上海飽餃店

營業中

休息中

看雜誌介紹這間小店係由之前任職雪園的師傅開, 食物質素好有水準, 所有帶男友去食, 去到這店第一個感覺係幾殘舊, 入面的環境亦唔舒適, 男友立即問:「點解你會來呢度既?咁殘舊﹗如果唔係你話來, 我一個人都唔會入來食呀」男友好奇我為何會肯去呢D殘舊的小店食野, 如果真係好食既我都唔介意, HEHE店中的老闆娘好好人, 雖然食物款式唔多, 但我們都試了以下幾種:1.小籠飽-新鮮蒸的, 皮薄餡靚, 好多湯汁, 而且拎起的時候D皮唔會穿, 好好食呀^@^, 之前食過好多有名的上海菜館上準都唔及呢度咁好2.煎餃-唔會有油淋淋的感覺, D皮好薄又多餡, 一點都唔會好似平時食那些咁膩, 可以食多幾隻3.生煎包-包做得鬆軟, 煎過的表面脆脆地,餡同煎餃的餡差不多, 不錯4.牛肉包-包做得鬆軟, 餡係新鮮牛肉倣成, 有牛肉鮮味5.豆漿-唔太甜, 幾好飲最驚喜既係街坊價錢, 真係一間有心的小店

見呢度好多人都話蔥油餅好味,今晚終於有機會試下... 去到時都七點半,蔥油餅最後一件,可能都擺左陣. 唔脆了.. 但味道果然岩岩好... 好香, 唔油, o岩咸... 如果有機會食新鮮,我估一定好正... 其他食物唔再多講了...

呢間鋪既食物真係好唔錯,我經常都會去買外賣拎返家吃.我食過既食物有:煎餃($2/隻)--又平又大隻又好味又多汁餡又大舊,係我至愛,直頭食上癮,每次都要食番3,4隻,雖然個皮有時會穿.生煎包($2/個)--感覺上同煎餃既味道差不多,係個皮同外型唔同,又係大件夾抵食.菜肉包($3/個)--大大個包,餡多,菜肉比例平均味道又0岩,夠飽肚.蔥油餅($3/塊)--唔會太油,做得幾乾身幾脆.小籠包($10/4隻)--只食過一次,因為對小籠包興趣不大,覺得同酒樓食到既差不多,咁呢度既當然平d啦.牛肉包($2/個)--我唔食牛肉,咁我請朋友食,佢覺得好味.豆漿($5/杯)--一般豆漿,無特別.因為成日去買既關係,每次都覺得佢地笑容可親.我估佢地係一家人,因為成日見佢地0向廚房好忙但好開心有講有笑.順帶一提,佢地每月逢1,15 號都會休息.

老闆話d生煎包岩岩煎好,於是乎叫兩個... 真係好正,十蚊五只,個皮好薄,好多肉汁,咬落一定漏晒d汁,而個包底好脆,但亦都好薄.. 同d小籠包不相伯仲..

講真,如果唔係的士佬介紹我去,我都唔會無端端入去。不食過認過蔥油餅同生煎牛肉包後, 心思思又想再去食。小籠包固然係好，但係好多人都會忽略左蔥油餅。就是一拿上手就俾佢60分先，一來唔油膩，摸完隻手唔會油"淋淋"，二來未拿近已經勁有蔥香和芝麻香。件餅唔係話好厚, 但當然唔好以為好似意大利薄餅咁得2mm，但面層真係煎到脆卜卜，餅身又軟熟，同埋件餅無話索滿油，就算外賣至回家後一樣咁脆身。做得咁好食原來師傅係前雪園個蔥油餅師傅，睇佢係咁用力搓麵粉，唔怪得知每朝和下午茶時間都咁多人買, 幾蚊件真係好鬼抵！

今日放半晏,途經此店,買左幾款飽點素菜飽$3---白菜+冬菇粒餡,十分新鮮!飽亦不太乾身.小籠飽$10/4隻---即叫即蒸,皮薄肉餡新鮮多汁,好!鍋貼$2/隻---呢款比較削!因是現成,皮吾脆但夠薄,肉餡亦新鮮多汁.豆漿$5---只屬一般!雖冇豆渣,但亦冇豆香.總括來說,撇開環境,咁既價錢同水準已超越很多所謂既上海菜館!

路過此店,買左件蔥油餅$3,外層好多芝麻,雖然件餅不太熱,但咬落去仍有微脆,且不是太油膩屬中上之作!

