3月份好評餐廳十強
2016-04-06
三月嘅十強又嚟一次大執位,足足有八間新上榜餐廳等緊大家慢慢試。而且菜式亦非常多元化,由港人最愛嘅日本拉麵、放假去Hea一流嘅Cafe、本土式車仔麵同小菜到放工飲杯嘢嘅好介紹都有。又係時候Mark定幾間心水餐廳,開始約飯局啦!

第10位 飲嘢(*新上榜)

名副其實大埔飲嘢嘅好地方之一,咁有咩飲?打開餐牌發現冷熱飲品都係以茶為主,主打嘅符碌茶其實即係Fruit Tea,一大杯有齊青檸、西瓜、菠蘿、奇異果、橙、西柚,冰涼清甜。飲完嘢口痕仲有唔少小食選擇,例如招牌拼盤同沙律西多士。

圖:eat_eat_everyday & lokyanyan

第9位 甜入心(*新上榜)

深水埗呢間甜品店中西都有齊選擇夠多,鎮店之寶焦糖布甸椰皇子用原隻椰皇送上枱,焦糖布甸夠滑,下面係椰奶同滋潤椰汁啫喱,旁邊嘅椰肉挖埋一齊食更爽歪歪。另外仲有雪香飄壺,其實即係韓式飄雪冰。英式果茶同朱古力噴泉自助任飲任食,真正甜入心。

圖:wabb0306 & au9

第8位 拉麵達人(*新上榜)

由幾個年輕人喺佐敦開設嘅日式拉麵店,無日本大師傅坐陣但勝在有熱忱!近嚟最多食家推介嘅櫻花蝦達人就係濃蝦醬油湯底,一上枱聞到香味就知道真材實料。海鮮配料夠多而且完全無霉味,湯底濃郁鮮甜。拉麵店仲有煎餃同一口紫芋丸等小食。

圖:mykissyjade & starjv

第7位 七福神和食亭

香港人愛食日本菜是常識吧,佐敦呢間日本料理店以高CP值為賣點。必點嘅八品刺身盛盒包哂海膽、三文魚、吞拿魚、帶子、甘蝦等,賣相靚之餘刺身新鮮,絕對交足貨。特別啲仲有原隻水果雪芭,例如菠蘿雪芭同蘋果雪葩,清甜解滯。

圖:Car roll Lam & hkeateriespot

第6位 居廬(*新上榜)

土瓜灣悠閒Cafe,食物選擇由小食、Pizza、意粉到飯都有,不過佢地最出名嘅係甜品鬆餅!草莓麻糬鬆餅係水滴形窩夫,夾層加咗麻糬所以口感係外脆內煙韌,加埋士多啤梨同雪糕無得輸。另外仲有最近大熱嘅紫薯味同朱古力等口味選擇。

圖:Zoe chui

第5位 正麵館 新派車仔麵(*新上榜)

車仔麵一定係嗱渣嘢?未必。旺角呢間打正旗號做新派車仔麵,環境企理。湯底除咗清湯仲有香濃喇沙湯同惹味嘅胡椒豬骨湯。唔鐘意飲湯仲有得乾撈,餸方面豬腸、辣味豬皮同瑞士雞翼都有唔少推介。唔夠飽仲有懷舊蝦多士等小食值得一試。

圖:Lawrence Lau

第4位 WOFT(*新上榜)

而家唔少酒吧都會供應小食甚至主菜,而旺角呢間Bar嘅食物更有「創作力量同幻想會嚇你一跳」嘅驚喜,白汁磨菇蜆肉狗仔粉、五香肉丁雞蛋仔、避風塘薯條、綿花糖朱古力夾心批同黑松露芝士火鍋都各有Fans。飲嘢方面就有香港特色雞尾酒同手工啤酒。

圖:出賣食相 & Vi_lovefood

第3位 Bari-Uma 廣島霸嗎拉麵(*新上榜)

以「廣島最強濃厚拉麵」作為賣點進駐有拉麵街之稱嘅銅鑼灣登龍街,秘製拉麵湯底除咗豬骨之外仲加入雞骨同多種蔬菜,特別香濃但容易入口。加埋拉麵自家制,幼滑而且唔容易變腍。另外羽根燒餃子用機壓煎,香脆唔油膩。

圖:eatmugfoods

第2位 肉餅哥小炒料理(*新上榜)

荃灣港式餐廳為香港人由細食到大嘅肉餅 「升呢」!有32款唔同口味日日試唔同款都得,豪氣啲嘅有原隻新鮮龍蝦肉餅或者黑松露帆立貝肉餅,惹味嘅又有泰式冬陰功汁肉餅或者雪菜辣椒肉餅,芝士控亦有芝士流心肉餅揀。

圖:愛吃達人 & kelvinfoodki

第1位 Burger Joys

隔咗一個月重新上榜,即刻奪得冠軍寶座!能夠成功喺灣仔咁多間酒吧當中脫穎而出在於夠大份又高質素,例如新出嘅Hiro Burger就用咗和牛做漢堡扒,香嫩多汁,夾埋法國米芝蓮麵包同醃青瓜沙律菜等配料超滿足。芝士薯條同水牛雞翼等小食亦惹味誘人,加埋啤酒真係邪惡到一個點!減肥?聽日先開始啦。

圖:mykissyjade




文:Cathy

隨時接收最新資訊
讚好OpenRice專頁!

關鍵字
排行榜
拉麵
Cafe
車仔麵
漢堡
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
3月份好評餐廳十強
2017-04-06
踩過界!鞋店尖沙咀開高CP值Café
2017-04-12
一個人喺中環食乜好?
2017-03-29
4月份好評餐廳十強
2017-05-10
【新店直擊】粉色系Café潮聖打卡必到
2017-03-03
【無綠不歡Green Monday】味覺顛覆 未來漢堡襲港
2017-04-18
餐廳資料
更多
收起
本月熱門
【隨時更新】便利店尋寶 每周新品速報
6天前
給自己一個休息時間 10-11月下午茶推介
2019-10-25
高CP值放題推介
7天前
鼎王來了!味道服務媲美台灣 必食麻辣鴨血鍋及員工教路秘製鼎王飯
2019-11-01
糧尾打氣!5間灣仔平價飯堂推介
2019-10-24