敏華冰廳 (已結業)

今日去咗敏華冰室食早餐，最令我意外嘅係佢個火腿通粉竟然用左雞湯，令到火腿通粉嗰啲味道好濃郁，即刻成碗火腿通粉好食咗，嗰碗雞湯湯底我差唔多飲曬另外呢個餐會配咗炒蛋，多士，同埋一杯熱飲，價錢36

叫咗個黯然垃圾銷魂飯，等咗25分鐘先到，隔黎枱加杯凍檸水都要10分鐘先到。（佢聲稱係現場燒製，燶邊叉燒，流心蛋），未食已經火滾。叉燒凍既，好似擺咗半個鐘以上。人地啲叉燒係紅色，佢係啡色既。隻半熟流心荷包蛋，黎到老過李嘉誠。一滴蛋汁都無流出黎。（聲稱有自家調味豉油），有9成都係白飯黎既。叫佢畀返啲自家調味豉油，態度仲要好串咁話，「豉油下話？」，最後求其畀啲普通豉油我。呢間舖真係好垃圾。價錢又唔係平，睇返原來係泰興集團。

近期見到敏華冰室開左好多分店，大受歡迎，見人流不斷。入到去望左幾下大多數人會點咩黎食，黯然銷魂飯都幾多人叫黎食，有餐飲就$60 無就$50 一個飯。另一個多人叫既係常餐。麵加個炒蛋多士。叫左個叉燒意粉常餐。叉燒幾大件都好香軟。炒蛋味道濃郁。加埋個凍奶茶$59。整體味道偏濃，LUNCH 想食個好食既常餐，係個幾唔錯既選擇。

午餐時間自己一個，學完車，食咩好呢？路過之前男朋友話想試既敏華冰廳，哈哈sorry唔等你啦！！-lunch time當然好多好多上班族啦，佢地有個共通點，就係全部都係食黯然銷魂飯！招牌菜fact checked！-【黯然銷魂飯（少飯）】原來有兩隻蛋！驚喜驚喜，仲要係超級太陽蛋！成件事係幾吸引既，濃濃既蛋漿！加上幾舊大叉燒，正。蛋漿係岩岩好每一粒飯都cover到，所以個飯唔會好乾食得好辛苦，不過唔係特別超好食，正常啦，不過不失，叉燒唔夠肥，瘦咗少少，同埋如果叉燒可以砍細舊d會好d！lunch hour食呢個會幾開心既我諗。-總結，對敏華既印險並沒有因為個飯既變差，希望下次可以再去，試下其他野食！

最近某飲食集團上巿，之後我先發現連平時經常光顧的台式食店原來是同一集團。我一直覺得那台式店的裝修食物及環境都好怡人，今次決一試它的港式茶餐廳食物。未入店前已比它門外的黯然銷魂飯所吸引，立馬進內order了一客。不過由點餐到真正食物來的時候比較久，可能大概有10分鐘。飯來到的時候，首先用筷子先刺穿蛋黃，蛋黃慢慢地由上層流至下層的飯，簡直是一個視覺享受。把蛋黃和飯弄得勻稱，夾一口飯，果然是一大享受。之後再嚐嚐它的差燒，不肥不瘦，又不會燒得過焦。原本以為食物名只是個gimmick，想不到味道也不賴。而且價錢十分相宜，份量也剛剛好，是個不錯的體驗。

我本身喺附近返工，一直都有幫襯開敏華。不過次次幫襯完我同同事個個都帶成陣油煙味！次次都噴香水都cover唔到呀！不過都算，我見佢真係好味我就算數。不過今次真係非常嬲！我放lunch得一個鐘食，我去到個收銀叫我坐入去，諗住叫餐叫咗成15分鐘都唔得！我全程舉咗三個字手個個點哂頭唔理我！少人手我明，問題唔好hea我！跟住問題又黎，我又等咗成15分鐘先有！當中我有舉手吹單，點知個侍應鬧返我轉頭！依啲係咩服務態度？重有減交通時間，我得返20分鐘食飯！！吹單都唔得！好啦！到個飯到啦喎⋯⋯個豬扒勁細！！！上面有提到我係幫襯咗好多次，以前豬扒雙蛋個豬扒係「厚切」！太過手掌！大家望下張相，細過拳頭呀！係變咗薄切！受咗咁多氣重要個飯退步成咁令我即場打依篇野出黎！

