食雞可以話係今年嘅潮流之一，唔淨止講緊打機嗰隻食雞呀，仲有真係食落肚嗰啲。今年都開咗唔少賣手撕雞嘅小食店。最近喺西環同佐敦都開咗間，主打手撕雞同埋原隻燒雞。
呢間舖頭係外賣店嚟，有即買即食嘅手撕雞、泡椒鳳爪；經已醃好做好晒調味嘅餸菜，例如梅菜扣肉、好味雞；同埋有飯盒賣。對於附近嘅上班一族嚟講，無論係lunch定晚飯食都幾方便。
根據負責人王先生表示，舖頭嘅雞全部嚟自惠州嘅自家農場，以五穀糧飼養，純天然、冇激素，並有檢疫等衛生證明。每隻雞大約養120日左右，就會送去廠房。經過浸熟、速凍、貨運等程序每日運落嚟香港。「我哋用氮氣去令隻雞速凍，呢個技術成本雖然較高，但冷凍速度較快，能夠盡量保留最多嘅雞肉、雞汁，食落會原汁原味啲。」
每盒手撕雞大約係半隻雞嘅份量，雞味的確較重、油膩感較輕，但相對嚟講就冇咁嫩滑。
泡椒雞爪都有返咁上下麻辣度，完全係醒神小食。
好味雞預先有秘製醬料醃好咗，返到office或屋企，叮一叮就食得。
最吸引嘅應該係原隻棟企雞，$138隻唔算太貴。由醃到燒嘅過程都花費唔少功夫。由於新鮮燒起熱辣辣咁食係最佳嘅食用狀態，所以建議大家，最少早一個鐘頭預訂，轉頭返去拎。燒完即刻撕嚟食，層皮仲係脆卜卜㗎，而且仲幾多肉汁添。
豐收碗順德好味雞
地址：西環正街26號
文、相：Kar