味，係無味嘅，但最大問題係嗰個醬汁，嗰個辣好難食，唔知似啲乜嘢，個辣形容吾到，又有少少韓式，又有少少中式，所以成個餐我只係食咗啲海參同少少面，早之食反花膠算，反而花膠同冬菇都好好食，好入味😂😂😂