紅磡四川麻辣小店 新推入冬限定超鮮甜一人貝貝鍋 (有片)
2018-12-24

嚟緊呢幾日又會凍返,有返啲冬天感覺之餘,又更加會想打下邊爐。紅磡有間四川菜小店,主打坊間少見嘅貝殼粉絲,最近仲新推出左一人貝貝鍋,同埋多款一人干鍋,辣椒仔女同海鮮控都唔好錯過啊。

未介紹一人貝貝鍋有咩貝貝之前,必須先介紹下佢個爐頭,靚到噴汁!造型有啲似中國古代嘅灶頭,影相打卡應該都呃到唔少like。

入返正題,呢個貝貝鍋,唔係得個樣,都好有內涵。湯底有三款選擇,包括香辣、香蒜同泡椒味。全部都係店主自家熬製,冇味精嘅。食得辣嘅話開飯仔會推介泡椒味湯底,以豬骨、雞骨熬製,仲要加入埋白貝,所以湯底本身已帶鮮甜,陣陣香辣味從中滲出。

至於一眾貝貝,就包括有新鮮象拔蚌、貴妃蚌、蟶子同沙白,全部都好鮮好甜好爽口啊。特別係貴妃蚌,大隻到見到會忍唔住尖叫,同埋真心唔會捨得分一啖畀人食(唔怪得叫一人貝貝鍋啦,誤)。同埋必須要講,湯底嘅辣香恰到好處,唔會太搶風頭蓋過咗啲海鮮嘅甜,但又會默默地緊守好自己嘅岡位,低調地提醒你佢嘅存在。

海鮮以外,亦配有時菜、丸類同自選粉類,全部都係索湯力特強。淥完啲海鮮再淥,盡吸海鮮嘅精華,甜到一個點。

至於一人干鍋,就有幾款選擇,包括新鮮海蝦、牛柏葉、雞翼同大腸等。雖然話就話叫一人鍋,但份量一啲都唔少,兩個人些牙食都得呀。幾款干鍋同樣有得揀辣定唔辣,醬汁底都係店主自製,佢哋透露係用咗草果、白芷等14種香料炸成油,再用桂皮、甘草等14種香料炒成醬,加埋配菜同秘製辣醬而成,咁多料,唔怪得之味道咁香層次咁豐富啦。

要食好西唔可以怕煩,雖然新鮮海蝦要逐隻剝殼先食到,但隻隻都超級入味。唔係淨係吮個殼嘅汁呀,係連入面嘅蝦肉都好香甜,原來又係店主心機之作,醃好晒先再落鍋煮。

牛柏葉亦係推介干鍋之一,爽口不在話下,仲要索晒啲湯汁,辣辣地咁好香口,送飯啱晒。

至於雞翼,則好好心機咁拆成單骨,方便食之餘亦會更加入味;而大腸就好乾淨,一啲胛味都冇。最後溫提一句,貝貝鍋同干鍋都只係限晚巿供應,仲要早一日預訂先有得食呀留意返。


鮮蒲
地址:紅磡祟志街29號地舖


文、相、片:Kar


關鍵字
紅磡
小店
一人鍋
火鍋
海鮮
貝貝鍋
干鍋
飲食潮流
開飯仔為大家發掘香港這個美食之都的最新美食資訊,分享飲食潮流文化。
餐廳資料
本月熱門
全城抗炎!送上門懶人煮食包及套餐大合集2.0 花膠燉湯/火鍋/鐵板燒
2020-10-07
牛大人火鍋姊妹店!旺角新開台式燒肉吃到飽 任食澳洲 M5 和牛、SRF極黑牛霜降牛肉眼
2020-10-19
【即睇10月生日】酒店半價放題 Tiffany & Co.旗艦店導賞
2020-10-06
高級意大利菜餐廳尖沙咀重開 擁無敵海景 即席炮製經典芝士黑松露意粉+抵食3道菜午餐
2020-10-12
滋味到家!新鮮海野海鮮+逾200款蔬果肉類 食材直送上門網站推介2.0
2020-10-08