葵廣呢間新開嘅麻辣真漢子以職安真漢子為主題，係云云小食店中，好似漆黑中嘅螢火蟲一樣，咁鮮明，咁出眾！店員一身嘅肌肉、螢光嘅頭盔工作服、搞鬼嘅餐牌菜名，同埋嗰句so99y，都徹底咁將呢間食店加晒分！

舖頭由店主Ryan同認識十幾年嘅好兄弟大碌主理，用呢個主題開店唔單係因為gimmick，原來兩位上一代係真。職安真漢子，所以就想同爸爸及全港職安真漢子致敬！兩人本身都唔係做飲食業，一位做開電子商貿、另一位係體育老師，真係估你唔到！

兩人幽默感豐富，店內播住80年代舊歌，菜名好似牙簽仔臘腸、邪牛丸、花枝招展丸、我叫雞肉腸、柒嘴鴨舌等，仲有刻骨銘心初戀金銀情侶套餐同人人有功練套餐，連張單都寫住「我很窮但我有肌肉」，識笑真係幾好笑。

講返食物先，有十幾款麻辣串，除牛肚外，其他都係即叫即製，麻辣湯係豬骨湯底配上多款辣椒、香料等熬四個鐘以上，濃郁辣度勁。所有食物分六個辣度，由初生嬰兒辣至魔鬼辣，加入自家製麻辣油、花椒油同辣粉，夠麻而且香口惹味，食得辣一定覺得過癮。

「麻甩老肚」係炆足三個鐘牛肚，入味夠腍；「雙刀火雞腎」全部去筋，食落好爽口。「麻辣唐牛」選用牛冧肉製成，唔會灼至過老。滑嘟嘟雞用雞髀肉，幾嫩滑。

麻甩老肚 $10/串

雙刀火雞腎 $12/串、熱血牛栢葉 $10/串

牙簽仔臘腸 $10/串，滑嘟嘟雞 $10/串、食神唐牛 $8/串

麻辣串$8-$12/串，略嫌份量細咗少少，同埋忙起上嚟單都幾混亂。不過有兩位肌肉男坐鎮，得閒同食客吹水講笑，算你啦。

麻辣真漢子

地址：葵芳葵富路7號葵涌廣場3樓Top世界3069號T7號舖

文、相、片：Perrins