2款都好好味好多汁>V<又平..生煎包10蚊5個小籠包10蚊4個

岩岩媽媽生日, 於是搞搞新意思.. 唔食西式蛋糕, 呢次買壽包... 四蚊一個細, 一大十二細要98蚊,即是大o既要50蚊一個... 訂包時都覺得幾貴, 但覺得幾特別,算喇.. 今日去拎時,見到d包,覺得都物有所值, 因為平時d壽包都只係普普通通一舊白色面粉加幾點紅點就算..但呢道就真係好似成個桃咁... 係有桃葉架, 不論大小都有... 唔錯..唯一可以改善o既就係個包裝...到食喇.咁硬o既... .. 先知道自己應該叫佢幫我整熱個包先.. 凍左o既包始終爭dd... 熱先至知好唔好食... 失策..

其實都只係普通~~牛肉包算最好喇~~小籠包真係好平~~呢個價錢係唔錯~~其實我一向都覺得小籠包係一樣好好味o既野~~佢係整得ok ga~~ 只係唔會話寧舍特別好~~另外::鍋貼~生煎包一般

這食店是由一早七時多開始已經有外賣攤呢~ 所以不需等到下午才去買外賣~

highly recommend:1. 即食即蒸小籠包, 十蚊四隻, 由於即叫即蒸, 所以要等7-8 mins, 但絕對等得過, 因為熱辣辣超正! 仲有, 由於小籠包都有幾多湯汁, 皮又薄, 夾時建議用匙羮幫手~哈~ 2. 生煎牛肉包, 十蚊五個, 食o個時不要太粗暴, 如果唔係俾牛肉汁彈到塊面就笑爆咀 3. 生煎包, 十蚊五個, 呢個價錢黎講叫做抵食, 因為舊餡都幾大舊, 而且豬肉仲好鮮味, 諗起都想食 注意事項:1. 只要價錢一樣, 可隨意配搭, 例: 生煎牛肉包3個+ 生煎包2個= $102. 可問問阿姐有什麼新鮮熱辣煎起, 咁又可以食到滾熱辣靚包/餃3. 如果外賣拎走, 只要適量加熱, 依然有水準, 我試過雪過一晚再叮叮佢都仲好好味! 雖然店面有點殘舊, 但這就是風味呀! 謝謝收看, bye!

每次有幸經過這店都會買蔥油餅、生煎包、鍋貼…等包點吃。因為此店下午時間便會有外賣攤，很平很抵食。個人最喜歡食蔥油餅，餅餅煎得好香口，厚薄適中，又多蔥同芝麻，真係勁好味；另外，牛肉包、鍋貼都好掂，但千祈唔好怕油多。 附帶一提，如果你覺得o的包點唔夠熱，可以要朮佢整過的，我試過幾次，位阿姐都冇俾面口我睇，好好人呢！

我之前對小籠包無乜要求，覺得整黎整去咪又係咁．但自從前排無意之中入左去食小籠包之後，我對小籠包ｏ既要求高左好多好多．呢間舖頭其實主要做外賣，大多數ｏ既人都係門口買完就走．舖頭裹面仲幾亂添．但係ｄ小籠包就做得好有心機，即叫即蒸，要等成７－８分鐘，與此同時，我地仲叫左ｄ煎餃，同生煎包．煎餃好正，好多肉汁，ｄ皮又唔痴牙，入口好有滿足感．生煎包都唔錯．但最正係小籠包，岩岩上台時個皮竟然可以薄到見到裡面有幾多湯汁，我女友見咁薄唔知點夾好，我就好有技巧咁用筷子夾個包頭，哈～～又俾我夾到，個小籠包皮仲好似個袋咁，變到好似水滴咁，可想而知個皮有幾薄．由於岩岩整起，條利差小小被灼熟．但個包ｄ汁實在太美妙，唔想o徒左ｄ汁，我就啜晒佢先．中間粒肉又岩岩好，食完即刻愛上佢．連我女友一個咁唔鍾意食小籠包ｏ既人都要指定食呢間，真係好鬼死正，仲要祗係十蚊四隻，之後我四上嘗試小籠包，發現只有北京樓ｏ既小籠包可以相提並論，但覺得都係爭小小，但人地要２２蚊一籠．其他十幾廿蚊籠ｏ既簡直可以話入唔到口．．　總之十蚊四隻極高水準ｏ既小籠包真係講都唔信．．