九州天神和食亭 (已結業)

前兩晚了去左呢間日本餐廳，真係超級十分極之嬲😡😡😡😡我地兩大兩細，7點幾落左單，等左超過40分鐘都未有野食，眼見其他遲嚟嘅人已經食緊，於是問下係咪漏單，個女侍應話其他人好早落單⋯⋯，三分鐘後有一位阿叔走嚟我地張枱，一句「唔好意思」都冇，就講「你地食咩」，我地再問「咁係咪漏左單呀？」，佢用爛仔講數嘅語氣同我地講「依家咪問你食咩囉！」，我再問「係咪唔見左我地張單呀？」，佢終於發火，你冇睇錯，係餐廳呢位唔知侍應定老闆嘅大叔發火！「係漏單，你再唔講，你仲要等耐D！」⋯⋯由於帶著兩個小朋友，我整個過程都已經好溫柔，而且見小朋友好肚餓，我都以包容嘅態度對待⋯⋯最後我同小朋友講「媽媽知你地好肚餓，不過無禮貌唔可以接受，我地去第二度食！」。我離開之前，竟然仲聽到大叔同廚房講「噢！唔駛煮！」佢嘅語氣應該係想叫「Yeah!👯🎉」⋯⋯🙄

時間正值lunch time 下午1點左右，天氣又熱又焗，我同班朋友四個人係附近兜左個圈唔知食咩好，見到舖入面有幾個空位就想快快趣入去食。點知一踏入門口半步，有個女職員已經兇神惡煞咁衝埋黎，手打交叉，語氣又差，大大聲咁話：「今日唔入客架啦！唔接生意架啦！太多人做唔切呀！」就咁就趕左我地出去。其實你多人做唔切，你咪可以慢慢出餐，我地唔介意等耐少少，反正有空位點解唔可以比人坐住等? 就算真係唔想做生意，我可以體諒，但建議你下次可以掛個牌係門口，閂埋道門，唔洗等客人入到黎先喝人出返去。同埋說話態度可唔可以好少少呀？唔好意思都無句，得罪左你咩？以後唔會再黎

食第二次，兩次都晚餐，上次太肚餓食乜都覺得好食不能作準，今次路過又食一次，叫咗牛肉猪骨湯烏冬(原本叫地獄湯，怕太辣老闆叫小弟轉猪骨湯)，餐跟兩件壽司同飲品，另再叫三文魚蝦天婦羅卷，加埋都係80幾，但品質同味道俾起好多酒店還要好，啲湯最正，食完烏冬連湯都飲埋！以咁嘅價錢有咁嘅質素，值得一讚同推介！👍🏼👍🏼👍🏼上次食個壽司餐都已經值門票價，不過冇小弟最鍾意食嘅八爪魚壽司食，啲壽司飯正，比起好多日本菜名店重好多多聲，下次叫多幾個朋友去，叫多啲嘢食下再出報告！

小朋友鍾意食日式料理，所以同佢地試一試。就係屋企樓下，一試無妨。叫咗一個牛肉鍋加烏冬，刺身，牛柳粒。刺身係新鮮又大件，彈牙唔腥，好鮮甜。牛肉鍋有驚喜，足料，配料有日本魚蛋，金菇，粉絲，冬菇，菜，豆腐。湯底唔太甜但濃郁，牛肉唔「鞋」。牛柳粒不過不失，唔韌。洋蔥夠淋夠入味，唔錯。總括黎講係唔錯的，我見到好多人食拉麵同飯。餐牌好似有地獄拉麵，下次要去試一試有幾地獄

平時夜晚食飯都會去依間日本餐廳食, 食物味道都幾好, 而且價錢亦都平民化而且老闆好有人情味, 經常創造新款菜式俾我地食值得推介既食物包括七味魷魚鬚, 幾款石鍋飯, 炸餃子, 手打烏冬等等菜式

今日係2016 年7月9日，氣温36 度，講緊的係幾10年黎都冇試過咁熱的7月份。本身同媽子諗住打冷或者去食泰國餸，旦咁的天氣再去迫大排檔，又或者係坐街邊都好似會食唔落野。苦腦緊的時候，經過呢一間餐廳， 細細間的，住左慈云山20 幾年都冇見過佢，就估佢應該係新開將的。入左去的時候，店員(唔知係唔係老板定員工). 都好有禮貌咁請我地坐低慢慢睇下個餐牌，揀啱先至坐低點野食。3丁友，睇到餐廳的貼圖。最後叫左幾個唔同的野食，開心些牙.…壽喜燒牛肉鍋+普通烏東， 呢個上的速度最快，所以第一個試的味道就係呢個。同出面食開的牛肉鍋差唔多，牛肉份量都幾夠，湯底夠濃味。bb墨魚鬚，呢個食物第一次食，45蚊， 送黎的時候放係鐵板上面，熱啦啦的，好好食，絕對值得推介。壽司松.…er, 呢個壽司拼盤價錢合理，都係98 蚊姐，不過略略覺得個飯太大舊，而且賣相都一般，呢個下次就唔會再encore。燒3 文魚腩,嘩，呢個簡直係必食推介。個剛剛燒出黎的3 文魚腩充滿魚油味，個皮咬落去脆卜卜的，加少少令檬汁落去，味道更加出，呢個比出面好多放題/普通日式餐廳做得出色好多。另外仲點左幾舊壽司同雞軟骨，3 個人埋單300

本身住慈雲山，之前行開見有食店新開張，一於同女朋友試下入到去裝修一般，但感覺乾淨服務員有禮貌！食物有驚喜！！地獄叉燒拉麵算有水準！？完全估唔到，蕃茄雞柳烏冬，湯底不錯！烏冬稍有點淋！但整體評分中上！三文魚腩刺身佢用4舊上碟，好彩冇雪味比同區某間的還要好！以舊區屋村黎講值得再支持！

今日原本冇想過會到慈雲山晚餐，但因太子道東塞車，改道變成迷路最後渣到去慈雲山。純文字討論因應原本冇想過要寫食評，冇打算相機食先，收左工仲要影相打字好攰架嘛。食日食既係7號同5號餐。唔係食神級舌頭講唔出味道有乜優劣點，但50蚊內一位既晚餐完全係物有所值的，味道不錯，分量也夠。用餐環境雖然不闊落但也沒有太壓迫，更重要係乾淨啦，而且店員廚師服務很禮貌。剛上openrice 睇先知道係新開幕。為鼓勵佢地，特寫食評作支持同記錄，希望下次再來可以變得更有水準。p.s. 如果佢地有麵屎湯就好喇。p.s. 非包膠廣告，不請勿X