午市時段超多人，好醒目預早book定位。
超抵食，下次可以嚟High Tea
相信大家都對「樂天皇朝」並唔陌生，佢嘅八色小籠包可算係街知巷聞。呢日放假就約咗朋友去雅蘭中心嘆下午茶，因為三點後可享六折優惠🈹。
餐廳平日下晝都坐滿人，人氣頗高的👏。呢度環境唔錯，裝修帶啲中式風格。另一邊廂，店員們亦幾有禮貌。
我哋嗌咗小籠包、紅油抄手同炒年糕，幾樣食物好快就送上，賣相吸引😍。望落好似唔係好多嘢食，但食完已經飽晒。
🌈八色小籠包嘅建議食用次序為原味、糟溜絲瓜、鵝肝、黑松露、芝士、蟹粉、蒜香以及川味，由淡味食到濃味。顏色係由天然食材提煉而成，所以可以食得放心。每一款口味都同小籠包嘅肉餡好夾，絕非九唔搭八，而且唔睇介紹都會食得出係邊款。個人最鍾意蟹粉🦀，因為夠鮮香；另外蒜香🧄都幾正，佢唔係好重口味嗰種蒜，反而鹹香恰到好處，幾惹味。如果一班人食嘅話，就可以選擇單一口味，價錢亦稍為平啲啲。
雪菜咸肉炒年糕($93)，炒年糕好大碟🍚，入面落咗唔少雪菜同咸肉一齊炒，但所謂炒就並非係有鑊氣嗰種，而且亦略嫌有啲啲油。咸肉個樣似煙肉🥓，味就似金華火腿。年糕口感煙煙韌韌，亦係飽肚之選。
餐廳設有其他收費，包括每位$8茶錢🍵同每碟小食$15，值得一提嘅係啲花生忟得好軟稔、好入味，意外地好食🥜。
總括嚟講，八色小籠包再次無令人失望👍，又靚又好食，係必點之選；而其他食物亦都OK。如果想嚟幫襯的話，不妨睇吓有冇機會下午茶時段嚟，抵食好多😊。
影片