上市集團旗下的餐廳，應該有更多資源去做員工培訓吧？首先係門口排隊，一路睇住一張一張枱賣單離開，但排隊條龍無改變。結果原來係等埋一次過清潔，再一次過安排五張枱入座。🙈餐廳既招牌食品係「黯然銷魂飯」... 即係乜？！其實就普通叉燒蛋飯😝餐廳聲稱全部叉燒都係即叫即做，但都吾應該要等祝祝33分鐘掛😣落單後15分鐘叫咗姐姐去睇一睇，佢就立即答我：整緊啦等多等⋯⋯再等左10分鐘⋯⋯再叫姐姐跟一跟先知原來佢哋落留單🤬半小時後⋯⋯有得食自家製叉燒飯啦，的確大大件厚切易唔會太多肥肉，口感豐富，有烤肉既香麥芽糖既甜，味道適中，甘真係比一般燒臘店嘅叉燒出色既，加上兩隻半熟流心蛋同自家製醬，撈飯食，真係好好食既!

平日lunch 等位排到街外，今日見只有5人排隊，試下黯然銷魂飯雞蛋唔錯，半生熟叉燒好硬，好咸飯也太硬$68連飲品，不平!另有出名豬潤，但1點半賣晒是平好味，我唔知，食豬潤，譚仔都有，平好1多

今日一早就出左銅鑼灣，但又要十二點去到黃竹坑如果食早餐又太早太heavy之後先食午餐又會太晏呢啲時候食個茶記早餐就啱啱好之前行過既時候就想試下呢間敏華冰廳既叉燒煎蛋飯今次時間早得滯，唯有改試佢既沙茶牛肉公仔麵拼炒蛋牛油厚多士個厚多士食落鬆軟，可惜佢烘得唔夠燶，如果唔係既話，脆啲口感就更加好炒蛋火喉控制得啱啱好，唔會太老亦唔會水沙茶牛肉麵個醬好夠味，食落有好香既花生味早餐時段黎食唔駛等不過如果晏晝試叉燒煎蛋飯就可能要早啲喇

下晝三四點 經過銅鑼灣 有啲肚餓 見到一間冰廳 即刻好想飲奶茶 就走咗入去呢一間敏華冰廳 入到去有啲肚餓就順便叫埋嘢食 買咗一個常餐 再加多個 自稱暗然銷魂飯 兩個人share。喺銅鑼灣呢啲冰廳定價都比較貴,一個常餐簡單一個叉燒湯意粉加腸仔炒蛋多士再加杯餐飲就要成六十蚊,其實真係有啲貴。不過喺銅鑼灣就冇辦法啦 ,但食物質素其實真係完全未到水平, 常餐都冇乜嘢好講正正常常冇乜特別,杯奶茶亦都唔係特別好飲,但係有咩導致我寫了一篇食評就係佢個叉燒蛋飯。用得黯然銷魂飯呢個名當然要一啖食落去就覺得好有感覺先可以用呢個名否則只會形成反效果。 而今次食到呢個飯簡直唔可以形容為叉燒蛋飯 更稱不上暗然銷魂飯。煎蛋 火候已過龍 完全冇滑嘅感覺, 叉燒 竟然係用豬頸肉去整 呢d所謂 著龍袍唔似太子 再加上 用嘅豉油亦都唔太靚 所以整個飯配合都好失敗, 建議佢唔好再用呢個名。

今日同朋友去行銅鑼灣，去左食敏華冰室，因為佢話突然好想食叉燒飯。餐廳雖然唔係位置大街，但係招牌明顯，所以都叫易揾。入到餐廳好快有位，可能都仲早啦，我朋友就好快諗到食咩，返而我就諗左好耐，諗緊到底食免治牛肉飯好定係雜扒飯，又或者叉燒飯好，因為始終叉燒飯都係招牌菜，不過我最後都係揀左雜扒飯，下次先再試叉燒飯。雜扒餐跟飲品60蚊，係銅鑼灣嚟講唔算貴，我揀左奶茶飲。敏華的奶茶就比較多奶，所以奶味重過茶味，雖然我個人比較鍾意茶味濃啲，但都不過不失。雜扒餐真係好大份，有豬扒、雞扒、餐肉同腸仔，仲要跟超大碗飯，配埋薑蓉比人可點可唔點，我本身好鍾意薑蓉，不過就真係超邪惡啦，但當中最值得一提的就係豬扒，正時食豬扒最驚就係乾晒，好似食擦膠咁(雖然我未食過擦膠)，不過敏華的豬扒可能厚切關係，豬扒不會乾爭爭，而且好有豬味，仲好彈口，真係好正。

