滋味到家!嶄新米芝蓮飲食體驗 五星級酒店大廚上門即場煮時令餐單
2020-05-12

受疫情影響,巿面上多咗唔少餐廳,甚至酒店級嘅餐廳都提供外賣自取或外送服務,最近,九龍區一間五星級酒店更加推出嶄新嘅飲食體驗,外送酒店級嘅大廚上門,即場幫你煮埋餸同提供服務!

呢個全新嘅家居體驗服務,由酒店內嘅意大利餐廳Tosca di Angelo提供,接到預訂後,每次會派出幾位大廚同專業侍應親自去到客人屋企,即場烹煮時令餐單,加錢仲可以做埋wine pairing添!安坐家中,唔使自己郁手,就食到米芝蓮級嘅菜式!

餐單有兩款選擇,客人可以要求變更部分嘅菜式嘅,大廚亦可能會因應客人屋企嘅實際情況同可用廚具而調整餐單,好有彈性。五道菜餐單由前菜到甜品都選材嚴格,用料豐富。

首先出場嘅係生牛肉配芥末、朝鮮薊、火箭菜,大廚選用意大利北部嘅生牛柳肉、熟成28個月嘅巴馬臣芝士,配搭各種香菜同以海鹽、黑椒等自製嘅輕身芥末醬,啖啖芝士香。配埋入過木桶age咗12個月,又toasty又rich嘅Tenuta Regaleali Chardonnay白葡萄酒,相當清新開胃,作為前菜好稱職。

第二道係海膽意大利飯。製作一啲都唔簡單,大廚特意選用最上乘嘅acquerello三年陳年米,以菜湯煮好飯後,再混入油封蕃茄同新鮮山葵等,食落唔會攻鼻之餘又有份清新感,啲risotto仲好煙韌好有咬口。配酒首選西西里島南部嘅natural wine:Terre Siciliane IGP Rami,呢隻酒放過喺古老嘅陶瓷樽內陳年過,又浸過葡萄樹乾同葡萄皮,味道複雜,帶有蜜糖甜香,同時又有陣陣花香同果香。

手釣海鱸魚配朝鮮薊、馬鈴薯、烏魚子係一道經典嘅地中海菜式,地中海鱸魚嘅魚皮經過慢煎後,份外香脆,而魚肉則依然保持嫩滑。整道菜鹹鹹香香,最啱就係配Etna Bianci Puddara白酒,Etna以火山聞名,火山嘅土壤令到啲酒含有豐富嘅礦物,帶有鹹香,所以兩者好夾呢~

Main course係以慢煮處理嘅烤羊鞍及羊架配羅勒、甜椒、馬鈴薯蓉及黑胡椒汁,羊肉粉色鮮嫩,香口軟腍得嚟仲完全冇羶味,自家製嘅黑椒醬汁仲有加到羊肉汁落去㗎,夠晒心思。今次終於配紅酒喇,同樣係嚟自Etna嘅Rosso Aetneus,礦物味重,滲有香料味,更能帶出羊肉香。

最後當然要以甜品作結,係餐廳最受歡迎嘅意大利芝士蛋糕配咖啡沙冰,使用75%嘅Amedei意大利朱古力製作,口感豐富軟滑,陣陣咖啡香而甜度適中,最緊要係感覺夠light呀,仲有甜品酒配搭添。Moscato Della Torre,用Moscato風乾提子乾釀製,口感又rich又sticky。

留意返呢個體驗服務只限晚餐時段供應,每次預訂最少都要有4個人,同埋要最少3日前預訂啦~


Tosca di Angelo
地址:尖沙咀柯士甸道西1號環球貿易廣場(ICC)香港麗思卡爾頓酒店102樓
預約電話:2263 2700


文:Kar
相:Tom Li


關鍵字
酒店
全城抗炎
九龍
甜品
海鮮
飲食潮流
開飯仔為大家發掘香港這個美食之都的最新美食資訊,分享飲食潮流文化。
餐廳資料
本月熱門
【隨時更新】零食速報 每周新款零食、酒品點評
6天前
【6月生日優惠】免費食酒店龍蝦自助餐 100樓望維景食嘢8折
2020-06-02
食豪啲啲 城中5間海鮮+肉扒父親節自助餐
2020-06-10
5月份好評餐廳十強
2020-06-05
至甜初夏 6月下午茶推介
2020-06-15