小肥羊 (已結業)

開頭見到咁多人排隊，好似好受歡迎咁，但食落只覺一般，那些出名的羊肉，完全無口感，雖然佢整得唔騷，但就無肉味。肥牛都係一樣。那個乜乜拼埋一碟仲呃錢，得兩舊貴野，其他的就是菜。6個人埋單成千銀，打邊爐已叫做貴啦。仲有，個麻辣湯底得個辣字，同正宗川菜差好遠.........

同幾個酒肉朋友無聊聊相約飲啤酒,剩飲酒又好似齋左d啵~所以就相約去打邊爐啦湯底:麻辣個邊d料少之有少..攪到一d都唔辣...好似色素水咁....清湯個邊都仲好d....羊肉:幾靚..又夠薄,都唔錯,建議點清湯...唔好用麻辣碌黎食,因為好似有d唔岩味@0@\"牛肉:手切牛肉有番咁上下~唔錯丸類:應該係買番黎的...不願置評打到中段..覺得麻辣個邊越黎越咸...唔知係d丸攪到咁定係點.....睇黎小肥羊剩係得羊肉出名....早知上深圳打啦....來回都無呢度咁貴....不過主要都係飲下酒傾下計姐~不過唔會再黎呢間野嚕

我想講講打邊爐好唔得, 一來貴, 卻又衰在唔好食d野好咸, 完全食不到食物的原味, 簡直浪費食物食完我同d朋友都要周圍搵糖水食, 因為個口好渴好辛苦個個食左少少就走, 因為實在頂唔順

唔講咁多，整體是ok的，尤其個湯底，但價位偏高，常去就免啦ps. 食羊要有少少蘇味先好食

星期日去食點心buffet, 所有食物都好細碟, 份量少得好寒酸咁!味道屬中下級數, 只有一兩樣O野覺得係「好食」囉只覺得粗製濫造, 仲衰過去屋邨酒樓多多聲, 有D 唔知咩薄荷糕千祈唔好叫呀, 難食到嘔!唔好去幫襯.....早知去稻香飲茶好過, 唉......

星期五夜晚十一點幾，去左旺角小肥羊打邊爐，諗住大食一餐，點知俾個侍應激到紮紮跳！d碗碟洗得唔乾淨不在話下，仲要食左個呃錢既龍'等'拼盆！個女侍應係咁sell個$108既龍'等'拼盆，又話好多菜，d龍'等'又靚，分開叫一定無咁抵。我個friend問佢會唔會好多菜但係每款菜得一棵，個侍應話一定唔會！一直對依類拼盆無咩好感，不過大家都話試下，唯有順應民意。等左成廿分鐘，個龍'等'拼盆終於出場。好似龍'等'既骨有三「細」舊，好似切剩既魚肉咁，其他就係普通既魚片！菜係有五款，每款都有三、四棵，又係亂咁擺埋一堆！分開叫三種菜再加碟脆肉鯇都唔使$108啦，簡直係被騙！唯一可取係個內蒙古肥牛同白蘿蔔。之前試過銅鑼灣同尖沙咀既小肥羊，覺得食物質素同服務態度都好好多，估唔到旺角依家差咁遠。

本身去朗豪坊買袋,,但係去左飲茶先!去小肥羊飲茶,之前飲過幾次!今次叫左小籠包,好有羊肉味!!有菜遠牛河,有少少咸..唔係幾好!蝦餃唔錯,黃金大餅都唔錯!

而家21:30之後出左個四人餐，有十二款野食，338蚊，都算ok，比起平時至少200以上先食飽差得遠，同埋都多野食過散叫好多，而且個餐我試過兩個人食，真係食唔晒，之後再試過3個人食(2男1女)，都係食唔晒，所以個餐既份量都幾足，之不過碟牛肉同碟羊肉就份量少好多，每碟都係得十幾件，所以如果鍾意食牛、羊既就要另叫。同埋我試過荃灣鋪，d食物質素真係差d，所以都係揀返旺區食好d!!

初一和朋友兩人到小肥羊..人不太多叫了個鴛鴦湯底, 有清湯和麻辣, 麻辣定了分量, 不可要求少辣..所以我們將所有辣椒拿出來...但都是很辣..點了一碟羊, 有幾款選擇, 我們選了蒙古那一款, 薄薄的捲起, 放在清湯煮, 很有羊味, 很可口, 另外我們點了個一品煲, 有很多不同餸菜, 如蝦,菜, 魷魚, 魚蛋, 魚膠, 帶子, 兩人分量算是差不多...飽飽的, 總括來說都不錯.