14/6本身抱著Happy Friday的開心心情去食餐簡單晚飯，但一個「黯然銷魂飯」足足等左超過半粒鐘先出現，仲要有蛋殼😡😡😡；雙腸炒蛋多士更要45分鐘先有，真係唔知想點......同一時間其實N枱客都係等緊同一個飯😪我諗李文潮先生真係要好好管治一下佢旗下嘅冰廳，定立一套機制令貴店嘅人手唔會短缺唔夠人手招呼客人就倒不如早d閉門休息啦，總好過令食客留下一個壞印象，影響店舖聲譽之餘，又會降低客人再次光臨嘅意欲。

銅鑼灣嗰間服務態度好差，一個大陸婆侍應發脾氣，好大力將杯奶茶「砰」一聲拍在枱上，仲要放錯隔離位置。根著我走過去茶水位置質問佢，佢先發覺客人係原來會上前與她理論，她那時根本解釋唔到，只能話不好意思。其他員工及客人也目擊此時。隔了三星期，我今早八點再去試早餐，入面都仲有好多位置，餘下有50%位置空了未有人坐，我一入到去，一個大陸婆侍應在門口，指住要我坐門口二人位置搭枱，嗰個位置又迫又人多，若果餐廳冇位，也冇辨法，但入面還有不少位置可坐。那時我問佢，入面冇位咩，佢話冇，根本嗰個大陸婆侍應就唔想做咁，態度惡劣，多少客人都同佢無關。另一個坐在收眼位置的員工，冷眼旁觀，坐視不理，任由個大陸婆侍應趕客。我諗不緊要，銅鑼灣有很多餐廳都可以選擇，也不論到你呢間垃圾餐廳。

銅鑼灣食早餐真係唔平，閑閑地三、四十，今日經過這間餐廳，見餐廳入面都幾闊落，我又想慢慢嘆返個早餐先開工，就入去坐底啦！間間茶餐廳來來去去都係果幾款，這間都唔例外我就叫左個雞湯火腿通粉拼炒蛋牛油厚多士，通粉個湯好濃史雲生雞湯味，都幾大碗炒蛋無咩蛋味，但好滑，個多士幾軟熟，整體算唔錯。但呢間d服務麻麻地，我一個人入去，明明好多位，但等左好耐佢先安排到我入座，可能唔夠人手啦！如果這方面改善埋，都值得再去食。

晚上在銅鑼灣諗唔到食咩好，女朋友話想試下敏華冰廳個常餐，於是揀左而間，我記得之前喺九龍灣啊馬鞍山啊，幾時都有條長龍，依間就上次夜晚黎都唔見有人龍，即管試吓。雖然我知道佢係太興既副線。點了一個暗然銷魂飯，一個常餐，一杯凍奶茶一杯熱阿華田。凍奶茶係太興嘅冰鎮奶茶，只係換咗個杯同埋冇冰鎮。不過而家嘅太興我奶茶已經冇以前咁有茶味同埋果種澀味。暗然銷魂飯本來佢話要半個鐘因為要即刻燒，之後又突然之間好快到咗，個賣相真係唔掂，隻蛋同埋叉燒求其擺都算，叉燒冇乜焦邊，我知佢個做法係臨尾先用火槍燒個焦邊出黎，唔知啲人趕收工定係hea底，切又切得衰過人。講番個味，叉燒我以為應該會用返太興個做法，點知完全唔同，敏華嘅叉燒係無味，我隻蛋普通雖然都係流心， 個飯汁冇乜特別，個飯我相信佢都係用緊泰國嘅金鳳米但係落得太多水，失敗。至於常餐個五香肉丁通粉普通，腸仔同埋炒蛋超級多油，炒蛋都還算可以叫做滑，多士我不嬲都好欣賞太興用嘅多士係厚身嗰隻，依度都沿用番一樣嘅多士，係略嫌唔夠鬆脆。$50蚊一個暗然銷魂飯，唔算貴嘅，但質素就比較普通。常餐除咗個多士都一般。我覺得最奇怪嘅係點解個叉燒可以同太興既唔同味道。