無論咩天氣打邊爐或燒烤，配埋海鮮就仲吸引，最開心係一個價錢任食海鮮，唔使就住荷包，一齊睇吓香港有咩好食嘅海鮮放題餐廳啦～
即撈海鮮+和牛火鍋 西城水產海鮮火鍋放題 
圖：接近7,000呎嘅火鍋店，主打一人一鍋，湯底有藥膳麻辣、貴州紅酸湯、日式壽喜燒、金湯花膠雞、意式特濃番茄等等，亞洲及西式口味，口味算多元化。放題套餐以澳洲M5和牛同海鮮做主角，店內仲設有水池，好似花蟹、基圍蝦、鮑魚、蟶子同扇貝等，款款都生猛新鮮，真係海鮮控必備checklist～另外自助區提供各種肉類、丸子、蔬菜、熟食、炸物、酒類等，花款多多。餐廳更設有可容納8至20人嘅獨立房間，開小型party都得！
即撈海鮮放題 千海水產海鮮火鍋放題 
圖：愛吃達人
最近最Hit嘅放題一定係呢間，唔單只有火鍋，重點係有自助海鮮區讓大家即撈即食，一試就返唔到轉頭～甫入店內就見到超大水池放滿各種海鮮等你任撈，包括三點蟹、基圍蝦、大頭蝦、鮑魚、沙白、花螺等，想食幾多就自己撈，會有專人幫你清洗，夠晒貼心！鮑魚肉質爽彈鮮甜，大頭蝦勁多蝦膏，蜆肉大大粒，鮮味爆棚。湯底方面必揀龍蝦頭湯，濃濃龍蝦香氣，煮海鮮一流。熟食選擇都好多元化，如鵝肝厚多士、燒鮮蠔、羊架、烤榴槤、黑糖麻糬、芝麻雞翼等，樣樣都係水準之作。飲品同甜品都係無限供應，包你食到最後唔捨得走。
海鮮蒸氣火鍋任食 林洪記水產 
圖：主打即蒸海鮮同打邊爐，仲有即炒海鮮、麻辣雞煲、大閘蟹雞煲放題，鍾意海鮮嘅真係要試一次！推介蒸海鮮火鍋放題 ，蠔隻非常新鮮，一咬落去鮮甜海水味即刻喺口腔爆開；龍蝦肉好彈牙，鮮味十足！鮮海蝦、白蜆、蟶子等都可以任你encore，一定唔怕唔夠喉～湯底方面海鮮湯底唔錯，蒸完海鮮嘅湯汁流入粥底繼續滾，鮮味好濃郁。
雞煲海鮮火鍋 阿爺八鮮鍋
圖：跟妮飲食
尖沙咀人氣火鍋放題餐廳，將海鮮火鍋、刺身沙律、特色雞煲結合，畀食客一次過享受到多層次嘅豐富美食體驗，超正呀！食海鮮之前餐廳會先上時令燉湯，跟住可以選擇唔同口味嘅雞煲，有泰式酸辣雞煲、花膠雞煲、韓式芝士雞煲、四川麻辣雞煲等。食完就可以換湯底打邊爐，重頭戲係霸王海鮮盤，有龍蝦、鮑魚、大虎蝦、台山奄仔蟹、蘇格蘭元貝等，款款都好新鮮。必試仲有招牌手打黑松露墨魚滑，彈牙爽口，黑松露香味濃郁；另有鮑魚、海蝦、海蟹等都係任食㗎。
任食海鮮燒烤 蝦蝦燒 
圖：人氣燒烤放題店，有冷氣環境，唔使曬住出汗都可以慢慢享受燒烤嘅樂趣。嚟到呢度，首先要體驗流水蝦，蝦池內養住超生猛嘅大頭蝦，捉到蝦之後記住要先浸冰水凍暈佢再燒，燒完之後肉質彈牙鮮甜，蝦膏濃郁，係蝦迷嘅天堂！除咗蝦之外，餐廳仲提供海鮮自助區，任夾生蠔、鮑魚、大蜆、帶子、大眼雞、魷魚、螺類，海鮮選擇超豐富，唔使額外加錢就可以無限任燒，回本之選！仲有各式肉類、丸類已經串好放喺大雪櫃，餐廳亦會送上燒鰻魚串，燒到皮脆香口，油脂豐富，出色！
文：Yanica
編：Cathy