上星期有朋友要試,,....肉有黑色,叫換,話係這樣, 湯又沒味, ....昨天我再相約朋友們到深圳...小肥羊對手...肥羊王, 上年在上海食過超正,便宜,最貴的羊都只是38.00,花款多,羊心等..都有... 每人只是70元,食到脹脹, 所以小肥羊不願置評

1) 一坐底d waitress就勁sell ｄset俾我地, 但我地未齊人就話轉頭先, 點知轉頭又第二個waitress走過黎sell , 都幾煩…2) 我地問佢要豉油,點知個waiter不斷hard sell佢地的湯底正, 話唔使點豉油,真搞笑... ...but佢真係講得好o岩, coz d湯底好鹹, 仲愈食愈鹹tim…我地o個個係鴛鴦窩底- 麻辣+清湯~ 麻辣湯底唔夠麻辣, 清湯又唔係清, 好多蒜頭,薑,大蒜,龍眼等等, 兩隻湯都好重味精~~ so 仲使咩點豉油wor…3) 我地叫左個什菌+菜拼盆, but 個waitress落單時就勁sell 龍躉+什菌+菜拼盤, 睇番呢度d網友話原來冇龍躉架wor, 好彩冇畀佢sell 到jei…4) 羊肉都幾難食,好勒However, 都有d野可一讚既:1)蟹子墨魚滑: 幾得意幾特別, 個waitress會埋黎幫我地撈勻佢, 都幾好食幾彈牙…

星期五13:30 去到, 佢話未有任食tea要13:45 先有飛拎, 2 點先入得行左一陣返黎, 13:52 去拎飛竟然去到83 號, 佢仲話叫到4 點都未必有位不如散叫諗住睇佢2 點叫人去到幾號先算如果差太多, 就去食kfc2 點正, 真相大白原來由76 開始叫1 分鐘後入閘食到3點半走人, 起碼仲有一半係空不過佢係都唔俾你坐, 要搭用任食引人客, 再吹水叫人散叫果然識做生意入到去, 8 人分3 班人勁亂!!!!食物方面, 一般般la比一般酒樓差d但係帶住食都佢破產的心態入去值得一去再去p.s. 芝麻胡好好好好難食一至五40 , 有加一六日都好似係貴幾蚊

一行人五個猛男,一心諗住上去食羊....好喇,坐落,service 都ok 唔錯,呢度冇乜問題,大家出黎食野都係為求happy 架坐左一陣到喇, 唔算耐, 大家既焦點羊肉片到喇, 我睇到都O 咀, 多就多塊喇, 但我地五隻大怪獸一野都食左4-5塊....結論大家最後叫晒d 包點埋黎食....最後仲要走去食$10 大大碗填埋個肚....真係折墮d 野食都唔錯既, 佢d 羊肉的確唔錯, 湯底都正, 佢果個麻辣湯底真係幾辣anyway, 要夜食的話要過十點後去比較好

今日同dad 同mum 去左小肥羊食晏晝雖然係公假，但特價野依然有得食，抵讚!!叫左一個$98 既套餐可選4 款點心.. 有成兩大行，好多款，揀到眼花我地揀左黑椒牛仔骨(牛仔骨好肥下，可能係蒙古口味，好滑，不過唔健康囉.. 我就唔會再揀啦)蝦餃王(ok 啦，不過唔太爽口，但佢唔係食海鮮，唔可以太高要求)春卷(保持水準，好脆)羊肉包子(羊肉味好勁，我接受到就覺得好正，唔喜羊既就唔好嗌)1 款炒粉麵揀左福建炒飯(ok，不過好似比以前細碟左dd，但三個人去食都夠飽，俾多d 都係o徒，所以冇問題)1 款涼菜揀左海哲(以前可以揀鴨舌，今次冇得揀，母親大人有點失望..)1 款時蔬揀左蒜茸菠菜(蒜味好勁，不過油左d，不過我好鍾意咁濃既蒜味XD)仲有甜品，我地揀左紫米露，ok，冇乜驚喜..埋單$130，三個人黎食算抵

黎過兩次，一次六個人一次五個人，兩次都係坐長枱！上次六個人，張枱係大廳中間，咁有兩個人坐主席位都算喇，跟住我地見到人地四個人坐圓枱，覺得好有問題囉！到今次五個人，又係個種長枱，但係今次係靠左窗邊，有一邊主席位貼左個鐵欄，咁另一邊既主席位就係同另一張枱 Share 既通道，五個人點坐呀？有一個坐左主席位咪塞住條路？仲要大大聲同我講話呢D 枱坐六個人，唔該你搵六個人坐落黎睇下！激到我當堂想走，唔係睇在因為有Cash Coupon 份上，真係唔會黎！不過佢D 食物係幾新鮮既，係個湯味精多左D，但係都係幾好味既！如果佢冇Cash Coupon 既話，以火鍋黎講佢都算貴囉！總之以佢咁既編排坐位方式，一定唔會再去囉！